ఫ్లోలో అనేసిన పవన్ కళ్యాణ్.. పిఠాపురంలో కొత్త తలనొప్పులు.. వర్మ యూటర్న్

జనసేన అధినేత పవన్ కళ్యాణ్ ఫ్లోలో మాట్లాడిన మాటలు ఆయన్ని ఇబ్బందిల్లోకి నెట్టేశాయి. కాకినాడ జిల్లా పిఠాపురం అసెంబ్లీ నుంచి ఈసారి పోటీ చేస్తున్నట్లు పవన్ కళ్యాణ్ ఇటీవల ప్రకటించారు. దీంతో టీడీపీ నేతల్లో ఆగ్రహం కట్టలు తెంచుకుంది. మాజీ ఎమ్మెల్యే, టీడీపీ నేత ఎస్వీఎస్ఎన్ వర్మ మద్దతుదారులు రోడ్లపైకి చేరి నిరసన తెలిపారు. అయితే టీడీపీ అధినేత ఎలాగోలా వర్మను బుజ్జగించారు. ఇంటికి పిలిపించి ఎమ్మెల్సీ ఇస్తామని హామీ ఇచ్చి సర్దిచెప్పారు. దీంతో పవన్ కళ్యాణ్ తరుఫున వర్మ ప్రచారం కూడా ప్రారంభించారు. పవన్ కళ్యాణ్ విజయం కోసం తాను కృషిచేస్తానని ప్రచారం మొదలెట్టేశారు.

అయితే ఇక్కడితో సమస్య ముగిసిందిలే అనుకుంటే పవన్ కళ్యాణ్ ఏదో ఫ్లోలో అన్న మాటలు ఇప్పుడు మళ్లీ ఇబ్బంది పెట్టేలా మారాయి. మంగళవారం కాకినాడ ఎంపీ సీటుకు పవన్ కళ్యాణ్ జనసేన తరుఫున ఎంపీ అభ్యర్థిని ప్రకటించారు. టీటైమ్ యజమాని ఉదయ్‌ శ్రీనివాస్‌ను కాకినాడ ఎంపీ అభ్యర్థిగా ప్రకటించారు. ఈ సందర్భంగా మాట్లాడిన పవన్ కళ్యాణ్.. తన కోసం, పార్టీ కోసం ఉదయ్ ఎంతో త్యాగం చేశారని అన్నారు. అందుకే ఉదయ్‌కు ఎంపీ టికెట్ కేటాయించినట్లు చెప్పారు. అయితే ప్రధాని మోదీ, అమిత్ షా సూచనతో ఒకవేళ తాను ఎంపీగా బరిలోకి దిగితే మాత్రం.. పిఠాపురం అసెంబ్లీ నుంచి ఉదయ్ పోటీ చేస్తారని ఉన్నారు. తామిద్దరం స్థానాలు మార్చుకుంటామని ప్రకటించారు.

అయితే పవన్ కళ్యాణ్ చేసిన ఈ వ్యాఖ్యలే ఇప్పుడు జనసేనానికి లేనిపోని తలనొప్పులు తెచ్చిపెట్టాయి. పవన్ కళ్యాణ్ కోసం పొత్తులో భాగంగా సీటు త్యాగం చేశానంటున్న ఎస్వీఎస్ఎన్ వర్మ.. పవన్ పోటీ చేయకపోతే తాను బరిలో ఉంటానని స్పష్టం చేశారు. 20 ఏళ్ల నుంచి టీడీపీ కోసం పనిచేస్తున్నానన్న వర్మ.. చంద్రబాబు ఆదేశాలతోనే పవన్ కళ్యాణ్ కోసం సీటును త్యాగం చేసినట్లు చెప్పుకొచ్చారు. ఎంతో బాధతో స్థానాన్ని వదులుకున్నానని.. ఒకవేళ పవన్ కళ్యాణ్ కాకినాడ ఎంపీగా పోటీచేస్తే పిఠాపురం టికెట్ తనదేనని అన్నారు.

అయితే స్థానాల మార్పు వంటి అంశాలు ఉంటే ముందుగా కూటమిలో మాట్లాడుకోవాలి కానీ ఇలా బహిరంగ వ్యాఖ్యలు సరికాదని రాజకీయ విశ్లేషకులు అంటున్నారు. పిఠాపురంలో అంతా సద్దుమణిగిందని అనుకుంటే పవన్ కళ్యాణ్ ఫ్లోలో అన్నమాటలు అసమ్మతిని మళ్లీ రెచ్చగొట్టే ప్రమాదం ఉందని అంటున్నారు. ఇలాంటి మార్పులు చేయాలనుకునే పరిస్థితుల్లో ముందే అసంతృప్తులను బుజ్జగించి ఆ తర్వాత ప్రకటనలు చేయడం మంచిదని సూచిస్తున్నారు.