మోదీ గ్యారెంటీ పేరుతో మహిళలకు రూ.3 వేలు.. పోస్టాఫీస్‌ల ముందు భారీ క్యూ.. చివర్లో ట్విస్ట్

 ప్రస్తుతం దేశంలో సార్వత్రిక ఎన్నికల సమరం కొనసాగుతోంది. ఈ ఎన్నికల్లో ఓటర్లను తమవైపు తిప్పుకునేందుకు పార్టీలు రకరకాల వ్యూహాలు పన్నుతున్నాయి. మేనిఫేస్టోలు, హామీలు, పథకాలతో ఎన్నికల ప్రచారాన్ని హోరెత్తిస్తున్నాయి. ఈ క్రమంలోనే కొన్ని పుకార్లు కూడా షికార్లు చేస్తూ ఉన్నాయి. తాజాగా మహిళలకు మోదీ గ్యారెంటీ పేరుతో రూ.3 వేలు ఇస్తారని.. అందుకు పోస్టాఫీస్ ఖాతాలు ఉండాలనే ఒక వార్త వైరల్‌గా మారింది. ఇది విన్న మహిళలు.. పోస్టాఫీస్ అకౌంట్లు తెరిచేందుకు తెల్లవారుజామునుంచే పోస్టాఫీస్‌లకు పరిగెత్తారు. ఆఫీస్‌ల ముందు భారీ క్యూ ఉండటంతో పోస్టాఫీస్ సిబ్బంది షాక్ అయ్యారు. అసలు విషయం తెలుసుకుని అవాక్కయ్యారు. అదంతా ఫేక్ ప్రచారమని అధికారులు స్పష్టం చేయడంతో నిరాశతో వెనుదిరిగారు. ఈ సంఘటన కర్ణాటకలో జరిగింది.

ఎన్నికల వేళ.. ఫేక్ న్యూస్ బాగా వైరల్ అవుతుంది. మోదీ గ్యారంటీ కింద పోస్టాఫీస్‌లో అకౌంట్ ఉన్న ప్రతీ మహిళకు.. 3 నెలలకు ఒకసారి రూ.3 వేలు కేంద్ర ప్రభుత్వం జమ చేస్తుందని.. కర్ణాటకలోని హుబ్బళ్లిలో ఒక వార్త వ్యాప్తి చెందింది. దీంతో అదే నిజం అని నమ్మి హుబ్బళ్లి వాసులు.. మంగళవారం తెల్లవారుజాము నుంచే అకౌంట్లు తెరిచేందుకు పోస్టాఫీస్‌లకు భారీ సంఖ్యలో మహిళలు చేరుకున్నారు. ఈ క్రమంలోనే ఆస్పత్రుల ముందు భారీ క్యూలు కట్టారు. అయితే భారీగా తరలివస్తున్న మహిళలను చూసి పోస్టాఫీస్ అధికారులు, సిబ్బంది షాక్ అయ్యారు.

దీంతో పోస్టాఫీస్‌ల ముందు మహిళలు భారీ లైన్లలో నిలబడటంతో అనుమానం వచ్చిన పోస్టాఫీస్ అధికారులు విషయం ఏంటని ఆరా తీయగా అసలు విషయం బయటపడింది. మోదీ గ్యారెంటీ కింద పోస్టాఫీస్ అకౌంట్ ఉన్న మహిళలకు 3 నెలలకు రూ.3 వేలు డబ్బులు జమ అవుతాయని వారు తెలిపారు. అందుకే తాము పోస్టాఫీస్ అకౌంట్లు తెరిచేందుకు వచ్చినట్లు ఆ మహిళలు చెప్పడంతో అధికారులు షాక్ అయ్యారు. అది విన్న పోస్టాఫీస్ అధికారులు అవన్నీ తప్పుడు వార్తలు అని.. అలాంటి పథకం ప్రస్తుతానికి ఏమీ లేదని మహిళలకు వెల్లడించారు.

అప్పటికీ మహిళలు అక్కడి నుంచి వెళ్లకపోవడంతో అధికారులు చివరికి పోస్టాఫీస్‌ల ముందు అలాంటి పథకం లేదని.. అవన్నీ ఫేక్ వార్తలు అని పోస్టర్లు కూడా ఏర్పాటు చేశారు. అయినప్పటికీ మహిళలు పోస్టాఫీస్‌లకు రాత్రి 8 గంటల వరకు వస్తూనే ఉన్నారని.. ఓ సీనియర్ పోస్ట్ మాస్టర్ వెల్లడించారు. మహిళలు తప్పుడు వార్తలను నమ్మి పోస్టాఫీసుకు వచ్చారని.. ప్రస్తుతం అలాంటి పథకాలేవీ లేవని స్పష్టం చేశారు.