ఒక బిడ్డను తప్పిస్తుండగా ఇంకో బిడ్డకు ప్రమాదం.. తీవ్ర విషాదం.. ఎస్కలేటర్‌తో జాగ్రత్త!

చిన్న పిల్లలను బయటికి తీసుకువెళ్తే వారిని జాగ్రత్తగా చూసుకోవాలి. అప్పుడప్పుడే బుడిబుడి అడుగులు వేసే చిన్నారులు.. మన చేతికి ఓ పట్టాన చిక్కరు. అటూ ఇటూ పరిగెత్తుతూ నానా హంగామా చేస్తూ ఉంటారు. ఇక రోడ్లు, రద్దీ ప్రదేశాల్లో అయితే వారి చేయిని మన చేతిలో పట్టుకుని వెళ్లాలి. పొరపాటున వారి చేతిని వదిలిపెట్టామే ఇక అంతే సంగతులు. ఎటో ఓవైపు పరిగెత్తి కింద పడటమో, ప్రమాదానికి గురి కావడమో జరుగుతుంటుంది. ఇలా కొన్నిసార్లు చిన్నారులే ప్రాణాలు కోల్పోయిన సంఘటనలు కూడా ఉన్నాయి. తాజాగా అలాంటి సంఘటనే ఒకటి చోటు చేసుకుంది. ఓ వ్యక్తి తన ఇద్దరు కుమారులతో వెళ్తుండగా.. ఒకరిని చేతిలో పట్టుకుని నడిపిస్తుండగా.. మరొకరిని చంకలో ఎత్తుకుని వెళ్తున్నాడు. ఈ క్రమంలోనే చేతిలో పట్టుకున్న పెద్ద కుమారుడు ప్రమాదంలో ఉన్నాడని గుర్తించి అతడిని కాపాడేందుకు ప్రయత్నించగా.. చంకలో ఉన్న మరో బిడ్డ జారి కింద పడి ప్రాణాలు కోల్పోయాడు.

ఛత్తీస్‌గఢ్‌లోని రాయ్‌పూర్ నగరంలో ఈ విషాద సంఘటన జరిగింది. ఓ వ్యక్తి తన ఇద్దరు కొడుకులతో కలిసి నగరంలో ఉన్న ఓ షాపింగ్‌మాల్‌కు వెళ్లాడు. 5 ఏళ్ల వయసు ఉన్న కుమారుడిని చేతిలో పట్టుకుని నడిపిస్తుండగా.. ఏడాది వయసు ఉన్న మరో కుమారుడిని చంకలో ఎత్తుకుని షాపింగ్‌మాల్‌లో షాపింగ్ చేస్తున్నాడు. ఈ క్రమంలోనే షాపింగ్‌మాల్‌లో ఉన్న ఎస్కలేటర్‌ను ఎక్కేందుకు ప్రయత్నించాడు. అయితే ముందుగా తన పెద్ద కుమారుడిని ఎక్కించేందుకు ప్రయత్నం చేశాడు. ఈ నేపథ్యంలోనే ఆ చిన్నారి ఎస్కలేటర్ ఎక్కేందుకు ఇబ్బంది పడుతుండగా.. తండ్రి అతన్ని పైకి ఎక్కించడానికి ప్రయత్నించాడు.

అంతలోనే ఎడమ చేతిలో ఉన్న ఏడాది చిన్నారి పట్టు తప్పిపోయాడు. చేతుల్లో నుంచి జారిపోయి అమాంతం కింద పడిపోయాడు. ఆ ఎస్కలేటర్.. షాపింగ్‌మాల్‌లో మధ్యలో ఉండడంతో పై అంతస్థు నుంచి కిందికి పడిపోయాడు. దీనికి సంబంధించిన సీసీటీవీ ఫుటేజీ వీడియోలు ప్రస్తుతం సోషల్ మీడియాలో తెగ వైరల్ అవుతున్నాయి. అయితే ఆ ఎస్కలేటర్ ఉన్నది ఏ అంతస్థు అనేది ఆ వీడియోలో స్పష్టంగా కనిపించడం లేదు. కానీ అది కనీసం 3, 4 ఫ్లోర్లకు పైనే ఉంటుందని ఆ వీడియో చూస్తే అర్థం అవుతోంది.

చిన్నారి కింద పడిపోవడంతో అతని తండ్రి హుటాహుటిన పై ఫ్లోర్ నుంచి కింది అంతస్థులోకి పరిగెత్తాడు. రక్తపు మడుగులో పడిన ఆ చిన్నారిని తీసుకుని వెంటనే ఆస్పత్రికి పరిగెత్తారు. అయితే అప్పటికే ఆ ఏడాది చిన్నారి ప్రాణాలు కోల్పోయినట్లు డాక్టర్లు ధ్రువీకరించారు. దీంతో ఆ తండ్రి అక్కడే రోదించారు. చిన్నారి పై అంతస్థు నుంచి పడిపోయిన ఘటనకు సంబంధించిన వీడియో ప్రస్తుతం సోషల్ మీడియాలో వైరల్ అవుతోంది.