ఢిల్లీ సీఎం కేజ్రీవాల్‌కు షాక్.. 7 రోజుల ఈడీ కస్టడీకి ఇచ్చిన రౌస్ అవెన్యూ కోర్టు

ఢిల్లీ సీఎం అరవింద్ కేజ్రీవాల్‌కు ఢిల్లీ రౌస్ అవెన్యూ కోర్టులో ఊరట దక్కలేదు. ఆయనను ఈడీ కస్టడీకి ఇస్తూ కోర్టు ఉత్తర్వులు ఇచ్చింది. ఈ మేరకు కేజ్రీవాల్‌కు 7 రోజుల ఈడీ కస్టడీ విధిస్తున్నట్లు ఢిల్లీ రౌస్ అవెన్యూ కోర్టు తెలిపింది. ఈ నెల 28 వ తేదీ వరకు కేజ్రీవాల్‌కు ఈడీ కస్టడీ విధించింది. అయితే ఈడీ రిమాండ్‌ను తిరస్కరించాలని కేజ్రీవాల్ తరఫు న్యాయవాది అభిషేక్ మను సింఘ్వీ చేసిన అభ్యర్థనను కోర్టు తిరస్కరించింది. ఈ క్రమలోనే కేజ్రీవాల్‌ ఈడీ కస్టడీపై రౌస్‌ అవెన్యూ కోర్టులో వాదనలు సాయంత్రమే ముగియగా.. కొద్దిసేపు తీర్పును రిజర్వ్‌లో ఉంచిన కోర్టు ఎట్టకేలకు కస్టడీ ఇస్తున్నట్లు తెలిపింది.

గురువారం సాయంత్రం ఢిల్లీలోని కేజ్రీవాల్ నివాసానికి చేరుకున్న ఈడీ బృందం.. రెండు, రెండున్నర గంటల పాటు ఆయన ఇంట్లో సోదాలు నిర్వహించి ఎట్టకేలకు అరెస్ట్ చేస్తున్నట్లు తెలిపింది. ఈ క్రమంలోనే గురువారం రాత్రి ఆయనను భారీ బందోబస్తు మధ్య ఈడీ కార్యాలయానికి తరలించిన అధికారులు.. ఇవాళ మధ్యాహ్నం ఢిల్లీ రౌస్ అవెన్యూ కోర్టులో హాజరుపరిచారు. ఈ సందర్భంగా కేజ్రీవాల్ తరఫున అభిషేక్ మను సింఘ్వీ వాదనలు వినిపించగా.. ఈడీ తరఫున అడిషనల్ సొలిసిటర్ జనరల్ ఎస్వీ రాజు వాదించారు. ఇరువర్గాల లాయర్లు సుధీర్ఘంగా వాదనలు వినిపించారు. కేసు విచారణలో భాగంగా కేజ్రీవాల్‌ను 10 రోజుల కస్టడీకి ఈడీ కోరగా.. కోర్టు 7 రోజులకు మాత్రమే అనుమతించింది.

కేజ్రీవాల్ అరెస్ట్‌ అక్రమం అని వాదించిన అభిషేక్ మను సింఘ్వీ అరెస్ట్ అవసరం ఏంటో చెప్పాలని ప్రశ్నించారు. అప్రూవర్‌గా మారి సాక్ష్యం చెప్పిన వ్యక్తికి క్రెడిబిలిటీ లేదని పేర్కొన్న కేజ్రీవాల్ తరఫు న్యాయవాది.. సాక్షాలన్నీ ఉండగా.. మళ్లీ కేజ్రీవాల్‌ను కస్టడీకి ఇవ్వడం ఎందుకు అని ప్రశ్నించింది. ఈ కేసులో కేజ్రీవాల్ అరెస్టు అవసరం లేదని.. అధికారాన్ని ఈడీ దుర్వినియోగం చేస్తుందని వాదించారు. కేజ్రీవాల్‌కు వ్యతిరేకంగా లిక్కర్ కేసులో ప్రత్యక్ష సాక్ష్యాధారాలు ఏమీ లేవని.. ఎలాంటి మెటీరియల్‌ ఆధారాలు లేకుండానే.. కేజ్రీవాల్‌ను ఈడీ అక్రమంగా, ఏకపక్షంగా అరెస్టు చేసిందని అభిషేక్ మను సింఘ్వీ వాదించారు. ఇక శుక్రవారం ఢిల్లీ రౌస్ అవెన్యూ కోర్టులో కేజ్రీవాల్‌ను హాజరు పరిచేందుకు ఈడీ అధికారులు తీసుకెళ్తుండగా మీడియా అడిగిన ప్రశ్నకు కేజ్రీవాల్‌ స్పందించారు. తన జీవితం దేశం కోసం అంకితమని.. జైలు లోపల ఉన్నా.. బయట ఉన్నా దేశ సేవ చేస్తూనే ఉంటానని తెలిపారు.

కేజ్రీవాల్‌ను కోర్టులో హాజరు పరిచిన ఈడీ.. ఢిల్లీ లిక్కర్‌ స్కాంలో కేజ్రీవాల్‌ కింగ్‌ పిన్‌ అని ప్రధాన కుట్రదారు అని కోర్టుకు తెలిపింది. ఈ క్రమంలోనే 28 పేజీల రిమాండ్‌ రిపోర్టును కోర్టు ముందు ఉంచింది. ఢిల్లీ లిక్కర్ కేసులో కేజ్రీవాల్‌ పాత్రపై కోర్టుకు వివరించింది. కేజ్రీవాల్‌ పాత్రపై కవిత నుంచి వాంగ్మాలం తీసుకున్నామని తెలిపింది. ఢిల్లీ లిక్కర్ స్కామ్ రూ.100 కోట్ల స్కాం కాదని రూ. 600 కోట్ల కుంభకోణం అని ఈడీ పేర్కొంది. ఇందులో రూ.45 కోట్లు హవాలా ద్వారా చెన్నై నుంచి వయా ఢిల్లీ మీదుగా గోవాకు నాలుగు రూట్ల ద్వారా పంపించారని తెలిపింది. విజయ్‌ నాయర్‌ కంపెనీ నుంచి అన్ని ఆధారాలు సేకరించామని.. తమ దగ్గర అన్ని ఆధారాలు ఉన్నాయని చెప్పింది. ఆప్‌, సౌత్‌ గ్రూప్‌ తరపున విజయ్‌ నాయర్‌ మధ్యవర్తింగా ఉన్నారని పేర్కొంది.