ఒక్కసారి ఎమ్మెల్యేగా అవకాశం ఇవ్వండి
Andhra Pradesh Telugu | Suryaa Desk | Published : Sun, Mar 24, 2024, 09:37 AM
ఎమ్మెల్యేగా ఒక్క అవకాశం ఇవ్వండి..అందరికీ అందుబాటులో ఉంటా, ఆదర్శ నియోజకవర్గంగా గుడివాడను తీర్చిదిద్దుతానని టీడీపీ గుడివాడ అభ్యర్థి వెనిగండ్ల రాము ప్రజలను కోరారు. శనివారం రామాపురం, పెదవిరివాడ గ్రామాల్లో బాబు ష్యూరిటీ - భవిష్యత్‌ గ్యారెంటీ కార్యక్రమంలో మాజీ మంత్రి పిన్నమనేని వెంకటేశ్వరరావు, మాజీ ఎమ్మెల్యే రావి వెంకటేశ్వరరావు, జనసేన నియోజకవర్గ ఇన్‌చార్జి బూరగడ్డ శ్రీకాంత్‌తో కలిసి ఆయన పాల్గొన్నారు. ఇంటింటికీ తిరిగి ఒక్కసారి ఎమ్మెల్యేగా అవకాశం ఇవ్వాలని ఆయన కోరారు. టీడీపీ సూపర్‌ సిక్స్‌ పథకాలను ఆయన ప్రజలకు వివరించారు. ఇరవై ఏళ్లుగా ఎమ్మెల్యేగా పనిచేస్తున్న కొడాలి నాని డబ్బులు సంపాదించుకోవటం తప్ప నియోజకవర్గానికి చేసేందేమీ లేదని, కల్లబొల్లి మాటలతో జనాలను మోసగించారని, గెలిచిన తర్వాత ఈ ఐదేళ్లలో ఏ ఒక్క గ్రామానికీ వచ్చి గ్రామ సమస్యలు పరిష్కరించలేదని రావి వెంకటేశ్వరరావు విమర్శించారు. ఒక్కసారి రాముకు అవకాశమిస్తే గుడివాడ నియో జకవర్గాన్ని ఆదర్శంగా తీర్చిదిద్దుతారని తెలిపారు. సన్యాసిరావు, దాసు, ప్రవీణ్‌ తదితరులు పాల్గొన్నారు.
|
|