బ్యాగులో దొరికాయని దాచిపెట్టాడు.. పోలీసులు వచ్చి చూస్తే వామ్మో

విశాఖపట్నంలో ఓ ప్రైవేట్ ట్రావెల్స్ మేనేజర్‌ వద్ద తుపాకీ దొరకడం స్థానికంగా కలకలం రేపింది. పోలీసులు జరిపిన సోదాల్లో అతని వద్ద ఓ రివాల్వర్, పిస్టల్ లభ్యమయ్యాయి. ఇక నిందితుడిని అదుపులోకి తీసుకుని విచారించిన పోలీసులకు అతను చెప్పిన సమాధానం విని దిమ్మతిరిగింది. ఇలాంటోళ్లు కూడా ఉంటారా అని పోలీసులు అవాక్కయ్యారు. చివరకు అతనిపై కేసు నమోదుచేశారు.

అసలు సంగతిలోకి వస్తే.. శివనాగరాజు అనే వ్యక్తి స్థానికంగా ఉండే ఓ ప్రైవేట్ ట్రావెల్ ఆఫీసులో పనిచేస్తున్నారు. ఏడాది కిందట ఝార్ఖండ్ నుంచి వచ్చిన ఓ వ్యక్తి ట్రావెల్స్ బస్సు ఎక్కారు. బెంగళూరుకు టికెట్ బుక్ చేసుకున్నారు. అయితే ఆ వ్యక్తి మద్యం మత్తులో ఉండటంతో శివనాగరాజుకు అతనిపై అనుమానం కలిగింది. మద్యం తాగడానికి తోడు అతని ప్రవర్తన కూడా ఎందుకో అనుమానాస్పదంగా తోచింది. దీంతో శివనాగరాజు అతన్ని ప్రశ్నించాడు. మొదట ఏవో కల్లబొల్లి కబుర్లు చెప్పిన అతను.. గట్టిగా ప్రశ్నించే సరికి అక్కడి నుంచి పారిపోయాడు.

అయితే ఆ వ్యక్తి పారిపోయే క్రమంలో అతని బ్యాగులో నుంచి రివాల్వర్, పిస్టల్ కింద పడిపోయాయి. అవేవీ పట్టించుకోకుండా అతను అక్కడి నుంచి పరారయ్యాడు. అయితే శివనాగరాజు వాటిని పోలీసులకు అప్పగించకుండా తన వద్దే ఉంచుకున్నాడు. అక్రమంగా ఆయుధాలను ఉంచుకోవడం తప్పని తెలిసి కూడా.. శివనాగరాజు వాటిని పోలీసులకు అప్పగించే ప్రయత్నం చేయలేదు. చివరకు ఎలాగో సమాచారం అందుకున్న పోలీసులు.. అతని వద్ద నుంచి రివాల్వర్, పిస్టల్ స్వాధీనం చేసుకున్నారు. కేసు నమోదు చేసి దర్యాప్తు ప్రారంభించారు.

మరోవైపు విశాఖపట్నంలో పెద్దమొత్తంలో ఈ-సిగరెట్లను పోలీసులు స్వాధీనం చేసుకున్నారు. మీరా కలెక్షన్ , డేజావు క్లాత్ షో రూంలో 743 ఈ సిగరెట్లు స్వాధీనం చేసుకున్నట్లు వైజాగ్ పోలీసులు చెప్పారు. వీటి విలువ మార్కెట్లో 22 లక్షల వరకూ ఉంటుందని వెల్లడించారు. ఈ - సిగరెట్లలో నికోటిన్ ఉంటుందన్న పోలీసులు .. ఇది మత్తును కలిగిస్తుందని చెప్పారు. ముంబై నుంచి ఈ- సిగరెట్లు తీసుకువచ్చి విక్రయిస్తున్నట్లు గుర్తించామని తెలిపారు. ఈ కేసులో ఇద్దరిని అరెస్ట్ చేసినట్లు తెలిపారు.