లండన్‌లో రోడ్డు ప్రమాదం.. భారతీయ విద్యార్ధిని మృతి

లండన్‌లో జరిగిన రోడ్డు ప్రమాదంలో భారతీయ విద్యార్ధిని మృతి చెందారు. లండన్ స్కూల్ ఆఫ్ ఎకనమిక్స్‌లో పీహెచ్‌డీ చేస్తున్న చేష్టా కొచ్చర్.. సైక్లింగ్ చేస్తుండగా ట్రక్కు ఢీకొట్టింది. ఈ ప్రమాదంలో తీవ్రంగా గాయపడిన కొచ్చర్‌ అక్కడికక్కడే ప్రాణాలు కోల్పోయారు. గతంలో నీతి ఆయోగ్‌లో పని చేసిన చేష్టా కొచ్చర్.. పీహెచ్‌డీ కోసం లండన్ వెళ్లారు. ఆమె మరణ వార్తను నీతి ఆయోగ్ మాజీ సీఈవో అమితాబ్ కాంత్ సోషల్ మీడియా ద్వారా వెల్లడించారు. బిహేవిరియల్ సైన్స్‌లో చేష్టా పరిశోధనలు చేస్తున్నట్టు తెలిపారు. మార్చి 19న జరిగిన ప్రమాదంలో చనిపోయినట్టు పేర్కొన్నారు.

‘నీతి ఆయోగ్‌లో LIFE ప్రోగ్రామ్‌లో చేష్టా కొచ్చర్ నాతో కలిసి పని చేశారు.. ఆ తరవాత బిహేవియరల్ సైన్స్‌లో పీహెచ్‌డీ కోసం లండన్‌ వెళ్లారు.. ఆమె సైక్లింగ్ చేస్తుండగా ఓ ట్రక్ వచ్చి ఢీకొట్టింది. ఈ ప్రమాదంలో ఆమె ప్రాణాలు కోల్పోయారు.. ఆమె తెలివైందే కాదు. చాలా ధైర్యవంతురాలు.. ఇలా హఠాత్తుగా చనిపోవడం బాధాకరం’ అని ఎక్స్‌లో ట్వీట్ చేశారు.

మార్చి 19న ఈ ప్రమాదం చోటుచేసుకోగా.. ఆ సమయానికి చేష్టా భర్త ప్రశాంత్ కాస్త దూరంలో ఉన్నారు. ట్రక్ వచ్చి ఢీకొట్టిన వెంటనే తీవ్ర గాయాలతో ఆమె కిందపడిపోయారు. చేష్టా కొచ్చర్ తండ్రి రిటైర్డ్ లెఫ్ట్‌ జనరల్ ఎస్‌పీ కొచ్చర్‌. లండన్‌లో ఆయనకు కుమార్తె మృతదేహాన్ని పోలీసులు అప్పగించారు. కూతురు మరణ వార్తతో కుంగిపోయిన ఎస్‌సీ కొచ్చర్ లింక్డ్‌ఇన్‌లో ‘నా కుమార్తె మృతదేహాన్ని తీసుకునేందుకు లండన్ వచ్చాను.. మార్చి 19న సైక్లింగ్ చేస్తుండగా ఈ ప్రమాదం జరిగింది.. ఈ మరణ వార్త మమ్మల్నే కాదు తన సన్నిహితులందరినీ కలిచివేసింది’ అని ఆవేదన వ్యక్తం చేశారు.

లండన్ వెళ్లడానికి ముందు చేష్టా కోచ్చర్ గురుగ్రామ్‌లో ఉన్నారు. లండన్ స్కూల్ ఆఫ్ ఎకనామిక్స్‌లో పీహెచ్‌డీలో ప్రవేశానికి అర్హత సాధించడంతో గతేడాది సెప్టెంబరులో యూకే వెళ్లారు. ఢిల్లీ యూనివర్సిటీ, అశోక్ యూనివర్సిటీ, పెన్సుల్వేనియా, చికాగో యూనివర్సిటీల్లో విద్యాభ్యాసం చేశారు.నీతి-ఆాయోగ్ నేషనల్ బిహేవియరల్ ఇన్‌సైట్స్ యూనిట్‌లో అడ్వైజర్‌గా ఆగస్టు 2021 నుంచి 23 వరకూ పనిచేశారు.