శ్రీవారి భక్తులకు అలర్ట్.. శ్రీవారి ఆలయంలో శ్రీరామనవమి ఆస్థానం.. ఆ సేవ బంద్
Andhra Pradesh Telugu | Suryaa Desk | Published : Fri, Mar 29, 2024, 10:36 PM
శ్రీరామనవమి వేడుకలకు తిరుమల ముస్తాబవుతోంది. తిరుమల శ్రీవారి ఆలయంలో ఏప్రిల్ 17న శ్రీరామనవమి పర్వదినం సందర్భంగా శ్రీరామనవమి ఆస్థానం జరుగనుంది. ఈ విషయాన్ని టీటీడీ ఓ ప్రకటనలో తెలిపింది. శ్రీరామనవమి ఆస్థానం సందర్భంగా ఏప్రిల్17వ తేదీ సాయంత్రం శ్రీరాముల‌వారు హనుమంత వాహనంపై మాడవీధులలో ఊరేగి భక్తులను కటాక్షిస్తారు. శ్రీవారి ఆలయంలో ఏప్రిల్ 18న శ్రీరామ పట్టాభిషేకం జరగనుంది.
మరోవైపు శ్రీరామనవమి సందర్భంగా బుధ‌వారం ఉదయం 9 నుంచి11 గంటల వరకు రంగ‌నాయ‌కుల మండ‌పంలో శ్రీ సీతారామ లక్ష్మణ సమేత హనుమంతులవారి ఉత్సవర్లకు స్నపన తిరుమంజనం నిర్వహించనున్నారు. స్నపన తిరుమంజనంలో భాగంగా పాలు, పెరుగు, తేనె, కొబ్బరినీళ్లు, పసుపు, చందనంతో స్వామివారికి అభిషేకం చేస్తారు. సాయంత్రం 6.30 నుంచి రాత్రి 8 గంటల వరకు హనుమంత వాహ‌నసేవ జ‌రుగుతుంది.రాత్రి 9 నుంచి రాత్రి10 గంటల మధ్య బంగారువాకిలి వద్ద శ్రీరామనవమి ఆస్థానాన్ని వేడుకగా నిర్వహిస్తారు.
మరోవైపు శ్రీరామనవమి ఆస్థానం సందర్భంగా శ్రీవారి సహస్త్ర దీపాలంకారసేవ‌ను టీటీడీ ర‌ద్దు చేసింది. ఈ విషయాన్ని భక్తులు గుర్తించాలని టీటీడీ సూచించింది. ఇక శ్రీవారి ఆలయంలో ఏప్రిల్ 18న రాత్రి 8 నుంచి రాత్రి 9 గంటల మధ్య బంగారువాకిలి వద్ద ఆలయ అర్చకులు శ్రీరామ పట్టాభిషేక మహోత్సవం నిర్వహిస్తారు.
|
|