బట్టలషాపులో దొంగతనాలకు పాల్పడుతున్న మహిళలు

ఆరుగురు నుంచి పదిమంది మహిళలు ఒక బృందంగా ఏర్పడి ప్రత్యేక వాహనంలో చేరుకొని గ్రామాల్లోని బట్టలషాపుల్లో బేరసారాలతో వ్యాపారస్తుల కన్నుకప్పి ఖరీదైన చీరలు దోచేస్తున్నారు. పి.గన్నవరం మండలంలోని ముంగండలో గత మూడు నెలల కింద ట ఈ తరహా చోరీ జరిగింది. తాజాగా ఆరుగురు మహిళలు శుక్రవారం ముంగండ వివిధ ప్రాంతాల్లోని స్థానిక బట్టలషాపులో హల్‌చల్‌ చేయడంతో అనుమానంతో స్థానికులు వెంబడించి పట్టుకున్నారు. స్థానికుల కథనం ప్రకారం జనవరి 6న ముంగండలో నరేంద్రపురం రోడ్డులోని బండారు బొటెక్‌ అండ్‌ బ్యాగ్స్‌ షాపులో ఎనిమిది మంది మహిళలు ఒకేసారి చొరబడి షాపు యజమాని కన్నుకప్పి రూ.20 వేల విలువైన బట్టలు దోచుకుపోయారు. 15 నిమిషాల తర్వాత విషయాన్ని గ్రహించిన షాపు యజమాని వారి ఆచూకీ కోసం గాలించినా దొరక లేదు. మళ్లీ శుక్రవారం ఆరుగురు మహిళలు స్థానిక కళాశాల వద్ద ఉన్న శ్రీనివాస టెక్స్‌టైల్స్‌లోకి ప్రవేశించి వ్యాపారి బొడ్డు నాగేశ్వరావును మభ్యపెట్టే ప్రయత్నం చేస్తున్నారు. ఇంతలో అప్పటికే వీరి ప్రవర్తనను గమనించిన స్థానికులు, ఆటోయూనియన్‌ సభ్యులు బట్టలు షాపు వద్దకు చేరుకున్నారు. విషయాన్ని గ్రహించిన మహిళలు అక్కడ నుంచి పారిపోయే ప్రయత్నం చేయగా వెంబడించి పట్టుకున్నారు. అలాగే మహిళలు కూడా ఉన్న ఇద్దరు మగవారు అక్కడ నుంచి జారుకోగా మొత్తం ఎనిమిది మందిని పట్టుకుని పోలీసులకు అప్పగించారు. అయితే వారి వద్ద మందు బిళ్లలు, గోనె సంచులు, రోల్డ్‌గోల్డ్‌ నగలు ఉన్నట్టు స్థానికులు చెప్తున్నారు. ఎస్‌ఐ బి.శివకృష్ణ మాట్లాడుతూ ముంగండలో పట్టుపడ్డ వారంతా విజయవాడ సమీపంలోని జి.కొండూరు మండలమని తెలిపారు. వీరిపై వివిధ చోట్ల పాత చిల్లర దొంగతనం కేసులు ఉన్నాయని, పూర్తిస్థాయిలో విచారణ జరిపి చర్యలు తీసుకుంటామని ఎస్‌ఐ స్పష్టంచేశారు.