మిత్రమా ఇది నీకోసమే.. పెళ్లి కావడం లేదా, ఒక్క ఫోన్ కాల్‌తో అంతా సెట్

కల్యాణం వచ్చినా కక్కు వచ్చిన ఆగదు అంటారు పెద్దలు. ఏ వయసులో జరగాల్సిన ముచ్చట ఆ వయసులోనే జరగాలని చెబుతారు. కొన్నేళ్ల క్రితం బాల్య వివాహాలు జరిగేవి. యువతీయువకులు ఈడుకు రాగానే దగ్గరివాళ్లలో సంబంధం చూసి పెళ్లిళ్లు చేసేవారు. చేసుకునే వాళ్ల ఇష్టాయిష్టాలతో సంబంధం లేకుండా కార్యాలు కానిచ్చేవారు. అయితే రాను రాను ఆ సంస్కృతి మారింది. ఇప్పటి తరం వాళ్లు చదువుకుని.. వాళ్ల కాళ్ల మీద వాళ్లు నిలబడి ఆర్థిక స్వాతంత్య్రం సాధించుకున్న తర్వాతే పెళ్లిళ్లు చేసుకుంటున్నారు. ఈ క్రమంలోనే పెళ్లి వయసు కాస్తా పెరిగిపోతోంది. దీంతో అబ్బాయికి సరైన అమ్మాయి.. అమ్మాయి సరైన అబ్బాయి దొరక్క పెళ్లి వేటలో ఏళ్లకేళ్లు గడిపేస్తూ ఉన్నారు. ఈ నేపథ్యంలోనే వివాహ పరిచయ వేదికలు, మ్యారేజీ బ్యూరోలు రోజురోజుకూ పుట్టగొడుగుల్లాగా పుట్టుకొస్తున్నాయి. ఈ క్రమంలోనే తాజాగా ఓ మ్యారేజీ బ్యూరో ఇచ్చిన ప్రకటన చూసి పెళ్లి కాని యువతీయువకులు చాలా ఆసక్తిగా ఉన్నారు. ఇంతకీ ఆ ప్రకటనలో ఏం ఉందంటే.

మధ్యప్రదేశ్‌లోని భోపాల్‌లో ఓ మ్యారేజీ బ్యూరో ఇచ్చిన ప్రకటన ప్రస్తుతం సోషల్ మీడియాలో తెగ వైరల్ అవుతోంది. ఒకే ఒక్క ఫోన్ కాల్‌తో మీకు సరైన వరుడు, వధువును వెతికిపెడతామని ఆ మ్యారేజీ బ్యూరో ఏకంగా పాంప్లెంట్లు కొట్టించి మరీ తమ వ్యాపారాన్ని విస్తరణ చేస్తోంది. హంసతి సమాజ్ కల్యాణ్ సమితి.. ఈ బంపరాఫర్ ప్రకటించింది. ప్రస్తుతం మ్యాట్రిమోని వెబ్‌సైట్లు కూడా కులం, మతం, ప్రాంతాలుగా వెల్లువెత్తుతున్నాయి. ఈ క్రమంలోనే తాజాగా హంసతి సమాజ్ కల్యాణ్ సమితి ఇచ్చిన ప్రకటన సోషల్ మీడియాలో తెగ వైరల్ అవుతోంది. కేవలం ఒక ఒక ఫోన్ కాల్‌లో జీవిత భాగస్వాములను దొరుకుతుందని హామీ చేసిన ప్రకటన ఇప్పుడు.. పెళ్లి కోసం ఎదురు చూస్తున్న వారికి కొత్త ఆశలు కల్పిస్తుంది.

ఇక ఈ పాంప్లెంట్ సోషల్ మీడియాలో వైరల్ కావడంతో నెటిజన్ల నుంచి భిన్నరకాల స్పందనలు వస్తున్నాయి. కొందరు ఆ ప్రకటన పట్ల సానుకూలంగా కామెంట్లు చేస్తుండగా.. మరికొందరు మాత్రం ఇదంతా ఫేక్ ప్రచారం అని మండిపడుతున్నారు. కులం, మతం, వైవాహిక స్థితితో సంబంధం లేకుండా అందరికీ సేవలు అందించడానికి తమ వ్యక్తులందరికీ సేవ చేయడానికి చేస్తున్నట్లు హంసతి సమాజ్ కల్యాణ్ సమితి స్పష్టం చేసింది. అంతేకాకుండా "మిత్రమా, ఇది నీ కోసమే" అనే క్యాప్షన్‌తో ఈ ప్రకటనను ఇన్‌స్టాగ్రామ్‌లో షేర్ చేసింది.

ఈ ఫోటో వైరల్‌గా మారడంతో బాచిలర్స్ లాటరీని గెలుచుకున్నారు.. వివాహం చేసుకునే అవకాశం కోసం తొందరగా కాల్ చేస్తారు అని ఒక నెటిజన్ కామెంట్ పెట్టారు. ఇక ఇలాంటివి అన్నీ దోపిడి ముఠాలు అని.. పెళ్లి పేరుతో, ఆడపిల్లల పేరుతో కొందరు డబ్బులు దోచుకుంటున్నారని మండిపడ్డారు. ఎవరు కూడా ఇలాంటి ఉచ్చులోకి రాకూడదు అని మరో నెటిజన్ పేర్కొన్నారు. ఇక ఈ హంసతి సమాజ్ కల్యాణ్ సమితి ఇప్పటివరకు ఎన్ని పెళ్లిళ్లు పూర్తి చేసింది.. వారి అడ్రస్ ఎక్కడ.. వారి ఫోన్ నంబర్ చెప్పండి.. అప్పుడు వారి వివరాలు వెరిఫై చేస్తానని ఒక నెటిజన్ పేర్కొన్నాడు. అప్పుడు తాను మాత్రమే కాకుండా తన స్నేహితులను కూడా ఆ మ్యారేజీ బ్యూరోకు తీసుకువస్తానని తెలిపాడు.