ఏపీలో వృద్ధులు, దివ్యాంగులకు అలర్ట్.. సచివాలయంలో పింఛన్ పంపిణీ

ఏపీలో పింఛన్ల పంపిణీపై క్లారిటీ వచ్చింది. వాలంటీర్ల ద్వారా పింఛన్ పంపిణీ వద్దంటూ సీఈసీ ఆదేశాలతో వచ్చే నెల పింఛన్ ఎలా వస్తుందనే సందేహాలు లబ్ధిదారుల్లో వ్యక్తమయ్యాయి. ఈ క్రమంలోనే పింఛన్ల పంపిణీపై ప్రభుత్వం నుంచి స్పష్టత వచ్చింది. సచివాలయాల ద్వారా పింఛన్ల పంపిణీ ఉంటుందని అధికారులు స్పష్టం చేశారు. మూడో తేదీ నుంచి సచివాలయాల ద్వారా పింఛన్లు పంపిణీ చేస్తామని తెలిపారు. ఈ నేపథ్యంలోనే గ్రామీణ పేదరిక నిర్మూలన సంస్థ సెర్ప్ సైతం ఉత్తర్వులు జారీ చేసింది. ఎన్నికల కోడ్ నేపథ్యంలో కోడ్ ముగిసే వరకూ ఇంటింటికీ పింఛన్ల పంపిణీ ఉండదని ఉత్తర్వులు జారీ చేసింది.

ఏపీలో మే 13న ఎన్నికలు జరగనుండగా.. జూన్ నాలుగో తేదీన ఫలితాలు రానున్నాయి. ఫలితాలు వచ్చే వరకూ ఏపీలో ఎన్నికల కోడ్ అమల్లో ఉంటుంది. ఈ నేపథ్యంలో వచ్చే మూడు నెలలు పాటు అంటే ఏప్రిల్, మే, జూన్ నెలల్లో పింఛన్ల పంపిణీ ఇంటి వద్దకే ఉండదు. వచ్చే మూడు నెలలు సచివాలయాల వద్దకు వెళ్లి లబ్దిదారులు పింఛన్లు తీసుకోవాల్సి ఉంటుంది. ఈ క్రమంలోనే సెర్ప్ కీలక ఉత్తర్వులు జారీ చేసింది. గ్రామ, వార్డు సచివాలయ సిబ్బందితోనే సచివాలయాల్లోనే లబ్ధిదారులకు పంపిణీ చేయాలని ఆదేశాలు జారీ చేసింది. అలాగే పింఛను లబ్ధిదారులు ఆధార్‌ లేదా ఇతర గుర్తింపు కార్డు తమ వెంట తీసుకెళ్లాలని సెర్ప్‌ సూచించింది.

ఇక పింఛన్ తీసుకునే లబ్ధిదారులు తమ వెంట పింఛన్ పాస్ బుక్ తీసుకురావద్దని అధికారులు సూచిస్తున్నారు. అందులో సీఎం జగన్ ఫోటో ఉంటుందని.. అది ఎన్నికల కోడ్ విరుద్ధమని చెప్తున్నారు. అలాగే పింఛన్ కోసం వృద్ధులు, దివ్యాంగులు పెద్దసంఖ్యలో సచివాలయం వద్దకు వస్తుంటారు. వేసవి నేపథ్యంలో వారికి ఇబ్బంది కలగకుండా జాగ్రత్తలు తీసుకోవాలని అధికారులు సూచించారు. పింఛన్ అందించే పంచాయతీ కార్యదర్శి లేదా వెల్ఫేర్ అసిస్టెంట్‌లకు ఆథరైజేషన్ లెటర్లు ఇవ్వాలని అధికారులు ఆదేశించినట్లు సమాచారం.