లోక్‌సభ ఎన్నికల కాలం భగ భగే.. 3 నెలలు మండే ఎండలు ఉంటాయన్న ఐఎండీ

దేశంలోని అనేక ప్రాంతాల్లో 3 నెలల పాటు వేడి గాలుల ప్రభావం అధికంగా ఉండే అవకాశం ఉందని భారత వాతావరణ శాఖ-ఐఎండీ వెల్లడించింది. ఏప్రిల్, మే, జూన్ నెలల్లో దేశవ్యాప్తంగా పలు ప్రాంతాల్లో తీవ్ర వేడి గాలులు, వాతావరణం ఉండే అవకాశాలు ఉన్నాయని ఐఎండీ తీవ్ర హెచ్చరికలు జారీ చేసింది. ఇందులో మరీ ముఖ్యంగా సెంట్రల్‌, పశ్చిమ భారతదేశంలో ఈ వేడి గాలుల ప్రభావం మరింత ఎక్కువగా ఉండవచ్చని వాతావరణ శాఖ అంచనా వేసింది. అయితే ప్రస్తుతం దేశంలో సార్వత్రిక ఎన్నికలకు సంబంధించిన షెడ్యూల్ విడుదల అయిన వేళ.. ఐఎండీ ఈ హెచ్చరికలు చేయడంతో పార్టీలు, అభ్యర్థులతోపాటు అటు ఓటర్లు కూడా బెంబేలెత్తుతున్నారు.

దేశంలో అనేక రాష్ట్రాలు, ప్రాంతాల్లో ఏప్రిల్‌ నుంచి జూన్‌ మధ్య 3 నెలల కాలంలో ప్రతీ ఏడాది ఉండే సాధారణ ఉష్ణోగ్రతల కంటే గరిష్ఠ ఉష్ణోగ్రతలు నమోదయ్యే అవకాశం ఉందని ఐఎండీ డైరెక్టర్‌ జనరల్‌ మృత్యుంజయ మోహపాత్ర తాజాగా తెలిపారు. ఈ ఎండా కాలంలో దేశవ్యాప్తంగా మైదాన ప్రాంతాల్లో సాధారణం కంటే ఎక్కువ రోజులు వేడి గాలులు వీచే అవకాశం ఉందని పేర్కొన్నారు. సాధారణంగా 4 నుంచి 8 రోజులు నమోదవుతాయని.. ఈసారి మాత్రం వివిధ ప్రాంతాల్లో కలిపి 10 నుంచి 20 రోజులు వేడిగాలులు వీచే అవకాశం ఉందని తెలిపారు.

 ఏ ఏ రాష్ట్రాల్లో ఈ వేడిగాలుల ప్రభావం ఉంటుందనేది కూడా ఐఎండీ డైరెక్టర్ జనరల్ వివరించారు. ఆంధ్రప్రదేశ్‌తో పాటు గుజరాత్‌, ఉత్తర కర్ణాటక, రాజస్థాన్‌, సెంట్రల్‌ మహారాష్ట్ర, మధ్యప్రదేశ్‌, ఒడిశా, ఉత్తర ఛత్తీస్‌గఢ్‌, మధ్యప్రదేశ్‌ రాష్ట్రాల్లో భారీగా ఉష్ణోగ్రతలు నమోదు అవుతాయని వెల్లడించారు. ఇక ప్రస్తుతం నడుస్తున్న ఏప్రిల్‌ నెలలోనే ఈ అధిక ఉష్ణోగ్రతలు నమోదు కావచ్చని పేర్కొన్నారు. మరీ ముఖ్యంగా మధ్య భారతదేశం, ఉత్తర మైదాన ప్రాంతాలు, దక్షిణాది రాష్ట్రాల్లో వడగాల్పుల ప్రభావం అధికంగా ఉంటుందని చెప్పారు.

సాధారణంగా ప్రతీ సంవత్సరం ఈ ప్రాంతాల్లో 1 నుంచి 3 రోజులు వేడి గాలులు వీస్తాయని.. కానీ ఈసారి మాత్రం 2 నుంచి 8 వీయవచ్చని తెలిపారు. ఆంధ్రప్రదేశ్‌తోపాటు గుజరాత్‌, ఉత్తర కర్ణాటక, మహారాష్ట్ర, పశ్చిమ మధ్యప్రదేశ్‌, ఒడిశా ప్రాంతాల్లో ఈ వేడి గాలుల తీవ్రత అత్యంత ఎక్కువగా ఉండే అవకాశం ఉందని భారత వాతావరణ శాఖ అంచనా వేసింది. దీంతో ప్రస్తుతం దేశంలో లోక్‌సభ వివిధ రాష్ట్రాల అసెంబ్లీలకు జరగనున్న ఎన్నికల్లో ఎండ మోత మోగించనుంది. దీంతో రాజకీయ పార్టీలు, అభ్యర్థులు ప్రచారంలో మునిగిపోతుండగా.. ఆ సభలు, ర్యాలీలు, సమావేశాలకు హాజరయ్యే జనం కూడా తీవ్రమైన ఎండల బారిన పడి అస్వస్థతకు గురయ్యే ప్రమాదం నెలకొంది.