సుప్రీంకోర్టులో కూడా బెయిల్ రాదు.. విపక్షాలకు మోదీ వార్నింగ్

ప్రతిపక్ష కూటమి ఇండియాపై ప్రధాని నరేంద్ర మోదీ మరోసారి విరుచుకుపడ్డారు. తనపై చేస్తున్న దాడులు అవినీతి వ్యతిరేక పోరాటాన్ని ఆపలేవని, అక్రమాలకు పాల్పడిన వాళ్లపై వారి హోదాతో సంబంధం లేకుండా చర్యలు తీసుకుంటామని ప్రధాని ఉద్ఘాటించారు. ఉత్తర్ ప్రదేశ్‌లోని మీరట్‌లో ఆదివారం జరిగిన ఎన్నికల ప్రచారంలో ప్రధాని మోదీ పాల్గొన్నారు. ఈ సందర్భంగా ఆయన మాట్లాడుతూ.. ‘అవినీతికి వ్యతిరేకంగా మోదీ పూర్తి శక్తితో పోరాడుతుంటే ఈ వ్యక్తులు ఇండియా కూటమిని ఏర్పాటు చేశారు.. మోదీని భయపెడతామని వారు భావిస్తున్నారు... కానీ భారతదేశం నా కుటుంబం.. దానిని అవినీతిపరుల నుంచి రక్షించడానికి నేను చర్యలు తీసుకుంటున్నాను’ అని అన్నారు.

ప్రధాని నియంతృత్వ విధానాలు అవలంబిస్తున్నారని ఆరోపిస్తూ ఆప్ అధినేత అరవింద్ కేజ్రీవాల్, జేఎంఎం నేత హేమంత్ సోరెన్‌ల అరెస్ట్‌ను వ్యతిరేకిస్తూ న్యూఢిల్లీలోని రాంలీలా మైదానంలో ఇండియా కూటమి నేతలు చేపట్టిన ర్యాలీపై ప్రధాని మోదీ ఎదురుదాడికి దిగారు. అవినీతికి వ్యతిరేకంగా తాను చర్యలు తీసుకుంటున్నందున కొంతమంది ప్రజలు విస్తుపోతున్నారని మోదీ దుయ్యబట్టారు. ‘నా దేశాన్ని అవినీతిపరుల నుంచి రక్షించడానికి నేను పెద్ద యుద్ధం చేస్తున్నాను.. అందుకే వారు నేడు కటకటాల వెనుక ఉన్నారు.. సుప్రీంకోర్టు నుంచి కూడా బెయిల్ పొందలేరు’ అని పరోక్షంగా కేజ్రీవాల్ అరెస్ట్‌పై ప్రధాని మోదీ వ్యాఖ్యలు చేశారు.

‘ఈ ఎన్నికలు రెండు శిబిరాల మధ్య పోరు.. ఒకవైపు అవినీతి నిర్మూలనకు ఎన్‌డీఏ కట్టుబడి ఉంది.. మరోవైపు అవినీతి నేతలను రక్షించడంపై దృష్టి సారించిన ఇండియా కూటమి.. అవినీతిని తొలగించాలా వద్దా అనేది మీరే నిర్ణయించుకోవాలి... ‘‘అవినీతిపరులు వినాలి.. మోదీపై ఎన్ని దాడులు చేసినా ఇతను మోదీ ఆగడు.. ఎంత పెద్ద అవినీతిపరుడైనా కచ్చితంగా చర్యలు తీసుకుంటాడు.. దోచుకున్న వాడు. దేశానికి తిరిగి ఇవ్వాలి.. ఇది మోదీ హామీ’ అని ప్రధాని అన్నారు.ఇదే సమయంలో 1974లో కచ్చతీవు ద్వీపాన్ని శ్రీలంకకు అప్పటి ఇందిరా గాంధీ ప్రభుత్వం అప్పగించిందని, ప్రతిపక్ష కూటమి దేశ ఐక్యత, సార్వభౌమాధికారాన్ని దెబ్బతీయడానికి ప్రయత్నిస్తోందని ఆరోపించారు.

‘ఈ రోజు కాంగ్రెస్ మరొక భారత వ్యతిరేక విధానం బట్టబయలైంది. భారత్, శ్రీలంక మధ్య ఉన్న కచ్చతీవు ద్వీపం జాతీయ భద్రత కోణం దృష్ట్యా చాలా ముఖ్యమైంది.. స్వాతంత్ర్యం తర్వాత దీనిని కాంగ్రెస్ అప్పగించింది.. అప్పటి కాంగ్రెస్ ప్రభుత్వం చేస్తున్న అకృత్యాలకు భారతదేశం ఇప్పటికీ మూల్యం చెల్లించుకుంటోంది’ అని దుయ్యబట్టారు. 2024 లోక్‌సభ ఎన్నికలు కేవలం ప్రభుత్వాన్ని ఏర్పాటు చేయడానికి మాత్రమే కాకుండా వికసిత్ భారత్‌ను రూపొందించడానికి ఉద్దేశించినవని, రాబోయే ఐదేళ్ల కోసం తమ ప్రభుత్వం రోడ్‌మ్యాప్‌ను సిద్ధం చేస్తోందని ప్రధాని మోదీ అన్నారు.