సమాధి నుంచి లేచొచ్చిన పశుపతిలా!.. చంద్రబాబుపై జగన్ పంచులు

ఎన్నికల ప్రచారంలో సీఎం వైఎస్ జగన్ దూకుడు పెంచారు. మేమంతా సిద్ధం పేరుతో బస్సు యాత్ర చేపట్టిన జగన్.. మంగళవారం అన్నమయ్య జిల్లాలో రోడ్ షో నిర్వహించారు. అనంతరం మదనపల్లెలో జరిగిన బహిరంగసభలో పాల్గొన్నారు. బహిరంగసభలో ప్రసంగించిన జగన్.. టీడీపీ అధినేత చంద్రబాబు నాయుడుపై సెటైర్లు వేశారు. ప్రసంగం మొత్తం పంచులు, ప్రాసలతో చంద్రబాబుపై విరుచుకుపడ్డారు.

ప్రతిపక్షాలపై సూటీ విమర్శలు చేశారు.

ఎన్నికల్లో ఒంటరిగా పోటీచేసే ధైర్యం ప్రతిపక్షాలకు లేదని. అందుకే అధికారం కోసం అందరూ గుంపులుగా, తోడేళ్లుగా జెండాలు జత కట్టి.. అబద్ధాలతో వస్తున్నారని విమర్శించారు. జెండాలు జతకట్టడమే వారి పని అయితే.. ప్రజల గుండెల్లో గుడి కట్టేలా పనిచేయడమే జగన్ పని అని అన్నారు. ఎంతమంది కలిసి వచ్చినా వాళ్లకు తెలియని విషయం ఒకటుందన్న వైఎస్ జగన్.. 99 మార్కులు తెచ్చుకున్న స్టూడెంట్‌ పరీక్షలకు భయపడతాడా అని ప్రశ్నించారు. ఇచ్చిన హామీలలో 99 శాతం అమలు చేశామన్న జగన్..ఇంత మంచి చేసిన వైసీపీ, ఎంతమంది గుంపుగా వచ్చినా భయపడుతుందా అని ప్రశ్నించారు.

2024 ఎన్నికల్లో మోసాలే అలవాటుగా, అబద్ధాలే పునాదులుగా ఏర్పాటైన ఓ జిత్తులమారి పొత్తుల ముఠాతో యుద్ధం చేస్తున్నామంటూ ఎన్డీయే కూటమిపై జగన్ విమర్శలు సంధించారు. అరుంధతి సినిమాలో సమాధి నుంచి లేచివచ్చిన పశుపతిలా అధికారం కోసం చంద్రబాబు ఐదేళ్ల తర్వాత వదల బొమ్మాలీ అంటూ వస్తున్నారని సెటైర్లు వేశారు. పేదల రక్తం పీల్చేందుకు ముఖ్యమంత్రి కుర్చీని చూసి ఈ పసుపుపతి కేకలు పెడుతున్నారంటూ విమర్శించారు.

2014 ఎన్నికల సమయంలో రంగురంగుల మ్యానిఫెస్టో ప్రకటించిన టీడీపీ కూటమి ఎన్ని హామీలు అమలు చేసిందో చెప్పాలని జగన్ ప్రశ్నించారు. ఇప్పుడేమో సూపర్‌ సిక్స్, సూపర్‌ సెవెన్‌ అని మొదలెట్టారంటూ విమర్శించారు. 2014 కంటే ఇప్పుడు ఇంకా ఎక్కువ హామీలిస్తూ మరోసారి మోసం చేసేందుకు వస్తున్నారన్న జగన్.. ప్రజలంతా గమనించాలని సూచించారు. ఇక పింఛన్ల పంపిణిపైనా జగన్ కీలక వ్యాఖ్యలు చేశారు. తన మనుషుల చేత ఎన్నికల కమిషన్‌కు ఫిర్యాదు చేయించి.. పింఛన్లు అపించారని ఆరోపించారు. నిమ్మగడ్డ రమేష్‌ చేత ఫిర్యాదు చేయించి పింఛన్లు ఒకటో తేదీ రాకుండా చంద్రబాబు ఆపించారని జగన్ ఆరోపించారు. పింఛన్ సొమ్ము ప్రతి నెలా ఇంటి వద్దకే రావాలన్నా , సంక్షేమ పథకాల లబ్ధి వాలంటీర్ల ద్వారా ఇంటివద్దకే అందాలన్నా వచ్చే ఎన్నికల్లో ఫ్యాన్ పార్టీకి రెండు బటన్లు నొక్కి గెలిపించాలని జగన్ కోరారు.