దంచికొడుతున్న ఎండలు.. ఏపీ ప్రభుత్వ కీలక నిర్ణయం.. బడుల్లో ఇక రోజూ మూడుసార్లు..

ఏపీలో ఎండ వేడిమి దంచికొడుతోంది. సూర్యుడి ప్రతాపానికి మధ్యాహ్నం వేళ బయటకు రావాలంటేనే జనం భయపడిపోతున్నారు. రికార్టు స్థాయిలో నమోదవుతున్న ఉష్ణో్గ్రతలు, వేడిగాలులతో ఏపీవాసులు ఉక్కిరిబిక్కిరి అవుతున్నారు. ఈ క్రమంలోనే ఏపీ విద్యాశాఖ కీలక నిర్ణయం తీసుకుంది. ఏపీలో ప్రస్తుతం ఒంటి పూట బడులు జరుగుతున్నాయి. ఏప్రిల్ 23 వరకూ పాఠశాలలు కొనసాగనున్నాయి. ఆ తర్వాత వేసవి సెలవులు మొదలు కానున్నాయి. అయితే స్కూలుకు వచ్చే చిన్నారులు డీహైడ్రేషన్‌కు గురి కాకుండా ఉండేందుకు ఏపీ ప్రభుత్వం కీలక నిర్ణయం తీసుకుంది.

ఎండల తీవ్రత రోజురోజుకూ పెరుగుతున్న నేపథ్యంలో ఏపీలోని అన్ని ప్రభుత్వ పాఠశాలల్లో వాటర్ బెల్స్ మోగించాలని ఏపీ విద్యాశాఖ నిర్ణయం తీసుకుంది. విద్యార్థులు డీహైడ్రేషన్‌కు గురికాకుండా ఉండేందుకు రోజులో మూడు సార్లు బెల్స్‌ మోగించాలని ఈ మేరకు అన్ని పాఠశాలలకు విద్యాశాఖ కమిషనర్‌ ఆదేశాలు జారీ చేశారు. ఉదయం 8.45, 10.50, 11.50 నిమిషాలకు మూడు సార్లు గంట కొట్టాలని అన్ని సర్కారీ స్కూళ్లను ఆదేశించారు. ఈ మూడు సార్లు ఐదు నిమిషాల చొప్పున మంచి నీళ్లు తాగేందుకు విద్యార్థులకు బ్రేక్ ఇవ్వనున్నారు. అయితే 2019లో కేరళలో తొలిసారిగా కొన్ని పాఠశాలల్లో ఈ వాటర్ బెల్స్ విధానాన్ని ప్రారంభించారు.

కేరళలో మంచి స్పందన రావటంతో మిగతా రాష్ట్రాలలో అమలు చేస్తూ వస్తున్నారు. ఎండల తీవ్రత పెరిగిన నేపథ్యంలో తాజాగా ఏపీ సర్కారు కూడా ఇదే నిర్ణయం తీసుకుంది. లంచ్ బ్రేక్ మాదిరిగా ఇక ఏపీ పాఠశాలల్లో వాటర్ బ్రేక్స్ కూడా ఇవ్వనున్నారు. విద్యార్థులు డీహైడ్రేషన్‌కు గురికాకుండా విద్యాశాఖ తీసుకున్న ఈ నిర్ణయాన్ని విద్యార్థులు తల్లిదండ్రులు అభినందిస్తున్నారు.

మరోవైపు ఏపీలో బుధవారం 10 మండలాల్లో వడగాడ్పులు వీచే అవకాశం ఉందని వాతావరణశాఖ తెలిపింది. ప్రజలంతా జాగ్రత్తలు తీసుకుంటూ అప్రమత్తంగా ఉండాలని సూచించింది. మరోవైపు నీరు ఎక్కువగా తీసుకుంటూ నీటి శాతం ఉన్న పదార్థాలను ఆహారంలో చేర్చుకోవాలని వైద్యులు సూచిస్తున్నారు. వృద్ధులు, చిన్నారులు సాధ్యమైనంతవరకు బయటకు రాకుండా ఉంటే మంచిదని చెబుతున్నారు.