అమెరికాలో విషాదం.. రెండ్రోజుల వ్యవధిలో తెలుగు మహిళ, ఆరేళ్ల కుమార్తె మృతి
Andhra Pradesh Telugu | Suryaa Desk | Published : Tue, Apr 02, 2024, 10:41 PM
అమెరికాలో తెలుగు మహిళ ప్రాణాలు కోల్పోయింది. పోర్టుల్యాండ్‌ ప్రాంతంలో ఆదివారం తెల్లవారుజామున జరిగిన రోడ్డు ప్రమాదంలో తీవ్రంగా గాయపడి ఆస్పత్రిలో చికిత్స పొందుతున్న కొణకంచికి చెందిన కమతం గీతాంజలి చనిపోయినట్లు కుటుంబ సభ్యులు తెలిపారు. కుటుంబ సభ్యులు కారులో ప్రయాణిస్తుండగా జరిగిన ప్రమాదంలో గీతాంజలి కుమార్తె హానిక అక్కడికక్కడే మృతి చెందిన సంగతి తెలిసిందే.
ఈ ప్రమాదంలో తీవ్రంగా గాయపడిన గీతాంజలిని ఆస్పత్రిలో చేర్పించి చికిత్స అందిస్తుండగా సోమవారం మృతి చెందారు. ఈ ఘటనలో భర్త నరేష్, కుమారుడు బ్రమణ్‌కు గాయాలవగా ఆస్పత్రిలో చికిత్స పొందుతున్నారు. ఈ ప్రమాదంలో తల్లీ, కుమార్తెల మృతితో వారి బంధువుల కుటుంబాల్లో విషాదం అలముకుంది. వారి మృతదేహాలను స్వగ్రామం కొణకంచికి తీసుకు వచ్చేందుకు ఏర్పాట్లు చేస్తున్నట్లు బంధువులు తెలిపారు.
హానికపుట్టినరోజును జరుపుకోవడానికి, కుటుంబం వారి కారులో ఆలయాన్ని సందర్శించడానికి బయలుదేరింది. మార్గ మధ్యలో కారు పోర్ట్‌ల్యాండ్ ప్రాంతంలో ప్రమాదానికి గురైంది. నరేష్, గీతాంజలి దంపతులు పదేళ్లుగా అమెరికాలోనే ఉంటూ సాఫ్ట్‌వేర్ ఇంజినీర్లుగా పనిచేస్తున్నారు. ఈ ఘటనకు సంబంధించిన పూర్తి వివరాలు తెలియాల్సి ఉంది.
|
|