పింఛన్ల కోసం వృద్ధుల అగచాట్లు.. జనసైనికులకు పవన్ స్పెషల్ రిక్వెస్ట్

ఏపీలో పింఛన్ల కోసం వృద్ధులు అవస్థలు పడుతున్నారు. సచివాలయాల వద్దకు వెళ్లి ఇబ్బందులు పడుతున్నారు. ఎండకు తాళలేక పండుటాకులు విలవిలలాడిపోతున్నాయి. ఈ నేపథ్యంలో జనసేన అధినేత పవన్ కళ్యాణ్ తన అభిమానులకు, జనసైనికులకు కీలక సూచనలు చేశారు. పింఛన్లు తీసుకోవాల్సిన వృద్ధులు, దివ్యాంగులకు జనసేన నేతలు, జనసేన కారకర్తలు సహాయం అందించాలని సూచించారు. పింఛన్ ఇప్పించి ఇంటివద్ద దిగబెట్టాలని విజ్ఞప్తి చేశారు. ఈ మేరకు పవన్ కళ్యాణ్ ఎక్స్ ఖాతాలో ట్వీట్ చేశారు.

"జనసేన నాయకులు, జన సైనికులకు నా విజ్ఞప్తి.. పింఛన్లు తీసుకోవాల్సిన వృద్ధులకు, దివ్యాంగులకు తోడుగా ఉండండి. పింఛన్ ఇచ్చే కార్యాలయానికి మీ వాహనంపై జాగ్రత్తగా తీసుకువెళ్ళండి. పింఛన్ ఇప్పించండి. ఆ తరవాత ఇంటి దగ్గర దించి రాగలరు. సామాజిక బాధ్యతగా మీరంతా పింఛన్లు తీసుకొనేవారికి సహాయం అందించగలరు.జనసేన శ్రేణులతోపాటు కూటమిలో భాగమైన టిడిపి, బీజేపీ కార్యకర్తలు, నాయకులు ఈ కార్యక్రమంలో పాలుపంచుకోవాలని కోరుతున్నాను." అంటూ పవన్ విజ్ఞప్తి చేశారు.

ఈ క్రమంలోనే ప్రభుత్వ తీరుపైనా పవన్ కళ్యాణ్ విమర్శలు గుప్పించారు. ఇళ్ల వద్దే పించన్ అందించేందుకు ఉన్న ఇబ్బంది ఏంటి అంటూ ప్రభుత్వ ప్రధాన కార్యదర్శిని ప్రశ్నించారు. దీనిపై మరో ట్వీట్ చేశారు పవన్ కళ్యాణ్. తన సినిమా రిలీజ్ రోజున థియేటర్ వద్ద ఉద్యోగులకు డ్యూటీలు వేసే ప్రభుత్వం.. ఇప్పుడేం చేస్తోందని ప్రశ్నించారు .గతంలో సినిమా థియేటర్స్‌ వద్ద రెవెన్యూ అధికారులకు విధులు అప్పగిస్తూ జారీ చేసిన ఉత్తర్వులను ఇందుకు జతచేశారు.

" ఆంధ్రప్రదేశ్ చీఫ్ సెక్రెటరీ గారూ... వృద్ధులు, దివ్యాంగులు, వితంతువులకు ఇళ్ళ దగ్గర పింఛను అందించడానికి ఉన్న ఇబ్బంది ఏమిటి? పవన్ కళ్యాణ్ సినిమా రిలీజ్ అయితే థియేటర్స్ దగ్గర రెవెన్యూ ఉద్యోగులకి డ్యూటీలు వేస్తారు.. తహశీల్దార్ నంబర్స్ ఇస్తారు. మరి పింఛన్లు ఇవ్వడానికి ఉద్యోగులు లేరా? కరోనా కాలంలో మద్యం షాపుల దగ్గర ఉద్యోగులకి డ్యూటీ వేసిన ఘనత రాష్ట్ర ప్రభుత్వానికి ఉంది. గ్రామ, వార్డు సచివాలయ ఉద్యోగులు, గ్రామ రెవెన్యూ యంత్రాంగం ద్వారా పెన్షన్లు ఇళ్ళ దగ్గర ఇవ్వొచ్చు. వైసీపీ నాయకులు చేసే మెలో డ్రామాలకీ, బ్లేమ్ గేమ్స్ కీ ప్రభుత్వ నిర్ణయాలు బలం ఇస్తున్నాయి." అంటూ పవన్ ట్వీట్ చేశారు.