ఏపీ ప్రజలకు చల్లని కబురు.. ఆ రెండ్రోజులు వర్షాలు, ఆ తర్వాత ఎండలు

ఆంధ్రప్రదేశ్‌లో ఎండలు మండిపోతున్నాయి. రాష్ట్రం నిప్పుల కొలిమిలిని తలపిస్తోంది.. ఎండలకు తోడు వడగాలులు వీస్తున్నాయి. గురువారం 21 మండలాల్లో తీవ్ర వడగాలులు, 97 మండలాల్లో వడగాలులు వీచాయి. 18 జిల్లాల్లో 40 డిగ్రీలకు పైగా ఉష్ణోగ్రతలు నమోదయ్యాయి. రాష్ట్రంలో అత్యధికంగా నంద్యాల జిల్లా చాగలమర్రిలో 44.1 డిగ్రీలు, కడప‌ జిల్లా చిన్నచెప్పల్లిలో 43.9, కర్నూలు జిల్లా లద్దగిరిలో 43.8, ప్రకాశం జిల్లా దరిమడుగులో 43.6, అనంతపురం జిల్లా తెరన్నపల్లిలో 43.5, నెల్లూరు జిల్లాలోని మనుబోలు, తిరుపతి జిల్లా చియ్యవరంలో 43.2 డిగ్రీల ఉష్ణోగ్రతలు నమోదయ్యాయి. ఏప్రిల్‌ నుంచి జూన్‌ వరకు రాష్ట్రంలో అధిక ఉష్ణోగ్రతలు నమోదవుతాయని, వడగాలులు ఎక్కువ వీచే అవకాశముందని విపత్తుల నిర్వహణ సంస్థ హెచ్చరించింది.

ఉత్తర కోస్తా, రాయలసీమలోని కొన్ని ప్రాంతాల్లో సోమ, మంగళవారాల్లో తేలికపాటి నుంచి మోస్తరు వర్షాలు కురిసే అవకాశముందని అమరావతి వాతావరణ కేంద్రం ప్రకటించింది. నైరుతి దిశగా వీస్తున్న పొడిగాలుల కారణంగా రాబోయే రోజుల్లో రాయలసీమ, దక్షిణ కోస్తా జిల్లాల్లో చాలా చోట్ల గరిష్ఠ ఉష్ణోగ్రతలు 40 డిగ్రీల కంటే అధికంగా నమోదవుతాయి. కనిష్ఠ ఉష్ణోగ్రతలు సైతం 2-3 డిగ్రీలు పెరిగి.. 26-27 డిగ్రీలుగా నమోదవుతాయి అని సూచించింది.

రాష్ట్ర విపత్తుల నిర్వహణ సంస్థ అంచనాల ప్రకారం శుక్ర, శనివారాల్లో రాయలసీమలోని కడప, నంద్యాల, కర్నూలు, అనంతపురం జిల్లాల్లో గరిష్టంగా 41 నుంచి 43 డిగ్రీలు, దక్షిణ కోస్తాలోని పల్నాడు, ఎన్టీఆర్‌ జిల్లాల్లో 41నుంచి 44, ఉత్తర కోస్తాలోని శ్రీకాకుళం, విజయనగరం, పార్వతీపురం మన్యం, కాకినాడ, తూర్పు గోదావరి జిల్లాల్లో 41నుంచి 45 డిగ్రీలకు పైగా గరిష్ట ఉష్ణోగ్రతలు నమోదయ్యే అవకాశాలున్నాయి. శుక్రవారం రాష్ట్రంలోని 109 మండలాల్లో తీవ్ర వడగాడ్పులు, 206 మండలాల్లో వడగాడ్పులు, శనివారం 115 మండలాల్లో తీవ్ర వడగాడ్పులు, 245 మండలాల్లో వడగాడ్పులు వీయనున్నాయి. ప్రస్తుత పరిస్థితుల్లో కోస్తాంధ్ర, రాయలసీమల్లో రానున్న మూడు రోజులు వేడి, తేమతో కూడిన అసౌకర్య వాతావరణం నెలకొంటుందని భారత వాతావరణ విభాగం (ఐఎండీ) తెలిపింది.