రూ.2.9 లక్షల కోట్లతో ప్రపంచంలోనే అతిపెద్ద ఎయిర్పోర్ట్.. ఏకంగా 400 గేట్లు ఏర్పాటు
international | Suryaa Desk | Published : Mon, Apr 29, 2024, 10:27 PM
ప్రపంచంలోనే అతిపెద్ద విమానాశ్రయం నిర్మాణానికి దుబాయ్ ప్రణాళిక రచించింది. ప్రస్తుతం ప్రపంచంలోనే అత్యంత రద్దీ విమానాశ్రయాల్లో ఒకటైన అంతర్జాతీయ విమానాశ్రయాన్ని విస్తరించేందుకు ఏర్పాట్లు చేస్తోంది. ఇందులో భాగంగా అభివృద్ధి దశలో ఉన్న ‘దుబాయ్ వరల్డ్ సెంట్రల్’లోని అల్ మక్తూమ్ ఇంటర్నేషనల్ ఎయిర్పోర్టులో 35 బిలియన్ డాలర్ల (రూ.2.9లక్షల కోట్లు)తో కొత్త టెర్మినల్ నిర్మించనుంది. దీంతో ప్రస్తుత విమానాశ్రయం ఐదు రెట్లు మేర పెరగనుంది. వచ్చే పదేళ్లలో కార్యకలాపాలను అక్కడ నుంచే సాగేలా ప్రణాళికలు సిద్ధం చేస్తున్నట్లు దుబాయ్ పాలకుడు షేక్ మొహమ్మద్ బిన్ రషీద్ అల్ మక్తూమ్ ఆదివారం ప్రకటించారు. ఇది అందుబాటులోకి వస్తే ప్రపంచంలోనే అతిపెద్ద ఎయిర్పోర్టుగా నిలవనుందని ఆయన తెలిపారు
కొత్తగా నిర్మించనున్న టెర్మినల్ను అల్ మక్తూమ్ ఇంటర్నేషనల్ ఎయిర్పోర్టుగా పిలుస్తారు. దుబాయ్లో ప్రపంచ ఎయిర్పోర్టు, పోర్టు, అర్బన్ హబ్, న్యూ గ్లోబల్ సెంటర్ త్వరలోనే అందుబాటులోకి రానున్నాయని షేక్ మొహమ్మద్ బిన్ పేర్కొన్నారు. తదుపరి కార్యకలాపాలు అక్కడనుంచే సాగుతాయని, భవిష్యత్తు తరాల కోసం ఈ కొత్త ప్రాజెక్టును చేపడుతున్నామని దుబాయ్ పాలకుడు ఆదివారం విడుదల చేసిన వీడియో ప్రకటనలో వెల్లడించారు. ఏడాదికి 26 కోట్ల మంది ప్రయాణికులు రాకపోకలు సాగించేలా ఈ ఎయిర్పోర్టును అభివృద్ధి చేస్తున్నట్టు ఆయన చెప్పారు.
ప్రస్తుతం ఉన్న ఎయిర్పోర్టు విస్తీర్ణంతో పోలిస్తే ఐదు రెట్లు పెద్దదని, ఇప్పుడు కేవలం రెండు రన్వేలు మాత్రమే ఉన్నాయని తెలిపారు. మొత్తం 400 ఎయిర్క్రాఫ్ట్ గేట్లు, ఐదు సమాంతర రన్వేలతో సరికొత్త సాంకేతికతను వినియోగించనున్నామని వివరించారు.దక్షిణ దుబాయ్లో ప్రతిష్ఠాత్మకంగా చేపడుతోన్న ఈ ఎయిర్పోర్టు చుట్టూ నగరం నిర్మాణం కాబోతోందని పేర్కొన్నారు. లక్షలాది మంది నివాసం ఉండే అవకాశం ఉండడంతో ఇక్కడ హౌసింగ్కు భారీ డిమాండ్ ఏర్పడనుంది. లాజిస్టిక్, ఎయిర్పోర్టు రంగంలో అతిపెద్ద సంస్థలకు ఇది కేంద్రంగా మారనుంది. కొత్తగా నిర్మించనున్న ఈ టెర్మినల్ ఖరీదు రూ.2.9లక్షల కోట్లు (34.86 బిలియన్ డాలర్లు) అంచనా వేస్తున్నారు.
|
|