మద్దెలచెరువు సూరి హత్య కేసులో సంచలనం.. భాను కిరణ్‌కు యావజ్జీవ శిక్ష

అనంతపురానికి చెందిన మద్దెలచెరువు సూరి (గంగుల సూర్యనారాయణరెడ్డి) హత్య కేసులో నిందితుడు భాను కిరణ్‌‌కు తెలంగాణ హైకోర్టులో ఎదురు దెబ్బ తగిలింది. గతంలో కింది కోర్టు విధించిన యావజ్జీవ శిక్షను ఖరారు చేస్తూ హైకోర్టు తీర్పు వెల్లడించింది. పరిటాల రవి హత్య కేసులో సూరి నిందితుడిగా ఉన్న సంగతి తెలిసిందే. సూరి 2011 జనవరిలో దారుణంగా హత్యకు గురయ్యారు. ఈ కేసులో ప్రధాన నిందితుడైన భానుకు యావజ్జీవ శిక్ష విధిస్తూ 2018 డిసెంబరులో కింది కోర్టు తీర్పు వెలువరించింది. ఈ తీర్పును భాను తెలంగాణ హైకోర్టులో అప్పీల్ చేసిన సంగతి తెలిసిందే.

ఈ పిటిషన్‌పై జస్టిస్‌ కె.లక్ష్మణ్‌, జస్టిస్‌ పి.శ్రీసుధలతో కూడిన ధర్మాసనం విచారణ జరపగా.. పిటిషనర్‌కు వ్యతిరేకంగా ఎలాంటి ఆధారాలు, సాక్ష్యాలు లేవని భాను తరఫు లాయర్ వాదనలు వినిపించారు. ఇద్దరు వ్యక్తులు ఇచ్చిన సాక్ష్యం ఆధారంగానే కింది కోర్టు జైలు శిక్ష విధించింది అన్నారు. సాక్ష్యం ఇచ్చిన ఇద్దరూ అనుమానితులేనన్న విషయాన్ని కింది న్యాయస్థానం పరిగణనలోకి తీసుకోలేదని కోర్టుకు వివరించారు. పిటిషనర్‌ రివాల్వర్‌, పిస్టల్‌ వినియోగించినట్లు కూడా నిరూపించలేదని కోర్టులో ప్రస్తావించారు. కోర్టు కేవలం భాను పరారీ అన్న విషయాన్నే పరిగణనలోకి తీసుకుందని.. గతంలో సుప్రీం కోర్టు వెలువరించిన పలు తీర్పులను కోర్టులో భాను తరఫు లాయర్ ప్రస్తావించారు. సాక్షులు కూడా పరస్పర విరుద్ధమైన వాంగ్మూలాలు ఇచ్చారన్నారు. భాను పథకం ప్రకారం మద్దెలచెరువు సూరిని హత్య చేశారని పబ్లిక్‌ ప్రాసిక్యూటర్‌ పల్లె నాగేశ్వరరావు వాదించారు. హత్య జరిగిన రోజున సూరితోపాటు భాను కిరణ్ కారులో ప్రయాణిస్తున్నారని కోర్టుకు తెలిపారు. సూరిని వెనుక నుంచి భాను కాల్చి చంపారని.. ఈ హత్య తరువాత మధ్యప్రదేశ్‌ పారిపోయారని కోర్టుకు వివరించారు. పబ్లిక్‌ ప్రాసిక్యూటర్‌ వాదనతో ఏకీభవించిన ధర్మాసనం భాను అప్పీలును కొట్టివేస్తూ తీర్పును వెల్లడించింది. దీంతో భానుకు యావజ్జీవ కారాగా శిక్ష ఖాయమైంది.

భాను కిరణ్ మద్దెల చెరువు సూరి అనుచరుడిగా ఉన్నాడు. హైదరాబాద్‌లోని సనత్‌నగర్‌ నవోదయ కాలనీలో 2011 జనవరి 4వ తేదీన సూరిని భానుకిరణ్ కాల్చి చంపాడని అభియోగాలు వచ్చాయి. ఈ కేసులో భాను కిరణ్‌ను అరెస్ట్ చేయగా.. నాంపల్లి కోర్టు విచారణ జరిపి 2018 డిసెంబర్‌లో భానుకిరణ్‌కు జీవితఖైదు ఖరారు చేసింది. నాపంల్లి కోర్టు విధించిన జీవితఖైదును భాను తెలంగాణ హైకోర్టులో అప్పీల్ చేశాడు. అయితే విచారణ ఆలస్యం జరుగుతోందని.. తాను జైల్లోనే మగ్గుతున్నానని భాను బెయిల్ ఇవ్వాలని కోరాడు. ఇలా వాదనలన్నీ ముగియడంతో తెలంగాణ హైకోర్టు కూడా నాంపల్లి కోర్టు జీవితఖైదు విధించడాన్ని సమర్థించింది.