మీకు ఓటర్ స్లిప్ ఇవ్వలేదా..? ఇదిగో ఇలా డౌన్‌లౌడ్ చేసుకోండి

ఆంధ్రప్రదేశ్‌లో అసెంబ్లీ ఎన్నికలతోపాటు నాలుగో దశ లోక్ సభ ఎన్నికలకు మరికొద్ది సమయమే మిగిలి ఉంది. ఓవైపు అధికార వైఎస్సార్ కాంగ్రెస్ పార్టీ.. మరోవైపు టీడీపీ బీజేపీ జనసేన కూటమి ఈ ఎన్నికల్లో తమ అదృష్టాన్ని పరీక్షించుకోబోతున్నాయి. రాష్ట్ర భవితను మలుపు తిప్పే ఈ ఎన్నికల్లో ఎవరు గెలుస్తారనేది ఆసక్తికరంగా మారింది. ఓటర్లంతా తమ ఓటు హక్కు వినియోగించుకోవాలని పార్టీలు, ఎన్నికల సంఘం పిలుపునిస్తున్నాయి.

ఎన్నికల్లో ఓటేయడానికి వెళ్లేటప్పుడు ఓటర్లు తమ వెంట ఓటర్ గుర్తింపు కార్డుతోపాటు ఓటర్ ఇన్ఫర్మేషన్ స్లిప్‌లను సైతం పోలింగ్ బూత్‌కు తీసుకెళ్లాలి. ఎలక్షన్ కమిషన్ పంపిణీ చేసే ఓటర్ స్లిప్‌ మీద సదరు ఓటరు పేరు, వయసు, అసెంబ్లీ నియోజకవర్గం, పోలింగ్ స్టేషన్ ఉన్న ప్రదేశం, పోలింగ్ తేదీ తదితర వివరాలు ఉంటాయి. ఇప్పటికే అధికారులు ఇంటింటికి తిరిగి ఓటర్ ఇన్ఫర్మేషన్ స్లిప్‌లను పంపిణీ చేశారు. ఎవరికైనా ఓటర్ స్లిప్‌లు రాకపోతే ఆన్‌లైన్ ద్వారానూ డౌన్‌లోడ్ చేసుకోవచ్చు. అదెలాగో ఇప్పుడు చూద్దాం..

ఓటర్ ఇన్ఫర్మేషన్ స్లిప్ డౌన్‌లోడ్ చేసుకోవడం కోసం.. ముందుగా voters.eci.gov.in వెబ్‌సైట్‌ ఓపెన్ చేయండి. ఆ తర్వాత మీ ఫోన్ నంబర్ లేదా ఎపిక్ నంబర్ పాస్‌వర్డ్, క్యాప్‌చా కోడ్ ఎంటర్ చేసి సైట్‌లోకి లాగిన్ అవ్వండి. ఈ సైట్లో వెళ్లడం ఇదే తొలిసారి అయితే.. Signup ఆప్షన్ క్లిక్ చేసి మీ వివరాలు నమోదు చేయండి.

ఒకసారి సైట్లోకి లాగిన్ అయిన తర్వాత కుడి వైపు సర్వీసెస్ అనే విభాగం ఉంటుంది. అందులో ఈ-ఎపిక్ డౌన్‌లోడ్ అనే ఆప్షన్ క్లిక్ చేయండి. ఆ తర్వాత మీ ఎపిక్ నంబర్ లేదా రిఫరెన్స్ నంబర్‌తోపాటు మీ రాష్ట్రం పేరు ఎంటర్ చేసి సెర్చ్ ఆప్షన్ మీద క్లిక్ చేయండి. వెంటనే మీ ఎపిక్ నంబర్‌తోపాటు మీ పేరు, మీ తండ్రి పేరు, రాష్ట్రం, అసెంబ్లీ నియోజకవర్గం లాంటి వివరాలు కనిపిస్తాయి. కాస్త కిందకెళ్లాక.. సెండ్ ఓటీపీ అనే ఆప్షన్ మీద క్లిక్ చేసి, మీ ఫోన్ నంబర్‌కు వచ్చిన ఓటీపీని ఎంటర్ చేసి వెరిఫై చేయాలి. ఆ తర్వాత డౌన్‌లోడ్ ఈ-ఎపిక్ అనే ఆప్షన్ మీద క్లిక్ చేస్తే.. మీ ఈ-ఎపిక్ కార్డుతోపాటు.. ఓటర్ ఇన్ఫర్మేషన్ స్లిప్ కూడా డౌన్‌లోడ్ అవుతుంది. దాన్ని ప్రింట్ తీసుకుంటే సరిపోతుంది. మీ దగ్గర ఫోన్ మాత్రమే ఉంటే.. ఓటర్ హెల్ప్ లైన్ యాప్ డౌన్ లోడ్ చేసుకొని.. రిజిస్ట్రేషన్ చేసుకున్న తర్వాత.. ఈ-ఎపిక్ ఆప్షన్ మీద క్లిక్ చేయడం ద్వారా కూడా ఓటర్ స్లిప్ పొందొచ్చు.

ఓటర్ ఐడీ లేకున్నా ఇవి ఉంటే చాలు..

ఓటేయడానికి వెళ్లేటప్పు మీ దగ్గర ఓటర్ స్లిప్ ఉండి.. ఓటర్ ఐడీ లేకపోయినా ఫర్వాలేదు. ఓటర్ ఐడీకి ప్రత్యామ్నాయంగా ఆధార్ కార్డును చూపించొచ్చు. ఒక్క ఆధార్ మాత్రమే కాదు.. వంద రోజుల పనికి వాడే ఎంఎన్‌ఆర్‌జీఏ జాబ్‌కార్డు, పోస్టాఫీసు లేదా బ్యాంకు పాస్ బుక్ కూడా ఓటేసేటప్పుడు చూపించొచ్చు. అయితే పాస్ బుక్ మీద మీ ఫొటో ఉండాలి. డ్రైవింగ్ లైసెన్స్, పాన్ కార్డ్, పాస్ పోర్ట్, మీ ఫొటో ఉన్న ఫించన్ డాక్యుమెంట్, కేంద్ర లేదా రాష్ట్ర ప్రభుత్వాలు ఇచ్చే జాబ్ కార్డ్, దివ్యాంగుల ఐడీ కార్డ్; ఎమ్మెల్యే/ఎంపీ/ఎమ్మెల్సీలు జారీ చేసిన అధికార గుర్తింపు పత్రం, కార్మిక శాఖ జారీ చేసే హెల్త్ ఇన్సూరెన్స్ స్టార్ కార్డులలో ఏదో ఒకదాన్ని తీసుకెళ్లి ఓటేయొచ్చు.