దేశంలో తొలి హైటెక్ బిచ్చగాడు.. గుండెపోటుతో మృతి

దేశంలోనే తొలి డిజిటల్‌ బిచ్చగాడుగా సోషల్ మీడియాలో గుర్తింపు పొందిన రాజు బికారీ అనే గుండెపోటుతో మృతిచెందాడు. దీంతో ఆయన గురించి ఆన్‌లైన్ నెటిజన్లు తెగ వెతికేస్తున్నారు. సాధారణంగా గుడి మెట్లపై లేదా బస్టాండ్లు, రైల్వే స్టేషన్లు, రోడ్లు, వీధుల్లో యాచకులు చిల్లర అడుగుతుంటారు. కానీ బిహార్‌లోని బెట్టియా రైల్వే స్టేషన్‌లో బిక్షాటన చేసుకునే రాజు బికారీ రూటే సెపరేటు. హైటెక్ బెగ్గర్‌గా పిలుచుకునే ఆయన.. దేశంలోనే తొలి డిజిటల్ యాచకుడిగా ప్రత్యేకత సంపాదించడం గమనార్హం.

చేతిలో ట్యాబ్‌తో గూగుల్‌పే, ఫోన్‌పే, పేటీఎం క్యూర్‌ కోడ్‌ల ట్యాగ్‌లను మెడలో వేసుకుని రైల్వే స్టేషన్‌లో యాచించే రాజును చూసి ప్రయాణికులు ఆశ్చర్యపోయేవారు. అతడి మెడలోని క్యూఆర్ కోడ్ స్కానర్లను స్కాన్ చేసి తమక నచ్చినంత ఇచ్చేవారు. ప్రధాని నరేంద్ర మోదీ పిలుపునిచ్చిన డిజిటల్‌ ఇండియా స్ఫూర్తితోనే తాను ఇలా చేస్తున్నట్టు ఈ డిజిటల్ బిచ్చగాడు పలు సందర్భాల్లో చెప్పుకున్నాడు.

దేశంలో డిజిటల్‌ లావాదేవీలు అందుబాటులోకి రాక ముందు నుంచి రాజు భిక్షాటన చేస్తున్నాడు. దాదాపు 32 ఏళ్లుగా భిక్షాటనే ఆయనకు జీవనోపాధి. మోదీని ఎంతగానో అభిమానించే ఈ బిచ్చగాడు.. ప్రధాని ‘మన్‌ కి బాత్‌’ కార్యక్రమాన్ని క్రమం తప్పకుండా వినేవాడట. గతంలో ఆర్జేడీ అధినేత లాలూ ప్రసాద్‌ యాదవ్‌‌ను తన తండ్రి అంటూ చెప్పుకుంటూ తిరిగేవాడు. లాలూ రైల్వే మంత్రిగా ఉన్నప్పుడు ఆయనకు బెట్టియా రైల్వే స్టేషన్‌ క్యాంటీన్‌ నుంచే రోజూ ఆహారం లభించేంది.

అయితే, కొద్ది రోజులుగా మతిస్థిమితం కోల్పోయినట్టు ప్రవర్తిస్తోన్న రాజు ఇటీవలే అనారోగ్యానికి గురయ్యాడు. ఈ క్రమంలో గురువారం బెట్టియా రైల్వే స్టేషన్‌లో క్యూఆర్‌ కోడ్‌లు చూపిస్తూ యాచిస్తుండగానే గుండెపోటుతో కుప్పకూలిపోయాడు. అతడ్ని ఆస్పత్రికి తరలించగా.. చికిత్స పొందుతూ మృతిచెందాడు, అతడికి గుండెపోటు వచ్చినట్టు వైద్యులు ధ్రువీకరించారు. యూట్యూబ్‌లో పలువురు నెటిజన్లు రాజు బికారీ ఇకలేడంటూ ఆవేదనను వ్యక్తం చేస్తున్నారు. హిందీ వెబ్‌సైట్‌లు కూడా ఈ వార్తను ప్రసారం చేశాయి.