ప్రజ్వల్ గురించి ముందే హెచ్చరించిన ఆ బీజేపీ నేతపై లైంగిక వేధింపుల కేసు

హసన ఎంపీ ప్రజ్వల్‌ రేవణ్ణ అఘాయిత్యాల వ్యవహారం దేశవ్యాప్తంగా సంచలనంగా మారిన విషయం తెలిసిందే. రేవణ్ణ దారుణాల విషయంలో ప్రజావేగుగా వ్యవహరించిన బీజేపీ నేత దేవరాజే గౌడపై లైంగిక వేధింపుల కేసు నమోదయ్యింది. దేవరాజే గౌడ తనను మోసం చేశారని ఆరోపిస్తూ ఓ మహిళ పోలీసులకు ఫిర్యాదు చేయడంతో ఆయనపై పోలీసులు కేసు నమోదు చేశారు. కాగా, కర్ణాటకలో జేడీఎస్‌తో పొత్తుకు ముందే.. ప్రజ్వల్‌ రేవణ్ణ లైంగిక దౌర్జన్యాల గురించి బీజేపీ అధిష్ఠానాన్ని ఆయన అప్రమత్తం చేసిన విషయం ఇటీవలే వెలుగులోకి వచ్చింది.

వృత్తిరీత్యా న్యాయవాది అయిన దేవరాజే గౌడ.. గతేడాది జరిగిన కర్ణాటక శాసనసభ ఎన్నికల్లో హోలినరసిపురం నియోజకవర్గంలో ప్రజ్వల్ తండ్రి హెచ్‌డీ రేవణ్ణపై పోటీ చేసి ఓటమి చవిచూశారు. ప్రజ్వల్‌ రేవణ్ణ వ్యవహారం వెలుగులోకి వచ్చిన తర్వాత ఆయన పేరు వార్తల్లో నిలిచింది. అయితే, హాసన జిల్లాకు చెందిన ఓ 36 ఏళ్ల మహిళ.. తనను దేవరాజే గౌడ మోసం చేశాడని ఆరోపించింది. తన ఆస్తిని విక్రయించే విషయమై సాయం చేస్తాననే నెపంతో లైంగిక వేధింపులకు పాల్పడినట్టు ఫిర్యాదులో పేర్కొంది. తనకు, తన కుటుంబానికి రక్షణ కల్పించాలని కోరింది. తనను వేధింపులకు గురిచేసి, ఈ విషయం గురించి ఎవరికైనా చెబితే నా భర్తను, నన్ను చంపుతానని బెదిరించాడని తెలిపింది.

ఏప్రిల్ 1నే ఆయనపై కేసు నమోదుకాగా.. తాజాగా బయటపడింది. ఈ ఆరోపణలపై దేవరాజే గౌడ ఫేస్‌బుక్‌లో స్పందించారు. ఇదంతా కుట్రేనని కొట్టిపారేశారు. మహిళ, ఆమె భర్త తనను ఆఫీసులో కలిశారని తెలిపారు. ఇదిలా ఉండగా, ప్రజ్వల్‌ వీడియోల లీక్‌ వెనుక దేవరాజే హస్తం ఉన్నట్టు ఆరోపణలు వచ్చాయి. రేవణ్ణ కుటుంబానికి వ్యతిరేకంగా పోరాడుతున్న దేవరాజే గౌడకు ప్రజ్వల్‌ వీడియోలు, ఫొటోలను ఇచ్చినట్టు వారి మాజీ డ్రైవర్‌ కార్తిక్‌ ఆరోపించాడు. అయితే, అతడి ఆరోపణలను తోసిపుచ్చిన దేవరాజే.. జేడీఎస్‌, బీజేపీ నాయకులు ఆ వీడియోలను విడుదల చేయలేదని చెప్పారు. అధికార పార్టీ కాంగ్రెస్‌ నేతలే వాటిని విడుదల చేసి ఉంటారని ఆరోపించడం గమనార్హం. ఈ అంశంపై దర్యాప్తు చేస్తున్న సిట్‌ నోటీసులు ఇస్తే తన వద్ద ఉన్న ఆధారాలను అందజేస్తానని తెలిపారు.