మీ ఓటు ఇలా వేయండి.. పోలింగ్ కేంద్రంలోకి ఇలా అస్సలు వెళ్లొద్దు

మీకు ఈ మధ్యే ఓటు హక్కు వచ్చిందా..? తొలిసారి ఓటేయబోతున్నారా..? పోలింగ్ బూత్‌లో ఎవరెవరు ఉంటారు..? ఈవీఎంలో ఓటు ఎలా వేస్తారు..? అనే విషయాల పట్ల మీకు అవగాహన లేదా..? అయితే ఓటేసేందుకు వెళ్లేటప్పుడు తీసుకోవాల్సిన జాగ్రత్తల గురించి.. పోలింగ్ కేంద్రంలో ఎవరెవరు ఉంటారు.. వారేం చేస్తారనే వివరాలు మీకోసం..

ఓటు వేయడం మన బాధ్యత.. ఓటు హక్కు. అయితే ఓటు వేయడానికి వెళ్లే సమయంలో కొన్ని నియమాలను కచ్చితంగా పాటించాలి. పోలింగ్ సెంటర్‌లోకి పార్టీల గుర్తులను తీసుకెళ్లడం నిషిద్ధం. పార్టీల రంగులున్న దుస్తులు, టోపీలు ల్లాంటివి ధరించిన వారిని పోలింగ్ బూత్‌లోకి అనుమతించరు. అలాగే సెల్ ఫోన్లను సైతం పోలింగ్ బూత్‌లోకి అనుమతించరు. కాబట్టి.. పోలింగ్ సిబ్బందికి సహకరించాలి.

మీరు పోలింగ్ కేంద్రంలోకి వెళ్లగానే అసిస్టెంట్ ప్రిసైడింగ్ ఆఫీసర్.. మీ ఓటర్ ఐడీని, ఓటర్ స్లిప్‌ను పరిశీలించి.. ఓటరు జాబితాలో మార్క్ చేసుకుంటారు. పోలింగ్ కేంద్రంలో ఉండే రాజకీయ పార్టీల పోలింగ్ ఏజెంట్లకు వినిపించేలా మీ వివరాలు చదువుతారు. ఈ వివరాలను పోలింగ్ ఏజెంట్లు నమోదు చేసుకుంటారు. వెంటనే మీకు మరో అధికారి కనిపిస్తారు. ఆయన మీ ఎడమ చేతి చూపుడు వేలికి సిరా గుర్తు పెట్టి.. ఓటర్ రిజిస్టర్ అని పిలిచే ఫామ్ 17ఏలో మీ వివరాలు నమోదు చేసుకుంటారు. మీతో సంతకం చేయించుకొని పోల్ స్లిప్ ఇస్తారు.

మరో అధికారి మీ వేలికి ఉన్న సిరా గుర్తును పరిశీలించి.. పోల్ స్లిప్ తీసుకుంటారు. తర్వాత కంట్రోల్ యూనిట్‌లో బ్యాలెట్ జారీ చేస్తారు. అప్పుడు బిజీ లైట్‌తోపాటు.. ఈవీఎంపై గ్రీన్ లైట్ వెలుగుతుంది. ఆ తర్వాత మీరు ఓటర్ కంపార్ట్‌మెంట్‌లోకి వెళ్లి.. ఈవీఎం మీద మీకు నచ్చిన అభ్యర్థి గుర్తుకు ఎదురుగా ఉన్న బటన్ నొక్కాలి. మీ ఎడమ వైపు ఉన్న వీవీప్యాట్‌ చూసి మీరు వేసిన గుర్తుకే ఓటు పడిందో లేదో నిర్ధారించుకోవచ్చు. అయితే వీవీప్యాట్‌లో మీరు నొక్కిన గుర్తుకు సంబంధించిన స్లిప్.. 7 సెకన్లపాటు కనిపించాక బాక్సులో పడిపోతుందనే విషయం మర్చిపోవద్దు. ఓటు వేయడంలో మీకు ఎలాంటి ఇబ్బందులు తలెత్తినా.. మీ ఓటు ఇంకెవరైనా వేసినా.. వెంటనే పోలింగ్ ఆఫీసర్‌‌కు ఫిర్యాదు చేయొచ్చు. ఓటర్ ఐడీ లేకపోయినా ఆధార్ కార్డ్, పాన్ కార్డ్, డ్రైవింగ్ లైసెన్స్, పాస్‌పోర్ట్, మీ ఫొటో ఉన్న బ్యాంక్ పాసు బుక్ లాంటి వాటిల్లో ఏదైనా ఒకటి తీసుకెళ్లి ఓటేయొచ్చు. ఒకవేళ మీ దగ్గర ఓటర్ స్లిప్ లేకపోతే.. ఓటర్ హెల్ప్ లైన్ యాప్ ద్వారా డౌన్‌లోడ్ చేసుకోవచ్చు.