గాజాలో భారత మాజీ సైనికాధికారి మృతి.. ఎవరీ కల్నరల్ వైభవ్ అనిల్ కాలే

గాజాలోని రఫా ప్రాంతంలో జరిగిన దాడిలో భారత మాజీ సైనికాధికారి కల్నల్ వైభవ్‌ అనిల్‌ కాలె (46) మృతి చెందారు. ఐక్యరాజ్యసమితి రక్షణ, భద్రతా విభాగంలో సమన్వయకర్తగా పనిచేస్తోన్న అనిల్ కాలే.. రఫా నగరంలోని ఓ ఆసుపత్రిలో పరిస్థితిని సమీక్షించడానికి వెళుతుండగా కాల్పులు జరిగాయి. ఐరాస జెండాతో ఉన్న వాహనంపై కాల్పులు జరపడంతో కాలె ప్రాణాలు కోల్పోయారు. గత ఏడు నెలలుగా కొనసాగుతోన్న హమాస్, ఇజ్రాయేల్ యుద్ధంలో ఐరాస అంతర్జాతీయ సిబ్బంది మరణించడం ఇదే మొదటిసారి. అయితే, ఈ ఘాతుకానికి ఎవరు పాల్పడ్డారనే విషయంలో స్పష్టత లేదు.

కాల్పులు జరిగిన సమయంలో కాలెతో పాటు.. వాహనంలో ఉన్న మరో వ్యక్తికి గాయాలయ్యాయి. ఈ ఘటనపై తీవ్రంగా స్పందించిన ఐక్యరాజ్యసమితి దర్యాప్తునకు ఆదేశించింది. అటు, ఇజ్రాయేల్‌ కూడా ప్రత్యేకంగా విచారణ కమిటీని ఏర్పాటు చేసింది. ఇక, మహారాష్ట్రలోని నాగ్‌పుర్‌కు చెందిన వైభవ్ అనిల్ కాలె.. 1998లో భారత సైన్యంలో చేరారు. రెండు దశాబ్దాల పాటు సైనికుడిగా సేవలందించి.. 2022లో పదవీ విరమణ చేశారు. రెండు నెలల కిందటే గాజాలోని ఐరాస రక్షణ, భద్రతా విభాగంలో సమన్వయకర్తగా చేరారు. సైన్యంలో ఉన్నప్పుడు ఐరాస శాంతి పరిరక్షక దళంలోనూ విధులు నిర్వహించారు. 2009 నుంచి 2010 వరకూ ఐరాస చీఫ్ సెక్యూరిటీ ఆఫీసర్‌గా ఉన్నారు. కాలెకు భార్య, ఇద్దరు పిల్లలు ఉన్నారు.

కాలే కుటుంబం దేశ రక్షణకే అంకితమైంది. వైభవ్ అనిల్ సోదరుడు విశాల్ కాలె ఇండియన్ ఎయిర్‌ఫోర్స్‌లో గ్రూప్ కెప్టెన్‌గా ఉన్నారు. ఆయన బాబాయి కుమారుడు అమే కాలే ఆర్మీలోనూ.. బావ ప్రశాంత్ కర్డే వైమానిక దళం వింగ్ కమాండర్‌గా పనిచేసి రిటైర్ అయ్యారు. లింక్డిన్ ప్రొఫైల్ ప్రకారం కల్నల్ కాలె నాగ్‌పూర్‌లో ఇంటర్ వరకూ చదువుకున్నారు. తర్వాత జవహర్‌లాల్ నెహ్రూ యూనివర్సిటీలో బీఏ (హ్యుమానిటీస్), సీనియర్ డిఫెన్స్ మేనేజ్‌మెంట్‌లో దేవీ అహిల్యా యూనివర్సిటీ నుంచి డిప్లొమా, రెడ్ క్రాస్ నుంచి 2009లో ఇంటర్నేషనల్ హ్యుమానిటేరియల్ లా సర్టిఫికెట్ కోర్సు పూర్తిచేశారు. 98లో ఆర్మీలో చేరిన వైభవ్ అనిల్.. జమ్మూ కశ్మీర్ 11 రైఫిల్స్‌లో కమాండర్‌గా.. మౌలోని ఆర్మీ ఇన్‌ఫాంట్రీ స్కూల్ ఇన్‌స్ట్రక్టర్‌గా ఉన్నారు. ఈశాన్య, సియాచిన్ గ్లేసియర్‌లో విధులు నిర్వహించారు. ఉగ్రవాద వ్యతిరేక పోరాటాలు, ఆపరేషన్‌లలో చురుకుగా వ్యవహరించారు. బెటాలియన్ కమాండర్, రైఫిల్ కంపెనీ కమాండర్ సహా పలు స్థాయిల్లో పనిచేశారు.