ప్రధానిపై కాల్పులు.. కడుపులోకి దూసుకెళ్లిన బుల్లెట్.. పరిస్థితి విషమం

స్లోవేకియా ప్రధానమంత్రి రాబర్ట్ ఫికో చావుబతుకుల మధ్య కొట్టుమిట్టాడుతున్నారు. ప్రధాని రాబర్ట్ ఫికోపై ఓ దుండగుడు కాల్పులకు తెగబడ్డాడు. కేబినెట్ భేటీలో పాల్గొన్న రాబర్ట్ ఫికో బయటికి వస్తుండగా.. ఈ దుర్ఘటన చోటు చేసుకుంది. అయితే ప్రధానమంత్రి రాబర్ట్ ఫికోపై కాల్పులు జరిపిన దుండగుడిని.. భద్రతా సిబ్బంది అక్కడే అదుపులోకి తీసుకున్నారు. ఈ ఘటనతో అలర్ట్ అయిన భద్రతా సిబ్బంది.. హుటాహుటిన రాబర్ట్ ఫికోను ఆస్పత్రికి తరలించి చికిత్స అందించారు. ఈ ఘటనలో రాబర్ట్ ఫికోకు తీవ్ర గాయాలయ్యాయి. ఆ ఆగంతకుడు జరిపిన కాల్పుల ధాటికి.. ఓ బుల్లెట్ ప్రధాని కడుపులోకి దూసుకెళ్లినట్లు వార్తలు వస్తున్నాయి. ప్రస్తుతం రాబర్ట్ ఫికో పరిస్థితి విషమంగా ఉన్నట్లు తెలుస్తోంది.

హాండ్లోవాలో నిర్వహించిన మంత్రి వర్గ సమావేశానికి హాజరైన రాబర్ట్ ఫికో.. తిరిగివస్తుండగా బుధవారం ఈ సంఘటన చోటు చేసుకుంది. దుండగుడు జరిపిన నాలుగు రౌండ్ల కాల్పుల్లో రాబర్ట్ ఫికో కడుపులోకి బుల్లెట్‌ దూసుకుపోయింది. ఈ ఘటనను స్లోవేకియా అధ్యక్షుడు జుజానా కాపుటోవా తీవ్రంగా ఖండించారు. రాబర్ట్ ఫికో త్వరగా కోలుకోవాలని ఆయన ఆకాంక్షించారు. స్లోవేకియా రాజధాని బ్రెటిస్లావాకు 150 కిలోమీటర్ల దూరంలో ఉన్న హాండ్లోవా నగరంలోని హౌస్‌ ఆఫ్‌ కల్చర్‌ భవనం బయట ఈ సంఘటన చోటు చేసుకోవడం గమనార్హం. ప్రధాని రాబర్ట్ ఫికోపై జరిగిన కాల్పుల ఘటనను డిప్యూటీ స్పీకర్‌ లుబోస్‌ బ్లహా ధృవీకరించారు.

59 ఏళ్ల రాబర్ట్ ఫికోపై కాల్పులు జరిపినట్లు సమాచారం రావడంతో వెంటనే హెలికాప్టర్‌ను పంపించి ఆస్పత్రికి తరలించారు. హాండ్లోవాలోని ఆస్పత్రికి తీసుకెళ్లిన సమయంలో రాబర్ట్ ఫికో స్పృహలోనే ఉన్నారని ఆస్పత్రి వర్గాలు తెలిపాయి. వరుసగా కాల్పులు జరపడం తాను చూసినట్లు ఓ ప్రత్యక్ష సాక్షి వెల్లడించాడు. ఇక సెక్యూరిటీ సిబ్బంది ఓ వ్యక్తిని కారులో పడేసి తీసుకెళ్లడం చూసినట్లు మరో సాక్షి చెప్పాడు. అయితే ఆ దుండగుడు ఎందుకు ప్రధానిపై కాల్పులు జరిపాడు అనేది మాత్రం వెల్లడికాలేదు.

 స్లోవేకియా ప్రధాని రాబర్ట్ ఫికోపై కాల్పుల ఘటనపై యూరప్‌లోని పలు దేశాధినేతలు స్పందించారు. ఇది చాలా నీచమైన దాడి అని యూరోపియన్ కమిషన్ ప్రెసిడెంట్ ఉర్సులా వాన్ డెర్ లేయన్ అభివర్ణించారు. ఇలాంటి హింసాత్మక చర్యలకు స్థానం లేదని తెలిపారు. ఈ సంఘటన గురించి విని షాక్ అయినట్లు చెక్ రిపబ్లిక్ ప్రధాని పీటర్ ఫియాలా గ్ పేర్కొన్నారు. రాబర్ట్ ఫికో త్వరగా కోలుకోవాలని ఆశించారు. ఈ కష్టకాలంలో తన ఆలోచనలు స్లోవేకియా ప్రధానిపై ఉంటాయని పోలాండ్ ప్రధాని డొనాల్డ్ టస్క్ పేర్కొన్నారు.