పూజారిని కిడ్నప్ చేసిన దుండగులు

కొందరు దుర్మార్గులు తాము చేసిన పని ఎక్కడ బయటపడుతోందననే భయంతో ఓ గుడి పూజారిని కిడ్నాప్ చేశారు. ఆపై చిత్రహింసలకు గురి చేశారు. తాము పోలీసులమంటూ వచ్చి తీసుకెళ్లిన దుండగులు.. నరకం చూపించారు. ఎలాగోలా వారి చెర నుంచి పూజారి తప్పించుకుని పోలీసులను ఆశ్రయించగా.. అసలు విషయం బయటపడింది. ఇంతకీ పూజారిని ఎవరు కిడ్నాప్ చేశారు? ఎందుకు కిడ్నాప్ చేశారు? అని ప్రశ్నించారు. ఇందుకు సంబంధించిన వివరాలు ఇలా ఉన్నాయి.చిత్తూరు జిల్లాలోని గంగాదర నెల్లూరు మండలం అంకాల పరమేశ్వరి గుడి పూజారి రామచంద్రన్‌ను దుండగులు కిడ్నాప్ చేశారు. 15 రోజుల ముందు కిడ్నాప్ జరగగా.. ఆలస్యంగా వెలుగులోకి వచ్చింది. బాధితుడు చెప్పిన వివరాల ప్రకారం.. నిందితులు కొందరు తమిళనాడు పోలీసులమంటూ వచ్చారు. అలా తీసుకెళ్లిన దుండగులు.. వారం రోజుల పాటు చిత్రహింసలకు గురి చేశారు. వారి నుంచి తప్పించుకుని బటయపడిన రామచంద్రన్.. పోలీసులను ఆశ్రయించాడు. బాధితుడి ఫిర్యాదు మేరకు 12 మంది నిందితులపై కిడ్నాప్, హత్యాయత్నం, ఎస్సీ, ఎస్టీ అట్రాసిటీ కేసు నమోదు చేశారు. కిడ్నాప్ ఘటనలో ప్రధాన నిందితుడు కొత్తపల్లి మిట్ట వద్ద గల స్మార్ట్ డివి చైర్మన్, అగరమంగళం అంకాల పరమేశ్వరి ఆలయ ట్రస్ట్ చైర్మన్ తాళ్ల దీపక్ కుమార్‌గా గుర్తించారు. అతనిపై కేసు నమోదు చేశారు. కాగా, ఈ కేసులో ప్రధాన నిందితుడైన దీపక్ కుమార్ పరారీలో ఉన్నట్లు పోలీసులు తెలిపారు. గతంలో అగరమంగళం గ్రామస్తుడు రామచంద్రన్.. గతంలో అంకాల పరమేశ్వర ఆలయ పూజారిగా ఉన్నారు. అగర మంగళం అంకాల పరమేశ్వరి ఆలయ భూములను దీపక్ కుమార్ మాయమాటతో లాగేసుకుని ట్రస్ట్ ఏర్పాటు చేశాడు. అయితే, ప్రస్తుతం రామచంద్రన్ ఎదురు తిరుగుతాడేమోనన్న భయంతో అతన్ని కిడ్నాప్ చేసి బెదిరింపులకు పాల్పడ్డారు నిందితులు. దీపక్ కుమార్ తమిళ పోలీసుల పేరు చెప్పి తనను తీసుకెళ్లారని, చిత్రహింసలకు గరి చేసి.. మత్తు మంచి ఇచ్చి చంపే ప్రయత్నం చేశారని బాధితుడు రామచంద్రన్ ఆరోపించాడు. అయితే, రామచంద్రన్ కిడ్నాపర్ల చెర నుంచి తప్పించుకుని పోలీసులను ఆశ్రయించడంతో అసలు కథ అడ్డం తిరిగింది. వారిపై కేసు నమోదైంది.