రైతుకి పొలంలో దొరికిన విలువైన వజ్రం.. ఎంతో లక్కీ, ధర ఎంతంటే!

కర్నూలు జిల్లాలో వజ్రాల వేట కొనసాగుతోంది. గత వారం రోజులుగా జనాలు పొలాల్లో వజ్రాల కోసం గాలిస్తున్నారు.. ఈ క్రమంలో ఓ రైతును అదృష్టం వరించింది. పొలంలో పనులు చేస్తుండగా ఓ వజ్రం దొరికింది.. జీవితమే మారిపోయింది. కర్నూలు జిల్లా మద్దెకర మండలం హంప గ్రామంలో ఓ రైతు పొలం పనులు చేసుకుంటున్నాడు. అతడికి పొలంలో ఓ వజ్రం దొరకగా.. పెరవలికి చెందిన వ్యాపారి వేలం పాటలో రూ.5 లక్షలు, రెండు గ్రాముల బంగారం రైతుకు ఇచ్చి ఆ వజ్రాన్ని దక్కించుకున్నాడు. అయితే బయట మార్కెట్‌లో ఆ వజ్రం విలువ ఇంకా ఎక్కువగానే ఉంటుందని అంచనా వేస్తున్నారు.

కర్నూలు జిల్లాతో పాటుగా అనంతపురం జిల్లాలో తొలకరి వర్షాలు కురవగానే వజ్రాల వేట మొదలవుతుంది. కానీ ఈసారి వేసవివకాలంలోనే వజ్రాల కోసం జనాలు గాలింపు మొదలుపెట్టారు. తుగ్గలి మండలంలోని తుగ్గలి, రామాపురం, చిన్నజొన్నగిరి, పగిడిరాయి, జి.ఎర్రగుడి, ఉప్పర్లపల్లి, గిరిగెట్లలో వజ్రాల కోసం గాలిస్తారు. మద్దికెర మండలంలోని పెరవలి, మద్దికెర, బసినేపల్లి ప్రాంతాల్లో కూడా వెతుకుతారు. ఇటు అనంతపురం జిల్లాలోని వజ్రకరూర్‌, బేతాపల్లి, ఊటకల్లు, బసినేపల్లి తదితర ప్రాంతాల్లో వజ్రాల కోసం వేట మొదలైంది.

వర్షాలు బాగా కురవగానే జనాలు పొలాలబాటపడతారు. ప్రతి ఏటా విలువైన వజ్రాలు దొరుకుతుండటంతో పిల్లల దగ్గర నుంచి పెద్దల వరకు వెతుకుతుంటారు. పొలాల్లో దొరికిన వజ్రాలను రహస్యంగా వ్యాపారులకు అమ్మేస్తుంటారు.. వ్యాపారులు కూడా ఆ దగ్గరలోనే మకాం వేస్తారు. కొన్ని సందర్భాల్లో వేలం పాట నిర్వహించి వ్యాపారులు ఆ వజ్రాన్ని దక్కించుకుంటారు. అయితే ఇలా దొరికిన వజ్రం రంగు, జాతిని బట్టి క్యారెట్ల రూపంలో లెక్క చేసి.. ఆ విలువకు తగిన విధంగా డబ్బులతో పాటుగా బంగారం ఇచ్చి వ్యాపారులు కొనుగోలు చేస్తుంటారు. గతేడాది చిన్న జొన్నగిరికి చెందిన ఓ రైతుకు పొలంలో విలువైన వజ్రం దొరికిన సంగతి తెలిసిందే. ఈసారి మాత్రం తొలకరి వానల కంటే ముందుగానే వజ్రాల వేట మొదలైంది. కర్నూలు జిల్లా మాత్రమే కాదు ఆ చుట్టు పక్కల గ్రామాలు.. పొరుగురాష్ట్రాల నుంచి కూడా వజ్రాల కోసం జనాలు తరలి వస్తున్నారు. కర్నూలు, అనంతపురం జిల్లాల్లో జోరుగా ఈ వజ్రాల వేట కొనసాగుతోంది. కొంతమంది ఉద్యోగులు కూడా సెలవులు పెట్టి మరీ ఇక్కడికి వచ్చి వజ్రాల కోసం గాలిస్తున్నారనే టాక్ వినిపిస్తోంది. కొందరు ఏకంగా వంట సామాగ్రితో సహా ఇక్కడ వాలిపోయారట.. అక్కడే వంట చేసుకుని తినేసి అక్కడే వజ్రాల కోసం గాలిస్తున్నారట. మొత్తానికి అక్కడి పొలాలన్నీ జనాలతో సందడిగా మారాయని చెప్పాలి.