ఫలితాలపై తేల్చేసిన రఘువీరా.. సీట్లు కూడా చెప్పేశారు

2024 ఆంధ్రప్రదేశ్ ఎన్నికల్లో ఎవరు గెలుస్తారనే దానిపై తీవ్ర ఉత్కంఠ నెలకొంది. కౌంటింగ్ రోజు దగ్గర పడుతున్న కొద్దీ ఈ టెన్షన్ మరింత పెరిగిపోతోంది. ఇదే సమయంలో రాజకీయ నేతలు, వ్యూహకర్తలు సైతం తమ అంచనాలు, అభిప్రాయాలతో ఈ వేడిని మరింత పెంచుతున్నారు. వైసీపీకి ఇన్ని సీట్లు వస్తాయని.. టీడీపీ కూటమికి అన్ని సీట్లు వస్తాయంటూ నేతలు, పొలిటికల్ స్ట్రాటజిస్టులు, రాజకీయ విశ్లేషకులు తమ అభిప్రాయాలను వ్యక్తం చేస్తున్నారు. ఈ క్రమంలోనే ఏపీసీసీ మాజీ చీఫ్, మాజీ మంత్రి రఘువీరారెడ్డి ఏపీ ఎన్నికల ఫలితాలపై తన అంచనాలను వెల్లడించారు. తాజాగా ఓ యూట్యూబ్ ఛానెల్‌కు ఇంటర్వ్యూ ఇచ్చిన రఘువీరారెడ్డి.. ఏపీ ఎన్నికల ఫలితాలపై కీలక వ్యాఖ్యలు చేశారు.

2024 ఏపీ ఎన్నికల్లో హోరాహోరీ పోరు తప్పదని రఘువీరారెడ్డి జోస్యం చెప్పారు. ఏ పార్టీ వేవ్ ఉండదని తేల్చిచెప్పారు. ఈసారి క్లోజ్ కంటెస్ట్ ఉంటుందన్న ఆయన.. అధికార వైసీపీ లేదా విపక్ష టీడీపీ కూటమి ఏది గెలిచినా 95 నుంచి 97 సీట్లతోనే అధికారంలోకి వచ్చే అవకాశం ఉందని చెప్పుకొచ్చారు. అలాగే సుమారు వంద అసెంబ్లీ స్థానాల్లో మెజారిటీ పదివేలలోపే ఉండే అవకాశం ఉందని అంచనా వేశారు. అలాగే ఈసారి ఎన్నికల్లో డబ్బు ప్రభావం బాగా పనిచేసిందని ఆయన అభిప్రాయపడ్డారు.2024 ఏపీ ఎన్నికల్లో ప్రధానపార్టీలు రెండూ వేలకోట్లు ఖర్చుపెట్టాయని రఘువీరారెడ్డి విమర్శించారు. ఇక డబ్బు ప్రభావం లేని రెండు, మూడుసీట్లలో కాంగ్రెస్ పార్టీ విజయం సాధించే అవకాశం ఉందని ధీమా వ్యక్తం చేశారు. అలాగే లోక్‌సభ అభ్యర్థుల విషయానికి వచ్చేసరికి క్రాస్ ఓటింగ్ జరిగిందని భావిస్తున్నామని కాంగ్రెస్ పార్టీ సీనియర్ నేత అంచనా వేశారు.

2004లో వైఎస్ రాజశేఖర్ రెడ్డి మంత్రివర్గంలో వ్యవసాయశాఖ మంత్రిగా రఘువీరారెడ్డి పనిచేశారు. వైఎస్ఆర్ మరణం తర్వాత రోశయ్య మంత్రివర్గంలో రెవెన్యూశాఖ మంత్రిగా వ్యవహరించారు. ఆ తర్వాత కిరణ్ కుమార్ రెడ్డి మంత్రివర్గంలోనూ కొనసాగారు. ఇక 2014లో రాష్ట్ర విభజన తర్వాత ఏపీసీసీ చీఫ్‌గా నియమితులయ్యారు రఘువీరా. ఆ తర్వాత ప్రత్యక్ష రాజకీయాలకు చాలారోజులు దూరంగా ఉన్న రఘువీరారెడ్డి.. 2023లో కాంగ్రెస్ పార్టీ వర్కింగ్ కమిటీ సభ్యుడిగా నియమితులయ్యారు. 2024 ఎన్నికల్లో వైఎస్ షర్మిలతో కలిసి కాంగ్రెస్ పార్టీ తరుఫున ఎన్నికల ప్రచారం నిర్వహించారు.