రాజ్‌కోట్ ప్రమాదంలో పెను విషాదం.. మృతుల్లో వారం కిందటే పెళ్లైన కొత్త జంట

గుజరాత్‌లోని రాజ్‌కోట్‌‌లో శనివారం సంభవించిన అగ్నిప్రమాదంలో మృతుల సంఖ్య 35కు చేరుకోగా.. వీరిలో 12 మంది చిన్నారులు ఉన్నారు. ఈ దుర్ఘటన పలు కుటుంబాల్లో తీవ్ర విషాదాన్ని నింపింది. ఎవర్ని కదిలించినా కన్నీటి కథలు.. మానవీయ కోణాలే వెలుగులోకి వస్తున్నాయి. పెళ్లయిన వారం రోజులకే ఓ కొత్త జంట మృత్యువు ఒడికి చేరుకుంది. కొత్త జంట, వారి బంధువు రాజ్‌కోట్ గేమింగ్ జోన్‌లో వివాహ వేడుక జరుపుకోడానికి వెళ్లి.. మంటల్లో కాలిబూడిదయ్యారు. కెనడాలో తల్లిదండ్రులతో కలిసి ఉండే అక్షయ్ (24).. రాజ్‌కోట్‌కు చెందిన ఖ్యాతి (20)తో పెళ్లి కుదిరింది. ఇటీవల అక్కడ నుంచి వచ్చిన అక్షయ్.. గత శనివారం కోర్టులో వివాహం చేసుకున్నాడు. కొద్ది రోజుల తర్వాత భారీగా వివాహ వేడుక నిర్వహించాలని భావించారు. కానీ, ఇంతలోనే ఊహించని రీతిలో అగ్ని ప్రమాదంలో నవ దంపతులు ప్రాణాలు కోల్పోయాయి.

గుర్తుపట్టలేనంతగా మృతదేహాలు కాలిపోయాయి. చేతికి ఉన్న ఉంగరం ఆధారంగా అక్షయ్ మృతదేహాన్ని గుర్తించగా.. ఖ్యాతి, ఆమె వదిన హరిత మృతదేహాలను డీఎన్ఐ పరీక్షల కోసం పంపారు. టీఆర్పీ పేరుతో నిర్వహిస్తోన్న గేమింగ్ జోన్‌లో వారాంతం కావడంతో సందర్శకులతో కిక్కిరిసిపోయింది. అంతేకాదు, రూ.99 ఆఫర్ ప్రకటించడంతో జనాలు పోటెత్తారు. హఠాత్తుగా మంటలు చెలరేగి వ్యాపించడంతో లోపలి నుంచి బయటకు రాలేక అగ్నికి ఆహుతయ్యారు. ప్రమాదం సమయంలో కొందరు కిటికీల ద్వారా బయటకు దూకి ప్రాణాలతో బయటపడ్డారు. ఈ ఘటనపై గుజరాత్‌ హైకోర్టు ప్రత్యేక ధర్మాసనం సుమోటోగా విచారణకు చేపట్టింది.

ఇక, ఈ ప్రమాదానికి షార్ట్ సర్క్యూట్ కారణమని భావిస్తున్నా కానీ, ఏంటనేది ఖచ్చితంగా తెలియరాలేదు. ఇది ఇప్పుడు ప్రశ్నార్ధకంగా మారింది. ఇప్పటికీ గుర్తించలేదని అగ్నిమాపక విభాగం అధికారులు తెలిపారు. కాగా, గేమింగ్‌ జోన్‌లోని గో-కార్ట్‌లో ఉన్న టైర్లు, నిర్మాణ కలప, ఫ్లెక్సీలతోపాటు.. భారీగా ఉన్న డీజల్, పెట్రోలు నిల్వలు కూడా మంటలు క్షణాల్లో వ్యాపించడానికి దోహదపడ్డాయని చెబుతున్నారు. జనరేటర్ల కోసం 1,500 లీటర్ల డీజిల్‌, గో-కార్ట్‌ వాహనాల కోసం మరో 2 వేల లీటర్ల పెట్రోల్‌ నిల్వ ఉంచారని, వాటివల్లే ప్రమాద తీవ్రవ పెరిగిందని అంటున్నారు.

గేమింగ్‌ జోన్‌లోని బౌలింగ్‌ ప్రాంతంలో పెద్ద సంఖ్యలో ఖాళీ మద్యం బాటిళ్లు లభించడంతో అక్కడ పార్టీ ఏర్పాటు చేసి ఉంటారని, దానివల్లే ప్రమాదం జరిగి ఉండొచ్చనే అభిప్రాయాలు వ్యక్తమవుతున్నాయి. మరోవైపు, ప్రమా ఘటనపై రాజ్‌కోట్‌ పోలీసు కమిషనర్‌ రాజు భార్గవ ఆదివారం ఏర్పాటు చేసిన మీడియా సమావేశం పలు అనుమానాలకు తావిస్తోందని స్థానిక మీడియా ఆరోపించింది. వాస్తవానికి రాజ్‌కోట్‌ తాలూకా పోలీసులు గేమింగ్‌ జోన్‌ నిర్వాహకులపై ఎఫ్‌ఐఆర్‌ నమోదు చేశారు. గేమింగ్‌ జోన్‌కు ఫైర్ డిపార్ట్‌మెంట్ నుంచి ఎన్వోసీ లేదని స్పష్టంగా పేర్కొన్నారు.