కౌంటింగ్ ముందు ట్విస్ట్.. ఎమ్మెల్సీపై అనర్హత వేటు

2024 ఆంధ్రప్రదేశ్ అసెంబ్లీ ఎన్నికల కౌంటింగ్‌కు ముందు కీలక పరిణామం చోటుచేసుకుంది. ఎమ్మెల్సీ ఇందుకూరి రఘురాజుపై అనర్హత వేటు పడింది. పార్టీ ఫిరాయింపుల చట్టం కింద ఎమ్మెల్సీ రఘురాజుపై అనర్హత వేటు వేస్తూ ఆంధ్రప్రదేశ్ శాసనమండలి ఛైర్మన్ మోషేన్ రాజు నిర్ణయం తీసుకున్నారు. ఎమ్మెల్సీ రఘురాజు ఏపీ అసెంబ్లీ ఎన్నికల ముందు వైసీపీకి రాజీనామా చేసి.. టీడీపీలో చేరారు. దీంతో రఘురాజుపై పార్టీ ఫిరాయింపుల చట్టం కింద చర్యలు తీసుకోవాలని వైసీపీ ఫిర్యాదు చేసింది. వైసీపీ ఫిర్యాదు నేపథ్యంలో మండలి ఛైర్మన్.. ఎమ్మెల్సీ రఘురాజుపై అనర్హత వేటు వేస్తూ నిర్ణయం తీసుకున్నారు.

అయితే వైసీపీ ఫిర్యాదు అనంతరం ఎమ్మెల్సీ రఘురాజును వివరణ ఇవ్వాల్సిందిగా మండలి ఛైర్మన్ గతంలో రెండుసార్లు నోటీసులు ఇచ్చారు. ఒకసారి డుమ్మా కొట్టిన ఎమ్మెల్సీ .. మరోసారి ఆస్పత్రిలో ఉన్న కారణంగా మండలి ఛైర్మన్ వద్దకు వెళ్లలేకపోయారు. ఈ క్రమంలోనే ఆయనపై అనర్హత వేటు వేసినట్లు తెలిసింది. అయితే శాసనమండలి ఛైర్మన్ తీసుకున్న నిర్ణయంపై న్యాయపరంగా ముందుకు వెళ్లాలని రఘురాజు యోచిస్తున్నట్లు సమాచారం. హైకోర్టులో పిటిషన్ దాఖలు చేసే విషయంలోనూ ఆలోచిస్తున్నట్లు తెలిసింది. ఏపీ ఎన్నికల కౌంటింగ్‌కు ఒకరోజు ముందు జరిగిన ఈ పరిణామం రాజకీయంగా ప్రాధాన్యం సంతరించుకుంది.

మరోవైపు ఎమ్మె్ల్సీ రఘురాజు కంటే ముందుగా ఆయన సతీమణి.. వైసీపీని వీడి టీడీపీలో చేరారు. ఇందుకూరి రఘురాజు సతీమణి సుధారాజు.. శృంగవరపుకోట నియోజకవర్గానికి చెందిన ఎంపీటీసీ సభ్యులు, సర్పంచులతో నారా లోకేష్ సమక్షంలో తొలుత టీడీపీ కండువా కప్పుకున్నారు. అయితే తాను మాత్రం పార్టీ మారడం లేదని అప్పట్లో రఘురాజు స్పష్టం చేశారు.

అయితే మరికొన్ని రోజుల్లో ఎన్నికలు జరుగుతాయనే సమయంలో ఆయన కూడా టీడీపీ కండువా కప్పుకున్నారు. ఈ నేపథ్యంలోనే వైసీపీ ఎమ్మెల్సీ రఘురాజుపై ఫిర్యాదు చేసింది. రఘురాజు ఎస్‌.కోటలో వైఎస్సార్‌సీపీ అభ్యర్థి కడుబండి శ్రీనివాసరావును, విశాఖ లోక్‌సభ అభ్యర్థి బొత్స ఝాన్సీని ఓడించేందుకు పనిచేశారని వైసీపీ ఆరోపిస్తోంది. వైసీపీ ఫిర్యాదు మేరకు మండలి ఛైర్మన్ అనర్హత వేటు వేస్తూ నిర్ణయం తీసుకున్నారు.