భార్య కోసం భర్త.. నటి రాధిక ఎంపీగా గెలవాలని నటుడు శరత్ కుమార్ పొర్లు దండాలు

ఎన్నికల వేళ రాజకీయ నేతలు చేసే హడావుడి అంతా ఇంతా కాదు. ఓటర్లను ఆకర్షించడానికి రకరకాల ప్రయత్నాలు చేస్తూ ఉంటారు. అయితే పోలింగ్ తర్వాత ఫలితాల వేళ.. భారం అంతా దేవుడిపైనే వేస్తారు. ఈ క్రమంలోనే ఆలయాలు, దైవదర్శనాల్లో మునిగిపోతారు. మొక్కులు మొక్కడం, వాటిని చెల్లించడం చేస్తూ ఉంటారు. ఈ నేపథ్యంలోనే తాజాగా ఓ సీనియర్ నటుడు.. తన భార్య ఎంపీగా గెలవాలని ఏకంగా పొర్లు దండాలే పెట్టాడు. ఇంతకీ అతనెవరంటే సీనియర్ నటుడు శరత్‌కుమార్. 2024 లోక్‌సభ ఎన్నికల్లో పోటీ చేసిన రాధిక గెలవాలని ఆయన ఈ ప్రయత్నాలు చేశారు. అయితే శరత్‌కుమార్ పొర్లు దండాలు పెడుతున్న సంఘటనకు సంబంధించిన వీడియో ప్రస్తుతం సోషల్ మీడియాలో తెగ వైరల్‌గా మారింది.

లోక్‌సభ ఎన్నికల ఫలితాలకు ముందు రాధిక శరత్‌కుమార్ దంపతులు.. ఆదివారం రాత్రి తమిళనాడులోని విరుధ్‌నగర్‌లో ఉన్న శ్రీ పరాశక్తి మారియమ్మన్ ఆలయాన్ని సందర్శించారు. ఈ క్రమంలోనే అమ్మవారికి ప్రత్యేక పూజలు నిర్వహించారు. ఆ తర్వాత శ్రీ పరాశక్తి మారియమ్మన్ ఆలయ ప్రాంగణంలో పొర్లు దండాలు పెట్టారు. అంతేకాకుండా గత కొన్ని రోజులుగా రాధిక తరఫున ఎన్నికల ప్రచారంలో కూడా శరత్‌కుమార్ పాల్గొన్నారు. ఈ నేపథ్యంలోనే శరత్‌కుమార్ పొర్లు దండాలు పెడుతున్న వీడియో సోషల్ మీడియాలో చక్కర్లు కొడుతోంది.

దక్షిణాది సినీ ఇండస్ట్రీలో సినిమాలు, సీరియల్‌లతో ప్రేక్షకులకు బాగా దగ్గరయ్యారు. ఇక శరత్‌కుమార్ కూడా తన నటనతో పలు భాషల్లో మెప్పించారు. ఈ క్రమంలోనే ప్రస్తుతం జరుగుతున్న లోక్‌సభ ఎన్నికల్లో భాగంగా తమిళనాడులోని విరుధ్‌నగర్‌ స్థానం నుంచి బీజేపీ తరఫున రాధిక శరత్‌కుమార్ పోటీ చేస్తున్నారు. అయితే 2006 లో రాధిక రాజకీయాల్లోకి ఎంట్రీ ఇచ్చారు. అప్పట్లో తన భర్త శరత్‌కుమార్‌తో కలిసి మొదట అన్నాడీఎంకే పార్టీలో చేరారు. ఆ తర్వాత ఏడాదికే పార్టీ వ్యతిరేక కార్యకలాపాలకు పాల్పడుతున్నారంటూ అన్నాడీఎంకే అధిష్ఠానం వారిని పార్టీ నుంచి తొలగించింది.

దీంతో 2007 లో రాధిక, శరత్‌కుమార్ ఆల్‌ ఇండియా సమతువ మక్కల్‌ కట్చి పేరుతో తమిళనాట కొత్త పార్టీని స్థాపించారు. ఆల్‌ ఇండియా సమతువ మక్కల్‌ కట్చి పార్టీకి ఉపాధ్యక్షురాలిగా రాధిక పనిచేశారు. అయితే ప్రస్తుత ఎన్నికలకు కొన్నిరోజుల క్రితం ఆ పార్టీని.. వారు బీజేపీలో విలీనం చేశారు. ఈ నేపథ్యంలోనే విరుధ్‌నగర్ నియోజకవర్గంలో బీజేపీ తమ పార్టీ అభ్యర్థిగా రాధికను బరిలోకి దింపారు. ఇక అదే విరుద్‌నగర్‌ స్థానం నుంచి రాధికకు పోటీగా దివంగత నటుడు కెప్టెన్‌ విజయకాంత్‌ కుమారుడు విజయ ప్రభాకరన్‌ బరిలోకి దిగారు. డీఎండీకే-అన్నాడీఎంకే పొత్తులో భాగంగా విజయ ప్రభాకరన్ ఆ స్థానంలో పోటీ చేస్తున్నారు. ఇక కాంగ్రెస్‌ పార్టీ నుంచి సిట్టింగ్‌ ఎంపీ మాణిక్కం ఠాగూర్‌ మరోసారి బరిలో నిలిచారు.