మాజీ సీఎం వర్క్‌ఫ్రమ్ హోమ్.. కొత్త ముఖ్యమంత్రికి ‘నివాసం’ కరువు

ఒడిశాలో 24 ఏళ్లపాటు కొనసాగిన బిజూ జనతాదళ్‌ (బీజేడీ) పాలనకు ఈ ఎన్నికల్లో ముగింపు పలికారు. నవీన్ పట్నాయక్‌‌ను గద్దె దించిన బీజేపీ.. ఒడిశాలో తొలిసారి ప్రభుత్వాన్ని ఏర్పాటుచేయబోతోంది. ఆ రాష్ట్ర నూతన ముఖ్యమంత్రి ఎవరనే ఉత్కంఠ మాత్రం ఇంకా కొనసాగుతోంది. అయితే, కమలదళానికి మరో తలనొప్పి మొదలైంది. రాష్ట్ర సీఎం అధికార నివాసం కోసం అన్వేషణ కొనసాగించాల్సిన పరిస్థితి నెలకుంది. దీనికి కారణం 24 ఏళ్లకుపైగా ముఖ్యమంత్రిగా కొనసాగిన నవీన్‌ పట్నాయక్‌ తన సొంత ఇంటినే అధికారిక నివాసంగా చేసుకున్నారు. అక్కడి నుంచే ఆయన కార్యకలాపాలు సాగించడంతో ఈ సమస్య వచ్చి పడింది.

తండ్రి పేరుతో బిజూ జనతాదళ్‌ను ప్రారంభించిన నవీన్ పట్నాయక్.. 2000లో జరిగిన ఒడిశా ఎన్నికల్లో విజయం సాధించి అధికారంలోకి వచ్చారు. అప్పటి నుంచి 2024 జూన్ వరకూ ముఖ్యమంత్రిగా ఉన్న ఆయన.. తన సొంత నివాసం ‘నవీన్ నివాస్’ నుంచే పాలన సాగించారు. ప్రభుత్వం కేటాయించిన భవనంలో కాకుండా భువనేశ్వర్‌లోని తన తండ్రి నిర్మించిన ఇంటి నుంచే పనిచేయాలని నిర్ణయించుకున్నారు. దీంతో మిగతా పాలనా విభాగాలు సైతం ఇక్కడి నుంచే విధులు నిర్వర్తించాయి.

నవీన్‌కు ముందు సీఎంలుగా పనిచేసిన హేమానంద బిస్వాల్‌, జానకీ బల్లభ్‌ పట్నాయక్‌ (జేబీ పట్నాయక్)లు భువనేశ్వర్‌ క్లబ్‌ సమీపంలోని ఓ చిన్న భవనం నుంచి కార్యకలాపాలు సాగించారు. 1995లో జేబీ పట్నాయక్‌ అక్కడి నుంచి ఓ రెండంతస్తుల భవనంలోకి మార్చారు. నవీన్ కుటుంబానికి చెందిన పూర్వీకుల బంగ్లా ఆనంద్‌ భవన్‌ ఒకప్పటి ఒడిశా రాజధాని కటక్‌లో ఉంది. నవీన్‌ పట్నాయక్‌ ఆయన సోదరిలు ప్రేమ్, గీత అక్కడే జన్మించగా.. కొత్త రాజధాని ఏర్పడిన అనంతరం భువనేశ్వర్‌కు మకాం మార్చారు. తర్వాత ఆనంద్‌ భవన్‌ను మ్యూజియంగా మార్చారు.

తొలిసారి ఒడిశాలో బీజేపీ ప్రభుత్వాన్ని ఏర్పాటుచేస్తోంది. జూన్‌ 12న కొత్త సీఎం ప్రమాణస్వీకారానికి ఏర్పాట్లు చేస్తోంది. ఈ కార్యక్రమానికి మోదీ కూడా హాజరవుతున్నారు. కానీ, ముఖ్యమంత్రిగా ఎవరిని నియమిస్తారనేది మంగళవారం రాత్రికి స్పష్టత రానుంది. ఈ క్రమంలో కొత్త సీఎం తాత్కాలిక నివాసంగా స్టేట్‌ గెస్ట్‌ హౌస్‌లో ఏర్పాటు చేయనున్నట్లు తెలుస్తోంది.