మా కల సాకారానికి మిగిలింది ఒక్క అడుగే.. అంబటి

ఆంధ్రప్రదేశ్ మంత్రిగా ప్రమాణ స్వీకారం చేసిన జనసేన అధినేత పవన్ కళ్యాణ్‌కు.. అభినందనలు వెల్లువెత్తుతున్నాయి. పలువురు సినీ, క్రీడా, రాజకీయ ప్రముఖులు ఆయనకు శుభాకాంక్షలు తెలియజేస్తున్నారు. ఎన్నికల్లో పోటీచేసిన అన్ని చోట్లా విజయం సాధించి వందశాతం స్ట్రైక్ రేట్ నమోదు చేసిన పవన్ కళ్యాణ్‌ను పొగుడుతూ సోషల్ మీడియాలో పోస్టులు పెడుతున్నారు. ఈ క్రమంలోనే టీమిండియా మాజీ క్రికెటర్ అంబటి రాయుడు చేసిన ట్వీట్ ప్రస్తుతం నెట్టింట వైరల్ అవుతోంది. మంత్రిగా ప్రమాణ స్వీకారం చేసిన జనసేనానికి అంబటి రాయుడు శుభాకాంక్షలు తెలియజేశారు. జనసేనలో భాగమైన ప్రతి ఒక్కరికీ ఇది చాలా గొప్పరోజంటూ ట్వీట్ చేశారు. అలాగే తమ కల సాకారం కావడానికి మిగిలింది ఒక్క అడుగు అంటూ రాయుడు ట్వీట్‌లో రాసుకొచ్చారు.

"పవన్ కళ్యాణ్ ఉప ముఖ్యమంత్రిగా ప్రమాణ స్వీకారం చేయడం చూస్తుంటే చాలా గర్వంగా ఉంది. భవిష్యత్తులో ముఖ్యమంత్రిగా చూడాలనే మా కలకి ఆయన ఒక్క అడుగు దూరంలో ఉన్నారు. జనసేనలో భాగమైన ప్రతి ఒక్కరికీ ఇది గొప్పరోజు " అని అంబటి రాయుడు ట్వీట్ చేశారు. ఐపీఎల్ సహా అంతర్జాతీయ క్రికెట్ నుంచి తప్పుకున్న తర్వాత అంబటి రాయుడు.. వైసీపీకి దగ్గరయ్యారు. ఆ పార్టీ నేతలతో కలిసి ఆడుదాం ఆంధ్ర వంటి కార్యక్రమాల్లోనూ పాలుపంచుకున్నారు. గతేడాది డిసెంబర్ సమయంలో వైఎస్ జగన్ సమక్షంలో వైసీపీలో కూడా చేరారు. అయితే వైసీపీలో చేరిన అంబటి రాయుడు.. ఎక్కువ కాలం ఆ పార్టీలో కొనసాగలేకపోయారు.

కేవలం వారం రోజుల వ్యవధిలోనే వైసీపీకీ రాజీనామా చేసిన అంబటి రాయుడు.. ఆ తర్వాత జనసేన అధినేత పవన్ కళ్యాణ్‌ను కలిసి ఆ పార్టీలో చేరిపోయారు. మొన్న జరిగిన ఎన్నికల్లో టీడీపీ కూటమి విజయానికి కృషి చేశారు. ఇక ఎన్నికల్లో కూటమి గ్రాండ్ సక్సెస్ కావటంతో.. పవన్ కళ్యాణ్‌కు అభినందనలు తెలిపారు అంబటి రాయుడు. చంద్రబాబు మంత్రివర్గంలో చేరిన పవన్ కళ్యాణ్‌కు శుభాకాంక్షలు తెలియజేస్తూ ట్వీట్ చేశారు. డిప్యూటీ సీఎంగా ప్రమాణ స్వీకారం చేశారని.. ముఖ్యమంత్రి అయ్యేందుకు కేవలం అడుగు దూరంలో ఉన్నారంటూ పవన్ కళ్యాణ్‌ను కొనియాడారు. ఇక రాయుడు ట్వీట్ వైరల్ కాగా.. జనసేన అభిమానులు దీనిని రీట్వీట్ చేస్తున్నారు.