అమెజాన్ ఆర్డర్‌ ఓపెన్ చేస్తుండగా బయటకొచ్చిన పాము.. బిత్తరపోయిన బెంగళూరు జంట

ఆన్‌లైన్లో ఆర్డర్ చేసినప్పుడు ఒక వస్తువుకు బదులు మరో వస్తువు రావడాన్ని మీరు చూసి ఉంటారు. కానీ బెంగళూరుకు చెందిన ఓ జంటకు మాత్రం తాము అమెజాన్లో ఆర్డర్ పెట్టిన ఎక్స్ బాక్స్‌ కంట్రోలర్‌తోపాటు ఫ్రీ గిఫ్ట్‌గా ఓ పాము కూడా వచ్చింది. ఎక్స్‌బాక్స్ పార్శిల్‌ను తెరుస్తుండగా.. అందులో నుంచి తాచు పాము వారికి హాయ్ చెప్పింది. ప్యాకింగ్ టేప్‌కు అతుక్కొని ఉండటంతో.. అది బయటకు రాలేకపోయింది. దీంతో విషపూరితమైన పాము వేగంగా కదల్లేకపోవడంతో వారు ఊపిరి పీల్చుకున్నారు.

‘అమెజాన్‌లో ఎక్స్ బాక్స్ కంట్రోల్ ఆర్డర్ పెట్టాం. దాంతోపాటు మాకు ఉచితంగా పాము కూడా వచ్చింది’ అంటూ తన్వీ అనే కస్టమర్ సోషల్ మీడియా హ్యాండిల్ ఎక్స్ (ట్విటర్‌)లో 15 సెకన్ల నిడివి ఉన్న వీడియోను పోస్ట్ చేశారు. అమెజాన్ ఆర్డర్‌ వల్ల మీకు కలిగిన అసౌకర్యానికి చింతిస్తున్నామంటూ తన్వీ పోస్టుకు అమెజాన్ బదులిచ్చింది. దీన్ని మేం చెక్ చేసుకుంటాం. మాకు మీ నుంచి మరిన్ని వివరాలు కావాలంటూ ఓ లింక్‌ను ఇచ్చింది. మా టీమ్ త్వరలోనే అప్డేట్‌తో మిమ్మల్ని సంపద్రిస్తుందని అమెజాన్ ప్రతినిధి ఆమెకు చెప్పారు.

‘ఇంతకు ముందు జొమాటోలో ఐస్ క్రీమ్ ఆర్డర్ చేస్తే వేలు వచ్చింది.. ఆ తర్వాత ఎయిరిండియా విమానంలో ఫుడ్‌లో బ్లేడ్ వచ్చింది. ఇప్పుడేమో అమెజాన్ పామును డెలివరీ చేసింది’ అంటూ.. ఇటీవల జరిగిన వరుస ఘటనలను ఓ నెటిజన్ రాసుకొచ్చాడు. అమెజాన్ ఆర్డర్‌తోపాటు పాము కూడా రావడంతో కొందరు నెటిజన్లు సరదాగా రియాక్ట్ అవుతున్నారు. ‘మీరు అమెజాన్ నుంచి ఆర్డర్ చేశారు కదా.. కొన్నిసార్లు వాళ్లు అమెజాన్ అడవుల నుంచి కూడా ఆర్డర్లను డెలివర్ చేస్తుంటారు. అమెజాన్ అడవులు చాలా పెద్దవని నేను విన్నాను’ అంటూ ఆదిత్య కుమార్ త్రివేది అనే ఎక్స్ యూజర్ సెటైరికల్‌గా కామెంట్ చేశారు.

‘అమెజాన్ డెలివరీ పార్టనర్ నుంచి ఎక్స్‌బాక్స్‌ను మేమే నేరుగా తీసుకున్నాం. దాన్ని బయట కూడా పెట్టలేదు. మేం సర్జాపూర్ రోడ్‌లో నివాసం ఉంటాం. ఘటన మొత్తాన్ని కెమెరాలో బంధించాం. అంతే కాదు అమెజాన్ ప్యాకింగ్ నుంచి పాము బయటకు రావడాన్ని మాతోపాటు ప్రత్యక్షంగా చూసిన వారు కూడా ఉన్నారు’ అని కస్టమర్ తెలిపారు. ప్యాకేజింగ్ టేప్‌కు అతుక్కుపోవడంతో పాము ఎవరికీ ఎలాంటి హాని తలపెట్టలేదని కస్టమర్ చెప్పారు. ఆర్డర్‌తోపాటు పాము వచ్చిన విషయం చెప్పినా సరే.. అర్ధరాత్రి సమయంలో. అమెజాన్ కస్టమర్ సపోర్ట్ వాళ్లు రెండు గంటలపాటు తమను వేచి ఉండేలా చేశారని ఆమె మీడియాకు తెలిపారు. దీనికి సంబంధించిన సాక్ష్యాధారాలు కూడా ఉన్నాయన్నారు. ‘అమెజాన్ మాకు పూర్తి రీఫండ్ ఇచ్చింది. కానీ పరిహారం గానీ.. అధికారికంగా క్షమాపణలు గానీ చెప్పలేదు. తమదైన ధోరణిలో మీకు కలిగిన అసౌకర్యానికి చింతిస్తున్నామని మాత్రమే చెప్పారు. ఇది ఏమాత్రం ఆమోదయోగ్యం కాదు’ అని సదరు కస్టమర్ తెలిపారు.