జగన్ సర్కారు అమలు చేసిన ఆ విధానాన్ని రద్దు చేసిన ఏపీ ప్రభుత్వం

ఏపీలో టీడీపీ కూటమి ప్రభుత్వం మరో కీలక నిర్ణయం తీసుకుంది. అధికారంలోకి వచ్చాక పాలనలో ప్రక్షాళన తెచ్చే దిశగా అడుగులు వేస్తున్న టీడీపీ కూటమి ప్రభుత్వం.. గత ప్రభుత్వం తీసుకున్న మరో నిర్ణయాన్ని మార్చింది. వైసీపీ ప్రభుత్వం అమలు చేసిన ఇసుక పాలసీ రద్దు చేసింది. 2019, 2021లలో వైసీపీ ప్రభుత్వం తెచ్చిన ఇసుక విధానాలను ఏపీ ప్రభుత్వం రద్దు చేసింది. ఈ మేరకు అన్ని జిల్లాల కలెక్టర్లకు ఉత్తర్వులు జారీ చేసింది. 2024 నూతన ఇసుక పాలసీ తెచ్చేవరకూ ఇసుక సరఫరాకు ప్రభుత్వం మార్గదర్శకాలు జారీచేసింది. మరోవైపు ఇసుకకు సంబంధించి ఏపీ ప్రభుత్వం మంగళవారం ( జులై 9) శ్వేతపత్రం విడుదల చేయనుంది. గత ప్రభుత్వంలో అనుసరించిన ఇసుక విధానాలు, అందులో లోపాల గురించి ఇందులో చర్చించనున్నారు.

మరోవైపు ఎన్నికల ప్రచారం సమయంలో ఇచ్చిన హామీ మేరకు నేటి నుంచి (జులై 8) ఏపీ వ్యాప్తంగా ఉచిత ఇసుక విధానాన్ని ప్రభుత్వం అమలు చేస్తోంది. జిల్లాలలో మంత్రులు ఇసుక సరఫరాను మొదలుపెట్టారు. ఏపీవ్యాప్తంగా ప్రస్తుతం వివిధ స్టాక్ పాయింట్లలో 49 లక్షల మెట్రిక్ టన్నుల ఇసుక అందుబాటులో ఉంది. ఇక ఇచ్చిన మాట మేరకు ఇసుకను నేటి నుంచి ప్రభుత్వం ఉచితంగా అందించనుంది. ఈ నిర్ణయం ద్వారా ఇల్లు కట్టుకునేవారితో పాటుగా నిర్మాణ రంగానికి, ఫలితంగా అందులో పనిచేసే కూలీలకు ఉపాధి పెరుగుతుందని ప్రభుత్వం భావిస్తోంది.

ఉచిత ఇసుక విధానంలో భాగంగా ఇసుక కావాల్సిన వారు నామమాత్రపు ఫీజులు చెల్లించి ఇసుక తీసుకెళ్లాల్సి ఉంటుంది. సీనరేజ్, ఇసుక తవ్వకాలు, రవాణా ఖర్చులు వంటి నామమాత్ర రుసుములను అధికారులు వసూలు చేస్తారు. ఇవి కూడా డిజిటల్ విధానంలో స్వీకరించేలా అధికారులు ఏర్పాట్లు చేస్తున్నారు. ఉచిత ఇసుక పంపిణీని పారదర్శకంగా అమలుచేసేందుకు గానూ ఆన్ లైన్ విధానాన్ని తెస్తున్నారు. ఇందులో భాగంగా డిజిటల్‌ చెల్లింపుల స్వీకరణ కోసం 16 జిల్లాల్లో బ్యాంకు ఖాతాలు ఓపెన్ చేశారు. అలాగే పంపిణీ మొదలైన తర్వాత ఇసుక విక్రయం వివరాలు, స్టాక్ గురించిన వివరాలను ఎప్పటికప్పుడు అప్ డేట్ చేయనున్నారు.