ఏపీకి అంతర్జాతీయ అవార్డు.. మహిళా రైతును అభినందించిన చంద్రబాబు

అంతర్జాతీయ స్థాయిలో ఏపీ వ్యవసాయానికి గుర్తింపు లభించింది. అంధ్రప్రదేశ్ కమ్యూనిటీ మేనేజ్డ్ నేచురల్ ఫార్మింగ్‌కు.. గుల్బెంకియన్ ప్రైజ్ ఫర్ హ్యుమానిటీ 2024 అవార్డు వరించింది. దీనిపై ఏపీ సీఎం చంద్రబాబు నాయుడు హర్షం వ్యక్తం చేశారు. ఈ మేరకు ఎక్స్ వేదికగా ట్వీట్ చేశారు. ఆంధ్రప్రదేశ్ కమ్యూనిటీ మేనేజ్డ్ నేచురల్ ఫార్మింగ్ (APCNF) ప్రతిష్టాత్మకమైన గుల్బెంకియన్ ప్రైజ్ ఫర్ హ్యుమానిటీ 2024ని గెలుచుకోవడం ఆనందంగా ఉందన్నారు చంద్రబాబు. గతంలో తాను ముఖ్యమంత్రిగా ఉన్న సమయంలో 2016లో దీనిని ప్రారంభించినట్లు గుర్తుచేసుకున్నారు. ఏపీసీఎన్ఎఫ్.. జీరో బడ్జెట్ నేచురల్ ఫార్మింగ్ మోడల్‌కు ప్రపంచవ్యాప్త గుర్తింపు దక్కడంపై సంతోషం వ్యక్తం చేశారు.

ఏపీసీఎన్ఎఫ్ 2016-19 మధ్యకాలంలో 5 లక్షల ఎకరాలను సేంద్రీయ వ్యవసాయ భూములుగా మార్చిందన్న చంద్రబాబు.. ఏపీసీఎన్ఎఫ్ మోడల్ ద్వారా రైతులకు జీవనోపాధి మెరుగుపడుతుందన్నారు. సేంద్రీయ వ్యవసాయంలో పది లక్షల మంది ఆంధ్రప్రదేశ్ రైతులకు ప్రాతినిధ్యం వహిస్తూ ACPNF తరపున అవార్డు అందుకున్న మా రైతు సోదరి నాగేంద్రమ్మను అభినందిస్తున్నానంటూ చంద్రబాబు ట్వీట్ చేశారు.

మరోవైపు ఏపీసీఎన్ఎఫ్‌తో పాటుగా ఈజిప్టుకు చెందిన సెకెమ్‌ స్వచ్ఛందసంస్థ, ఇండో అమెరికన్ సైంటిస్ట్ రతన్‍లాల్‌ను ఈ గుల్బెంకియన్ అవార్డు వరించింది. పోర్చుగల్‌లోని లిస్బన్‌లో జరిగిన కార్యక్రమంలో రైతు సాధికార సంస్థ ఎగ్జిక్యూటివ్‌ వైస్‌ ఛైర్మన్‌ టి.విజయ్‌కుమార్‌, మహిళా రైతు నాగేంద్రమ్మకు ఈ అవార్డును అందజేశారు. ఈ అవార్డు కింద మిలియన్ యూరోలను ముగ్గురు విజేతలకు సమానంగా పంచారు. మరోవైపు117 దేశాల నుంచి 181 నామినేషన్లు ఈ అవార్డు కోసం రాగా.. ఏపీసీఎన్ఎఫ్ దక్కించుకోవడం విశేషం.

సన్నకారు రైతులను సేంద్రీయ వ్యవసాయం వైపు మళ్లించడమే ఈ ఏపీఎస్ఎన్ఎఫ్ ముఖ్య ఉద్దేశం. సేంద్రీయ ఎరువులను ఉపయోగిస్తూ.. నేలసారాన్ని పెంచుతూ సేద్యం చేయడాన్ని ఏపీసీఎన్ఎఫ్ ప్రోత్సహిస్తుంది. ఏపీలో 5లక్షల హెక్టార్లలో ఈ సంస్థ మహిళా రైతులు, వ్యవసాయదారులతో కలిసి ప్రకృతి సేద్యం చేస్తోంది. మరోవైపు పర్యావరణ మార్పులు, జీవ వైవిధ్యాన్ని దెబ్బతీసే అంశాలను పరిష్కరించేందుకు కృషిచేసే వారికి గుల్బెంకియన్ అవార్డును అందిస్తుంటారు. సేంద్రీయ, ప్రకృతి వ్యవసాయం ద్వారా పర్యావరణ పరిరక్షణకు ఏపీసీఎన్ఎఫ్ చేస్తున్న కృషిని గుర్తించి వారికి ఈ అవార్డు వరించింది.