ఎవరెస్ట్ శిఖరం డ్రోన్ వ్యూ.. చూసేందుకు రెండు కళ్లు చాలవు

ప్రపంచంలోనే అత్యంత ఎత్తైన శిఖరం మౌంట్ ఎవరెస్ట్‌ ను అధిరోహణ ప్రతి సాహసికుడు చిరకాల కల. ప్రతికూల వాతావరణ పరిస్థితులను తట్టుకుని.. శిఖరం చేరడం అంత ఆషామాషీ కాదు. ఈ క్రమంలో ప్రాణాలు కోల్పోయినవారు ఉన్నారు. ఆరోగ్యం సహకరించక కొందరు.. ఆర్థికంగా తట్టుకోలేక ఇంకొందరు ఎవరెస్ట్ ఎక్కాలనే తమ జీవితకాల కోరికను వదులుకుంటారు. అయితే, అలాంటి వారి కోసం చైనాకి చెందిన ఓ సంస్థ డ్రోన్ సాయంతో ఎవరెస్ట్ అందాలను వీడియోలో బంధించింది. చైనా డ్రోన్‌ తయారీ సంస్థ డీజేఐ గ్లోబల్‌ చిత్రీకరించిన ఈ అద్భుతమైన వీడియో.. అక్కడి పరిస్థితులను కళ్లకు కట్టినట్లు చూపించింది.

  ఈ వీడియోను చూసేందుకు రెండు కళ్లు చాలవంటే అతిశయోక్తి కాదు. అంత అద్భుతంగా ఉన్నాయి అందులోని దృశ్యాలు. ఎవరెస్ట్‌ శిఖరంపై ఉన్న ప్రదేశాన్ని చిత్రీకరించడానికి సముద్ర మట్టానికి 3,500 మీటర్ల ఎత్తులో ఉన్న బేస్‌ క్యాంప్‌ నుంచి మావిక్ 2 ప్రో డ్రోన్‌ను ప్రయోగించారు. అక్కడి నుంచి శిఖరం అంచు మీదుగా వెళ్తూ.. అక్కడి దృశ్యాలను డ్రోన్‌ వీడియో రికార్డు చేసింది. ఈ వీడియోలో ఎవరెస్టు శిఖరం అధిరోహిస్తున్నవారు, కిందికి దిగుతున్న సాహసికులను కూడా చూడొచ్చు. అంతేకాకుండా శిఖరానికి సమీపంలో ఉన్న హిమనీ నదాలు, తెల్లటి మంచు దుప్పట్లు పరుచుకున్న చుట్టుపక్కల ప్రాంతాలు కనువిందు చేస్తున్నాయి.

ప్రకృతి అందాలతో అబ్బురపరుస్తోన్న ఆ వీడియో ప్రస్తుతం సోషల్ మీడియాలో తెగ వైరల్ అవుతోంది. డ్రోన్ ద్వారా చిత్రీకరించిన నాలుగు నిమిషాల వీడియో 5,300 మీటర్ల ఎత్తులో ప్రారంభమై.. 8,848 మీటర్ల ఎత్తుకు చేరుకుంటుంది. 6000 మీటర్ల వద్ద చుట్టూ క్యాంప్‌సైట్‌లు, అధిరోహకులు ఏర్పాటు చేసిన గుడారాలు కనిపిస్తాయి. ఈ వీడియోను చూసి నెటిజన్లు సంభ్రమాశ్చర్యానికి గురవుతున్నారు. ‘‘ఇది అద్భుతం.. మహాఅద్భుతంగా ఉంది. హిమాలయాల శిఖరం ఎలా ఉంటుందో పైకి వెళ్లడానికి ఎంత కష్టపడాలో ఇప్పుడు మనం అర్థం చేసుకోవచ్చు’’ అని ఓ నెటిజన్.. ‘అంత ఎత్తులో డ్రోన్ ఎగిరి వీడియో తీయడం నన్ను ఆశ్చర్యానికి గురిచేసింది’ అని మరో నెటిజన్ కామెంట్ చేశాడు.