ఊయలలోని 6 నెలల చిన్నారిపై తాత అత్యాచారం

రాష్ట్రంలో మరో దారుణం చోటు చేసుకుంది. ఇటీవల నంద్యాల జిల్లాలో 8 ఏళ్ల బాలికను మైనర్లు అత్యాచారం చేసి హత్య చేసిన ఘటన మరువకముందే మరో అఘాయిత్యం జరిగింది. ఊయలలో ఉన్న 6 నెలల చిన్నారిపై కన్నూమిన్నూ కానరాని ఓ దుర్మార్గుడు లైంగిక దాడికి పాల్పడ్డాడు. చిన్నారి అరుపులు విన్న తల్లి అక్కడికి చేరుకోవడంతో నిందితుడు పరారయ్యాడు. పరారీలో ఉన్న నిందితుడి కోసం పోలీసులు రంగంలోకి దిగి గాలింపు చేపట్టారు. ఈ ఘటన స్థానికంగా తీవ్ర కలకలం రేపుతోంది. అయితే ఇంతటి దారుణానికి ఒడిగట్టిన ఆ కామాంధుడు.. చిన్నారికి తాత వరస అయ్యే వ్యక్తి కావడం గమనార్హం. ఈ ఘటన శనివారం రామభద్రాపురం మండలంలో చోటు చేసుకుంది.

చిన్నారిని ఊయలలో వేసిన ఆమె తల్లి.. సరుకుల కోసం దగ్గర్లో ఉన్న కిరాణా దుకాణానికి వెళ్లింది. అయితే నార్లవలస గ్రామానికి చెందిన బోయిన ఎరకన్న దొర అనే వ్యక్తి.. ఆ చిన్నారి ఇంట్లో ఎవరూ లేరని గుర్తించి చొరబడ్డాడు. అనంతరం ఊయలలో ఆడుకుంటున్న ఆ చిన్నారిని బయటకు తీసి అత్యాచారానికి పాల్పడ్డాడు. దీంతో ఆ చిన్నారి గట్టిగా ఏడ్చింది. ఆ ఏడుపు విన్న చిన్నారి అక్క.. పరిగెత్తుకుంటూ వెళ్లి తన తల్లికి విషయం చెప్పింది.

దీంతో తల్లితోపాటు ఆ గ్రామంలోని స్థానికులు అందరూ పరుగు పరుగున ఇంటికి చేరుకున్నారు. ఈ క్రమంలోనే ఆ విషయం తెలిసి నిందితుడు చిన్నారిని వదిలేసి పరారయ్యాడు. స్థానికులు పట్టుకునేందుకు ప్రయత్నించినా.. చిక్కకుండా పారిపోయాడు. ఆ తర్వాత చిన్నారిని బాడంగి ప్రభుత్వ ఆసుపత్రికి తరలించి.. అక్కడ ప్రాథమిక చికిత్స చేసిన తర్వాత విజయనగరంలోని ఘోష ఆస్పత్రికి తరలించారు. చిన్నారికి చికిత్స అందించిన తర్వాత.. ప్రస్తుతం ఆమె ఆరోగ్య పరిస్థితి బాగానే ఉన్నట్లు తెలుస్తోంది.

ఆ ఘటన విషయం తెలిసిన బొబ్బిలి డీఎస్పీ శ్రీనివాసరావు.. స్వయంగా గ్రామానికి వెళ్లి విచారణ చేపట్టారు. ఈ ఘటనపై స్థానికుల నుంచి అన్ని వివరాలు సేకరించారు. నిందితుడు బోయిన ఎరకన్న దొరపై పోక్సో చట్టం కింద కేసు నమోదు చేసి.. అనంతరం అతని స్వగ్రామం నార్లవలస వెళ్లి అరెస్ట్‌ చేశారు.