ఇన్‌స్టా‌లో పరిచయం.. గంటల తరబడి చాటింగ్.. తీరా చూస్తే ఎవరంటే ?

సోషల్ మీడియా వచ్చాక రోజురోజుకూ కొత్త తరహా మోసాలు వెలుగుచూస్తున్నాయి. అరచేతిలో ఉన్న సెల్ ఫోన్.. ఎంతలా మంచి పనులకు ఉపయోగపడుతోందో.. అలాగే నేరాలకు కారణమవుతోంది. తాజాగా పల్నాడు జిల్లాలో ఇలాంటి ఘటనే చోటుచేసుకుంది. వారిద్దరూ స్నేహితులు. ఏ విషయాన్ని అయినా ఒకరితో ఒకరు పంచుకునేవారు. అయితే అందులోని ఓ వ్యక్తికి ఇటీవలే ఇన్‌స్టాగ్రామ్‌లో యువతి పరిచయమైంది. ఇన్‌స్టాగ్రామ్‍లో వచ్చిన రిక్వెస్ట్‌ను యాక్సెప్ట్ చేసిన యువకుడు.. ఆమెతో చాటింగ్ మొదలెట్టాడు. కొన్ని రోజుల పాటు వ్యవహారం ఇలానే సాగింది. అయితే ఒకరోజు తనకు డబ్బులు అవసరం ఉన్నాయని.. ఆమె వైపు నుంచి మెసేజ్ వచ్చింది. దీంతో మనోడు రూ.30 వేల రూపాయలు ట్రాన్స్‌ఫర్ చేశాడు.

ఇక కొన్ని రోజుల తర్వాత అసలు విషయం బయటకు వచ్చింది. తనతో యువతిలా చాటింగ్ చేస్తోంది.. ఎవరో కాదు తన స్నేహితుడేనన్న చేదు నిజం అతనికి తెలిసింది. స్నేహితుడే అమ్మాయిలే చాటింగ్ చేసినట్లు గుర్తించాడు. దీంతో ఫ్రెండ్ వద్దకు వెళ్లి గట్టిగా నిలదీశాడు. ఇలా చేస్తావా అంటూ గట్టిగా మందలించాడు. అలాగే తాను ఇచ్చిన రూ.30 వేలు వెనక్కి ఇవ్వాలంటూ డిమాండ్ చేశాడు. అయితే మోసం చేశావంటూ నిలదీయటంతో అతని స్నేహితుడు తట్టుకోలేకపోయాడు. మనస్తాపంతో పురుగులు మందు తాగేశాడు. ఆస్పత్రిలో చికిత్స పొందుతూ ప్రాణాలు కోల్పోయాడు. ఈ ఘటన పల్నాడు జిల్లా సత్తెనపల్లి మండలం రెంటపాళ్లలో జరిగింది.

దాసరి భానుప్రకాష్ అనే యువకుడు.. ఇన్‌స్టాగ్రామ్‌లో నకిలీ అకౌంట్ క్రియేట్ చేసి.. తన ఫ్రెండుతో యువతిలా చాటింగ్ చేసి రూ.30 వేలు తీసుకున్నాడు. అయితే అసలు విషయం తెలిసి స్నేహితుడు నిలదీయటంతో మనస్తాపంతో పురుగుల మందు తాగాడు. అపస్మారక స్థితికి చేరుకున్న భానుప్రకాష్‌ను అతని కుటుంబ సభ్యులు గుంటూరు ప్రభుత్వాసుపత్రికి తరలించారు. అయితే గుంటూరు ప్రభుత్వాసుపత్రిలో భానుప్రకాష్ చికిత్స పొందుతూ ప్రాణాలు కోల్పోయాడు.

అయితే స్నేహితుడి బెదిరింపుల కారణంగానే భానుప్రకాష్ ఆత్మహత్య చేసుకున్నాడని అతని కుటుంబసభ్యులు ఆరోపిస్తున్నారు. ఈ ఘటనపై పోలీసులు కేసు నమోదు చేసుకుని దర్యాప్తు ప్రారంభించారు. అయితే సోషల్ మీడియా మోజులో యువత ఇలాంటి మోసాలకు పాల్పడటం ఎందుకు, ఆ తర్వాత బలవన్మరణాలకు పాల్పడటం ఎందుకని స్థానికులు అభిప్రాయపడుతున్నారు.