పెళ్లి చేయాలనుకున్నాం, నా బిడ్డ ఇక ఇంటికి రాడు కదా

గత కొన్ని రోజులుగా జమ్మూ కాశ్మీర్‌లో ఉగ్రదాడులు పెరుగుతుండటం యావత్ దేశాన్ని తీవ్రంగా కలిచివేస్తున్నాయి. ఈ దాడుల్లో వరుసగా సైనికులు అమరులు కావడం.. ఆ కుటుంబాల్లో తీవ్ర విషాదాన్ని నింపడమే కాకుండా.. దేశం మొత్తాన్ని కూడా శోకసంద్రంలో మునిగిపోయింది. ఈ నేపథ్యంలోనే తాజాగా సోమవారం దొడా ప్రాంతంలో జరిగిన ఉగ్రదాడిలో.. నలుగురు జవాన్లు అమరులు అయ్యారు. ఈ క్రమంలోనే అందులో 27 ఏళ్ల కెప్టెన్ బ్రిజేష్ థపా కూడా ఉన్నారు. ఇప్పుడు తన కుమారుడి మరణంతో కెప్టెన్ బ్రిజేష్ థపా తల్లి చేసిన వ్యాఖ్యలు అందరి హృదయాలను బరువెక్కించేలా ఉన్నాయి. తన బిడ్డకు పెళ్లి సంబంధాలు చూస్తున్నామని.. ఇప్పుడు తన కుమారుడు ఇంటికి రాడు కదా అంటూ ఆమె చేస్తున్న ఆర్తనాదాలకు సమాధానం చెప్పేవారే లేకపోయారు. అయితే అదే సమయంలో దేశ రక్షణ కోసం తమ కుమారుడు ప్రాణాలు అర్పించడం తమకు గర్వంగా ఉందని పేర్కొన్నారు.

కెప్టెన్ బ్రిజేష్ థపా స్వస్థలం పశ్చిమ బెంగాల్‌లో సిలిగురి. ఇక సోమవారం దొడాలో జరిగిన భద్రతా బలగాలు, ఉగ్రవాదులకు జరిగిన ఎన్‌కౌంటర్‌లో కెప్టెన్ బ్రిజేష్ థపా.. ప్రాణాలు కోల్పోయారు. దీంతో సిలిగురిలో విషాద ఛాయలు అలుముకున్నాయి. ఈ క్రమంలోనే కెప్టెన్ బ్రిజేష్ థపాను గుర్తు చేసుకుని.. కుటుంబ సభ్యులు, బంధువులు, స్థానికులు తీవ్రంగా విలపించారు. తమను ఇంత క్షోభకు గురిచేసిన ఉగ్రవాదులపై ఎలాగైనా ప్రతీకారం తీర్చుకోవాలంటూ వారు ప్రభుత్వాన్ని డిమాండ్‌ చేస్తున్నారు.

ఈ సందర్భంగా కెప్టెన్ బ్రిజేష్ థపా తల్లి రోదిస్తున్న తీరు అందర్నీ కంటతడి పెట్టేలా చేసింది. ఐదేళ్ల క్రితమే బ్రిజేష్ ఆర్మీలో చేరారు. బ్రిజేష్‌కు ఇంకా పెళ్లి కాలేదని.. ఇటీవలె సంబంధాలు చూస్తున్నట్లు కుటుంబ సభ్యులు తెలిపారు. ఈ క్రమంలోనే ఆయన మరణ వార్త విని కుటుంబ సభ్యులు గుండెలవిసేలా రోదిస్తున్నారు. తమ కుటుంబంలో బ్రిజేష్ లేని లోటును ఎవరూ తీర్చలేరని వాపోతున్నారు.

మరోవైపు.. బ్రిజేష్ తండ్రి భువనేష్ కూడా ఆర్మీలో పనిచేసి కల్నల్‌ హోదాలో రిటైర్ అయ్యారు. చిన్నతనం నుంచి తండ్రి భువనేష్‌ను చూస్తూ పెరిగిన బ్రిజేష్.. చిన్నతనంలోనే సైన్యంలో చేరడంపై ఇష్టం పెంచుకున్నారు. ఇంజినీరింగ్‌ చేసిన బ్రిజేష్.. అటువైపు వెళ్లకుండా.. దేశసేవ కోసం సైన్యంలోనే చేరాలని నిర్ణయించుకున్నారని కుటుంబ సభ్యులు తెలిపారు. ఇందులో భాగంగానే తొలి ప్రయత్నంలోనే వివిధ దశల్లోని పరీక్షలను విజయవంతంగా పూర్తి చేసి సైన్యంలో చేరి.. తన కలను నెరవేర్చుకున్నాడని చెప్పారు. ఇక సోమవారం దొడాలో జరిగిన ముష్కర దాడిలో కెప్టెన్ బ్రిజేష్‌తోపాటు, నాయక్‌ రాజేశ్‌, సిపాయి బ్రిజేంద్ర, అజయ్‌ అమరులయ్యారు.