పిఠాపురంలో భూముల సర్వే
Andhra Pradesh Telugu | Suryaa Desk | Published : Thu, Jul 18, 2024, 09:03 AM
ప్రభుత్వ భూములు, ఖాళీ స్థలాలను గుర్తించేందుకు సర్వే నిర్వహించాలని కాకినాడ ఆర్డీవో ఇట్ల కిషోర్ ఆదేశించారు. పిఠాపురం మోహన్నగర్లో పార్కు, ఇతర సామాజిక అవసరాల కోసం ప్రత్యేకించిన ఖాళీస్థలాలు, ప్రభుత్వ భూములపై అక్రమార్కుల కన్నుపడిందని, గతంలో కొన్ని స్థలాలు కబ్జాకు గురయ్యాయని, వీటిని పరిరక్షించాలని స్థానికులు కోరుతున్న విషయంపై వస్తున్న వార్తలపై జిల్లా కలెక్టర్ స్పందించారు. కలెక్టర్ ఆదేశాల మేరకు ఆర్డీవో కిషోర్, మున్సిపల్ కమిషనరు కనకారావు తదితరులు మోహన్నగర్లో పర్యటించారు. అక్కడ ఉన్న భూములు, ఖాళీస్థలాలను పరిశీలించారు. ప్రభుత్వ భూమి సర్వే చేయించి హద్దులు గుర్తించాలని ఆర్డీవో సూచించారు. సామాజిక అవసరాల కోసం కేటాయించిన స్థలాలు, వాటి పరిస్థితి, కోర్టు కేసులు, గతంలో వీటికి ఏమైనా పట్టాలు జారీ చేశారా, రిజిస్ట్రేషన్లు జరిగినట్లు ఫిర్యాదులు వచ్చిన నేపథ్యంలో గత పదేళ్లల్లో జరిగిన క్రయ, విక్రయాల వివరాలు తదితర అంశాలను లోతుగా విచారించాలని అధికారులు నిర్ణయించారు. ఇందుకు సంబంధించిన రికార్డులను పరిశీలించి జిల్లా కలెక్టర్కు నివేదించనున్నారు. వారి వెంట పురపాలక సంఘ టీడీపీ ఫ్లోర్లీడర్ అల్లవరపు నగేష్, కౌన్సిలరు రాయుడు శ్రీనివాసరావు, అధికారులు ఉన్నారు.
|
|