ఢిల్లీలో వైఎస్ జగన్ ధర్నాకు జాతీయ పార్టీల మద్దతు
Andhra Pradesh Telugu | Suryaa Desk | Published : Wed, Jul 24, 2024, 07:37 PM
ఏపీలో శాంతి భద్రతలు క్షీణించాయంటూ వైసీపీ అధినేత వైఎస్ జగన్ మోహన్ రెడ్డి ధర్నా నిర్వహించారు. ఢిల్లీలోని జంతర్ మంతర్ వద్ద వైఎస్ జగన్ నేతృత్వంలో వైసీపీ ఎమ్మెల్యేలు, ఎమ్మెల్సీలు, ఎంపీలు ధర్నా చేశారు. ఏపీలో అరాచక పాలన సాగుతోందంటూ వీడియోలు, ఫోటోలు ప్రదర్శించారు. మరోవైపు ఈ ధర్నాకు పలు పార్టీలు సంఘీభావం ప్రకటించాయి. వివిధ పార్టీల నేతలు ధర్నాకు హాజరై వైఎస్ జగన్‌కు మద్దతు పలికారు. మొత్తం 8 పార్టీల నేతల నుంచి వైసీపీకి మద్దతు లభించింది. సమాజ్‌వాదీ పార్టీ అధినేత అఖిలేష్ యాదవ్, ఉద్ధవ్ ఠాక్రే శివసేన నుంచి సంజయ్ రౌత్, తృణముల్ కాంగ్రెస్ నుంచి నదీముల్ హక్, అన్నాడీఎంకే నుంచి తంబి దొరై, ఆమ్ ఆద్మీ పార్టీ నుంచి రాజేంద్రపాల్ గౌతమ్‌తో పాటుగా జేఎంఎం, ఇండియన్ యూనియన్ మజ్లిస్ లీగ్, వీసీకే పార్టీల నేతలు హాజరయ్యారు. ముఖ్యంగా ఇండియా కూటమిలోని మెజారిటీ పార్టీలు ఈ ధర్నాకు హాజరుకావటం ప్రాధాన్యం సంతరించుకుంది. ఇండియా కూటమిలోని కాంగ్రెస్ పార్టీ హాజరుకాలేదు. అటు వైఎస్ జగన్‌కు సన్నిహితంగా ఉండే బీఆర్ఎస్ పార్టీ నుంచి ప్రతినిధులు ఎవరూ హాజరు కాలేదు.
|
|