శాసనసభకు వెళ్లకుంటే రాజీనామా చేయాలి,,,వైఎస్ షర్మిల డిమాండ్

మాజీ ముఖ్యమంత్రి వైఎస్ జగన్మోహన్ రెడ్డిపై ఏపీ కాంగ్రెస్‌ అధ్యక్షురాలు వైఎస్‌ షర్మిలా రెడ్డి మరోసారి వ్యంగ్యాస్త్రాలు సంధించారు. ప్రతిపక్ష హోదా ఇస్తేనే అసెంబ్లీలో అడుగుపెడతానని జగన్ అనడం ఆయన అజ్ఞానానికి నిదర్శనమని ఆమె విమర్శించారు. ఈ మేరకు జగన్‌ను ఉద్దేశించి ఎక్స్‌ (ట్విట్టర్),‌లో షర్మిల విమర్శలు గుప్పించారు. ‘‘సిగ్గు సిగ్గు!! ప్రతిపక్ష నాయకుడి హోదా ఇస్తేనే శాసనసభలో అడుగుపెడతానని అనడం మీ అజ్ఞానానికి నిదర్శనం.. ఇంతకుమించిన పిరికితనం, చేతకగానితనం, అహంకారం ఎక్కడా ఉండదు.. మోసం చేయడం మీకు కొత్తేమీ కాదు. కానీ.. మిమ్మల్ని ఎన్నుకుని, పంపిన ప్రజలను ఇలా వెర్రిగా, వింతగా మోసం చేయడం.. ఓట్లు వేసి గెలిపించిన ప్రజలను అవమానించడం మీకే చెల్లింది.. అసెంబ్లీకి వెళ్లకుండా ప్రజాస్వామ్యాన్ని హేళన చేయడం మీ దివాళాకోరుతనం.. MLA అంటే అర్ధం Member of Legislative Assembly, not Member of Media Assembly.

ఎమ్మెల్యేగా గెలిచింది చట్టసభల్లో ప్రజల గొంతుక కావడానికా? మీడియా ముందు సొంత డబ్బా కొట్టుకోడానికా? మీ ఐదేళ్ల పాలనంతా అవినీతి, దోపిడీ.. రాష్ట్రాన్ని మీరు అప్పుల కుప్ప చేసి పెట్టారని నిండు సభలో అధికార పక్షం శ్వేతపత్రాలు విడుదల చేస్తుంది... మీరు మాత్రం ప్యాలెస్‌లో తాపీగా కూర్చుని మీడియా మీట్‌లు పెడుతున్నారు.. మిమ్మల్ని ప్రజలు ఎమ్మెల్యేను చేసింది ఇందుకు కాదు.. మీ పాలనపై విమర్శలకు అసెంబ్లీలో ఆన్ రికార్డు సమాధానం ఇచ్చుకునే బాధ్యత మీది కాదా? ప్రజలకు అన్యాయం జరిగితే అధికార పక్షాన్ని ఫ్లోర్ ఆఫ్ ది హౌస్‌లో ప్రశ్నించే బాధ్యత మీది కాదా? అసెంబ్లీకి పోనని చెప్పే మీరు.. ప్రతిపక్ష హోదాకే కాదు, ఎమ్మెల్యే హోదాకు కూడా అనర్హులు. వెంటనే రాజీనామా చేయండి.

స్కూల్‌కు పోను అనే విద్యార్థికి టీసీ ఇచ్చి ఇంటికి పంపుతారు... ఆఫీసు ఎగ్గొట్టే పనిదొంగను వెంటనే పనిలోంచి తీసేస్తారు.. మరి ప్రజాతీర్పును గౌరవించకుండా, శాసనసభకి పోను అంటూ గౌరవ సభను అవమానించిన వాళ్లకు ఎమ్మెల్యేగా ఉండే అర్హత లేదు. ప్రజాప్రతినిధిగా అసెంబ్లీకి వెళ్లనపుడు మీరు ఆఫ్రికా అడవులకు పోతారో.. అంటార్కిటికా మంచులోకే పోతారో ఎవరికి కావాలి? అసెంబ్లీకి పోని జగన్ అండ్ కో తక్షణం ఎమ్మెల్యే పదవులకు రాజీనామా చేయాలని కాంగ్రెస్‌ పార్టీ తరఫున డిమాండ్‌ చేస్తున్నాం’ అని షర్మిల తీవ్రస్థాయిలో విరుచుకుపడ్డారు. తనకు ప్రతిపక్ష హోదా ఇచ్చేలా స్పీకర్‌‌ను ఆదేశించాలని కోరుతూ మాజీ సీఎం వైఎస్ జగన్ హైకోర్టులో పిటిషన్ దాఖలు చేసిన విషయం తెలిసిందే. స్పీకర్‌ను ఆయన లేఖ కూడా రాశారు. ఈ నేపథ్యంలో షర్మిల సెటైర్లు వేశారు.