కమలా హ్యారిస్ ఎంట్రీతో ట్రంప్‌కు షాక్

అమెరికా అధ్యక్ష ఎన్నికల్లో డెమోక్రటిక్ పార్టీ తరఫున కమలా హ్యారిస్ రిపబ్లికన్ పార్టీ అధ్యక్ష అభ్యర్థి డొనాల్డ్ ట్రంప్‌ను ఆమె ఢీకొననున్నారు. ఈ క్రమంలోనే అప్పటివరకు ఆధిక్యంలో కొనసాగిన డొనాల్డ్ ట్రంప్ కాస్తా.. అధ్యక్ష బరిలోకి కమలా హ్యారిస్‌ రావడం పెద్ద షాకింగ్‌గా మారింది. ప్రస్తుతం ఓవరాల్‌గా డొనాల్డ్ ట్రంప్ ఆధిక్యంలోనే కొనసాగుతున్నా.. కమలా హ్యారిస్‌ దూసుకురావడంతో.. వారిద్దరి మధ్య స్వల్ప తేడా మాత్రమే ఉన్నట్లు తాజాగా నిర్వహించిన పోల్ సర్వేల్లో స్పష్టం అయింది.

డెమోక్రటిక్‌ పార్టీ అభ్యర్థిగా కమలా హారిస్‌ పేరు ఖరారు కావడంతో.. అమెరికా అధ్యక్ష ఎన్నికల పరిణామాలు ఒక్కసారిగా మారినట్లు సమాచారం. ఇదివరకు జో బైడెన్‌పై అన్ని రంగాల్లో దూకుడు కనబర్చిన రిపబ్లికన్‌ పార్టీ అభ్యర్థి డొనాల్డ్‌ ట్రంప్‌.. కమలా హ్యారిస్ విషయంలో మాత్రం తీవ్ర పోటీ ఎదుర్కొంటున్నారు. ఈ క్రమంలోనే డొనాల్డ్ ట్రంప్ ఆధిక్యం తగ్గినట్లు.. పోల్ సర్వేలు వెల్లడించాయి. అయితే ఈ సర్వే ఫలితాల్లో డొనాల్డ్ ట్రంప్‌ ముందు వరుసలో ఉన్నా.. వారిద్దరి మధ్య స్వల్ప తేడానే ఉన్నట్లు తాజా పోల్‌ సర్వేల్లో తేలింది. డెమోక్రటిక్ పార్టీతోపాటు శ్వేతజాతియేతర ఓటర్లలోనూ ఆమెకు భారీగా మద్దతు పెరిగినట్లు సర్వేలు చెబుతున్నాయి.

వాల్ స్ట్రీట్ జర్నల్ నిర్వహించిన తాజా సర్వేలో 49 కమలా హ్యారిస్.. 47 పాయింట్లతో డొనాల్డ్ ట్రంప్‌ల మధ్య పోటాపోటీగా నెలకొందని తేలింది. ఇందులో అటు ఇటు 3.1 పాయింట్ల తేడా ఉండొచ్చని ఆ సర్వే వెల్లడించింది. ఈనెల మొదట్లో నిర్వహించిన సర్వేలో.. బైడెన్‌పై.. ట్రంప్‌ 6 పాయింట్ల ఆధిక్యం కనబర్చారు. ఇక న్యూయార్క్ టైమ్స్-సియనా కాలేజీ పోల్‌లో కమల, ట్రంప్ మధ్య హోరాహోరీ పోటీ ఉందని తేలింది. 48 శాతం మద్దతుతో డొనాల్డ్ ట్రంప్.. 47 శాతం మద్దతు ఉన్న కమలా హ్యారిస్‌పై స్వల్ప ఆధిక్యంలో ఉన్నారని వెల్లడైంది. ఈ నెల ప్రారంభంతో పోలిస్తే డెమోక్రాట్‌లకు ఆదరణ పెరిగిందని అందులో వెల్లడైంది. ఆ సమయంలో ట్రంప్‌తో పోలిస్తే బైడెన్‌ ఆరు పాయింట్ల వెనుకంజలో ఉన్నారు.

మరోవైపు.. రిజిస్టర్డ్ ఓటర్ల విషయంలో డొనాల్డ్ ట్రంప్ ముందంజలో కొనసాగుతున్నట్లు సర్వేలు వెల్లడించాయి. ప్రస్తుతం డొనాల్డ్ ట్రంప్‌నకు 48 శాతం.. కమలా హ్యారిస్‌కు 46 శాతం ఓటర్ల మద్దతు ఉన్నట్లు తెలిపాయి. అంతకుముందు జో బైడెన్‌పై.. ట్రంప్ 9 పాయింట్ల ఆధిక్యాన్ని కనబర్చారు. దీంతో బైడెన్‌తో పోలిస్తే కమలా హ్యారిస్‌ మరింత ఎక్కువ మద్దతు పొంది.. ట్రంప్‌కు సమీపంలో ఉన్నారని సర్వేలు చెబుతున్నాయి. ఇక నెల క్రితం న్యూయార్క్ టైమ్స్ పోల్‌లో రిజిస్టర్డ్ నల్లజాతి ఓటర్ల నుంచి జో బైడెన్‌కు 59 శాతం మంది మద్దతు లభించగా.. ప్రస్తుతం కమలా హ్యారిస్ విషయంలో ఇది 69 శాతానికి చేరుకున్నట్లు తెలుస్తోంది. లాటిన్‌ ఓటర్ల నుంచి డెమోక్రటిక్‌ పార్టీకి ఆదరణ 45 శాతం నుంచి ఏకంగా 57 శాతానికి పెరగడం విశేషం. మరోవైపు.. బైడెన్‌ పోటీ నుంచి వైదొలిగిన తర్వాత నిర్వహించిన పోల్స్‌ సగటు ప్రకారం.. ట్రంప్ కంటే కమలా హారిస్‌ 1.6 శాతం పాయింట్లతో వెనుకంజలో ఉన్నట్లు బ్లూమ్‌బెర్గ్ తెలిపింది.