ఢిల్లీలో ప్రముఖ నాట్యకారిణి యామినీ కృష్ణమూర్తి కన్నుమూత

తన నాట్యంతో భారత దేశ ఖ్యాతిని ఖండాంతరాలకు వ్యాప్తింపజేసిన ప్రముఖ నృత్యకారిణి యామినీ కృష్ణమూర్తి ఇక లేరు. 84 ఏళ్ల యామినీ కృష్ణమూర్తి వృద్ధాప్య సమస్యలతో బాధపడుతూ కన్నుమూశారు. గత కొంతకాలంగా అనారోగ్యంతో బాధపడుతున్న ఆమె.. ఢిల్లీలోని అపోలో ఆస్పత్రిలో శనివారం సాయంత్రం తుదిశ్వాస విడిచారు. గత ఏడు నెలలుగా ఐసీయూలో చికిత్స పొందుతున్న ఆమె.. ఇవాళ చనిపోయినట్లు ఆస్పత్రి వర్గాలు వెల్లడించాయి. ఆంధ్రప్రదేశ్‌లోని చిత్తూరు జిల్లా మదనపల్లెలో 1940 డిసెంబర్ 20వ తేదీన యామినీ కృష్ణమూర్తి జన్మించారు. పౌర్ణమి రోజు జన్మించడంతో ఆమెకు యామినీ పూర్ణ తిలక అనే పేరును ఆమె తాతగారు నామకరణం చేశారు.

ఐదేళ్ల వయసులోనే.. చెన్నైలోని కళాక్షేత్ర స్కూల్ ఆఫ్ డ్యాన్స్‌లో ప్రముఖ డ్యాన్సర్ రుక్మిణీ దేవి అరుండేల్ ఆధ్వర్యంలో భరతనాట్యం నేర్చుకున్నారు. 1956లో తొలి ప్రదర్శన ఇచ్చిన యామినీ కృష్ణమూర్తి.. కాంచీపురం ఎల్లప్ప పిళ్లై, తంజావురు కిట్టప్ప పిళ్లై వద్ద భరత నాట్యానికి మెరుగులు దిద్దుకున్నారు. 21 ఏళ్ల వయసు ఉన్నప్పుడ మద్రాసులోని వేదాంతం లక్ష్మీనారాయణ శాస్త్రి దగ్గర యామినీ కూచిపూడి నేర్చుకున్నారు. ఆ తర్వాత పంకజ్ చరణ్ దాస్, కేలుచరణ్ మోహపాత్ర వంటి వారి వద్ద ఒడిస్సీ నేర్చుకున్నారు. భరతనాట్యం, కూచిపూడి, ఒడిస్సీలతో పాటుగా కర్ణాటక గానం, వీణలో శిక్షణ పొందారు.శ్రీ వెంకటేశ్వర విశ్వవిద్యాలయం నుంచి డాక్టరేట్ పొందిన ఆమె.. టీటీడీ ఆస్థాన నర్తకిగానూ సేవలందించారు.

తన న్యృత్యంతో భారతదేశ కీర్తిని ఖండాంతరాలకు చాటిన ఆమెకు.. ప్రభుత్వం అనేక అవార్డులతో సత్కరించింది. 28 ఏళ్ల వయసున్నప్పుడు 1968లో యామినీ కృష్ణమూర్తి పద్మశ్రీ పురస్కారం అందుకున్నారు. 2001లో కేంద్ర ప్రభుత్వం యామినీ కృష్ణమూర్తిని పద్మభూషణ్ అవార్డుతో సత్కరించింది. 2016లో పద్మవిభూషణ్ పురస్కారం ఆమెను వరించింది.. 1977లో సంగీత్ నాటక్ అకాడమీ అవార్డును కూడా యామినీ కృష్ణమూర్తి అందుకున్నారు. దేశ రాజధాని ఢిల్లీలో యామినీ స్కూల్‌ ఆఫ్‌ డ్యాన్స్‌ స్థాపించి యువతకు భరత నాట్యం, కూచిపూడిలో శిక్షణ అందిస్తున్నారు. నాట్యానికి అందం, గ్లామర్, శక్తిని యామినీ కృష్ణమూర్తి తీసుకువచ్చారని ఆమె శిష్యులు చెప్తుంటారు. మరోవైపు యామినీ కృష్ణమూర్తి మరణం పట్ల ఏపీ సీఎం చంద్రబాబు నాయుడు, మాజీ సీఎం వైఎస్ జగన్ సహా పలువురు ప్రముఖులు సంతాపం వ్యక్తం చేశారు. కళారంగంలో ఆమె లేని లోటు తీర్చలేనిదని అభిప్రాయపడ్డారు.