భర్త కోసం భార్యల ఆత్మహత్యాయత్నం

అన్నమయ్య జిల్లా మదనపల్లె పట్టణంలోని చంద్రకాలనీకి చెందిన రెడ్డి శేఖర్ అనే వ్యక్తి.. మదనపల్లె టమాటా మార్కెట్లో పనిచేస్తుంటారు. ఇతనికి దుర్గమ్మ అనే మహిళతో మొదట పెళ్లైంది. ఆ తర్వాత ఎలాంటి పరిస్థితుల్లో చేసుకున్నాడో తెలియదు కానీ.. లక్ష్మీ అనే మహిళను మరోసారి మనువాడాడు. ఇద్దరు పెళ్లాలకు విషయం తెలియకుండా కొన్నిరోజులు.. రెడ్డి శేఖర్ మెయింటైన్ చేస్తూ వచ్చారు. అయితే ఎలా తెలిసిందో తెలియదు కానీ.. ఇద్దరు భార్యలకు అసలు విషయం తెలిసిపోయింది. రెడ్డి శేఖర్ శ్రీరాముడు కాదని.. శ్రీకృష్ణుడు తరహా అని కనిపెట్టారు. దీంతో ఇద్దరు మహిళలు గొడవపడ్డారు. నా మొగుడు నాకే కావాలి అంటూ ఇద్దరూ గొడవకు దిగారు. చివరకు ఈ గొడవ శ్రుతిమించి భర్త కోసం ఇద్దరు భార్యలు కూడా ఆత్యహత్యకు యత్నించారు.

నా భర్త నాకే కావాలంటూ దుర్గ.. లేదు నా మొగుడు నాకే సొంతం అంటూ లక్ష్మీ తగువులాడుకున్నారు. చివరకు భర్త కోసం ప్రాణాలను సైతం వదులుకునేందుకు సిద్ధపడ్డారు. గొడవ తర్వాత ఇద్దరూ కూడా పురుగులమందు తాగారు. అయితే వెంటనే గమనించిన కుటుంబసభ్యులు ఇద్దరినీ.. మదనపల్లె ప్రభుత్వ ఆసుపత్రికి తరలించారు. ప్రస్తుతం ఇద్దరి పరిస్థితి క్షేమంగానే ఉన్నట్లు తెలుస్తోంది. అయితే ఈ ఘటనపై పోలీసులు కేసు నమోదుచేశారు. మదనపల్లె టూటౌన్ పోలీసులు దీనిపై దర్యాప్తు జరుపుతున్నారు. భర్త కోసం గొడవ పడి పురుగులమందు తాగిన ఇద్దరు భార్యలు కూడా ఆస్పత్రిలో చికిత్స పొందుతున్నారు.

 అయితే భర్త ఒకరికి తెలియకుండా మరొకరిని పెళ్లాడినప్పటికీ ఆ భార్యలు ఇద్దరూ తమకు అతనే కావాలని కోరుకున్నారు. తమ ప్రాణాలనైనా వదులుకోవడానికి సిద్ధపడ్డారు కానీ.. భర్తను వదిలేయాలని భావించలేదు. అది తాళికి, పెళ్లికి ఉన్న గొప్పదనం, శక్తి అంటూ స్థానికులు అభిప్రాయపడుతున్నారు.