కేంద్ర మంత్రి పెమ్మసాని చొరవతో ,,,,జీజీహెచ్‌కు 28 ఏసీలు ఉచితంగా అందించిన బ్యాంకులు

గుంటూరు ప్రభుత్వాసుపత్రిలో ఓ సమస్యకు పరిష్కారం దొరికింది. రెండు వారాల కిందట జీజీహెచ్ ఆస్పత్రి అధికారులతో కేంద్ర మంత్రి సమీక్షా సమావేశం నిర్వహించారు. గుంటూరు జీజీహెచ్ ఆస్పత్రిలో అందుతున్న వైద్య సేవలు, మౌలిక సదుపాయాలపైనా అధికారులతో చర్చించారు. ఈ క్రమంలోనే ఆస్పత్రిలో ఏసీల కొరత సమస్య కేంద్ర మంత్రి దృష్టికి వచ్చింది. జీజీహెచ్‌లో ఏసీల కొరత కారణంగా రోగులు ఇబ్బందులు పడుతున్నట్లు వైద్యులు మంత్రికి తెలియజేశారు. దీంతో కార్పొరేట్ సోషల్ రెస్పాన్సిబులిటీ (సీఎస్ఆర్) నిధుల ద్వారా ఈ సమస్యకు పరిష్కారం వెతుకుదామని కేంద్ర మంత్రి ప్రతిపాదించారు. అలాగే జీజీహెచ్ ఆస్పత్రిలో ఏసీలు ఏర్పాటుచేసేందుకు ముందుకు రావాల్సిందిగా సంస్థలను కోరారు.

కేంద్ర మంత్రి పిలుపుకు పలు బ్యాంకులు స్పందించాయి. చైతన్య గోదావరి గ్రామీణ బ్యాంక్, యూనియన్ బ్యాంక్, ఐసీఐసీఐ వంటి బ్యాంకులు ఏసీలను అందించేందుకు ముందుకు వచ్చాయి. ఈ బ్యాంకులు ఆస్పత్రి కోసం 28 ఏసీలను ఉచితంగా అందించాయి. కేంద్ర మంత్రి చేతుల మీదుగా సోమవారం 28 ఏసీలను జీజీహెచ్‌కు అందజేశారు. దీనిపై కేంద్ర మంత్రి పెమ్మసాని సంతోషం వ్యక్తం చేశారు. మరోవైపు జీజీహెచ్‌లో సీటీ స్కాన్‌ను కేంద్ర మంత్రి సోమవారం ప్రారంభించారు. రూ.4 కోట్లు ఖర్చు చేసి జీజీహెచ్‌లో సీటీ స్కాన్ యంత్రాన్ని అందుబాటులోకి తీసుకువచ్చారు. రిపేర్‌లో ఉన్న మరో సీటీ స్కాన్ మెషీన్‌ను కూడా త్వరలోనే అందుబాటులోకి తెస్తామని పెమ్మసాని వెల్లడించారు.

మరోవైపు పేదలకు క్యాన్సర్ ప్రాణాంతకం కాకూడదనే సంకల్పంతో జీజీహెచ్‌లో భవన నిర్మాణానికి రూ. 45 కోట్లు, మరో రూ. 15 కోట్ల సొంత ఖర్చుతో ఉచిత క్యాన్సర్ చికిత్సలు, మెడిసిన్స్ అందిస్తున్న నాట్కో నిర్వాహకులకు కేంద్ర మంత్ర పెమ్మసాని చంద్రశేఖర్ అభినందలు తెలియజేశారు. ఏపీ ఆరోగ్యశాఖ మంత్రి సత్యకుమార్ యాదవ్, ఆరోగ్యశాఖ ముఖ్య కార్యదర్శి కృష్ణబాబు సహకారంతో జీజీహెచ్‌కు కావాల్సిన సమగ్ర సదుపాయాలను సమకూరుస్తామని హామీ ఇచ్చారు. పిలుపు ఇచ్చిన వెంటనే కార్పొరేట్ సోషల్ రెస్పాన్సిబులిటీ కింద ఏసీలు సమకూర్చిన బ్యాంకులకు ధన్యవాదాలు తెలియజేశారు.