కోచింగ్ సెంటర్‌ ఘటనపై.. కేంద్రానికి సుప్రీంకోర్టు నోటీసులు

గతవారం ఢిల్లీలోని రావూస్ కోచింగ్ సెంటర్‌లో వర్షం నీరు చేరి ముగ్గురు సివిల్స్ విద్యార్థుల మృతి చెందిన ఈ ఘటనను సమోటాగా స్వీకరించి విచారణ చేపట్టిన సర్వోన్నత న్యాయస్థానం.. తీవ్రంగా స్పందించింది. కేంద్రం, ఢిల్లీ ప్రభుత్వాలకు నోటీసులు జారీచేసింది. కోచింగ్ సెంటర్లు కనీసం భద్రతా ప్రమాణాలు పాటించకపోవడంతో తరుచూ ప్రమాదాలు చోటుచేసుకుంటున్నాయని, మృత్యుకుహరంగా మారిపోతున్నాయని మండిపడుతున్నారు. విద్యార్థులు జీవితాలతో ఆటాలాడుతున్నాయని ఆగ్రహం వ్యక్తం చేసింది.

 ఐఏఎస్ పరీక్షల్లో శిక్షణ కోసం విద్యార్థుల నుంచి విపరీతమైన ఫీజులు వసూలు చేస్తోన్న వందలాది కోచింగ్ సెంటర్లకు భద్రతలో ఎలాంటి నిబంధనలు విధించారో చెప్పాలని నిలదీసింది. ‘ఈ ప్రదేశాలు మృత్యుకుహరంగా మారాయి. భద్రత, గౌరవప్రదమైన జీవితం కోసం ప్రాథమిక నిబంధనలను పూర్తిగా పాటించకపోతే కోచింగ్ సెంటర్లు ఆన్‌లైన్‌లో నడుపుకోవాలి. కోచింగ్ సెంటర్లు ఔత్సాహికుల జీవితాలతో ఆడుకుంటున్నాయి...’ అని జస్టిస్ సూర్యకాంత్, జస్టిస్ ఉజ్జల్ భుయాన్‌ల ధర్మాసనం వ్యాఖ్యానించింది.

కోచింగ్ సెంటర్‌లలో నిర్దేశిత భద్రతా ప్రమాణాలను లిస్ట్ చేయాలని కేంద్రంతో పాటు ఢిల్లీ ప్రభుత్వాన్ని ఆదేశించింది. సమస్యలకు అనుగుణంగా ప్రవేశపెట్టిన సమర్థవంతమైన యంత్రాంగాలపై కేంద్రం, రాష్ట్ర ప్రభుత్వం స్పందించాలని సుప్రీం ధర్మాసనం స్పష్టంగా చెప్పింది. ఈ నిబంధనలలో సరైన వెలుతురు, సురక్షితమైన ప్రవేశ, నిష్క్రమణ ఉండాలని కోర్టు పేర్కొంది.

మున్సిపల్, ఫైర్ సెఫ్టీ నిబంధనలు పాటించని వాటిని మూసివేయాలన్న ఢిల్లీ హైకోర్టు ఆదేశాలను సవాల్ చేసి కోచింగ్ సెంటర్ల సమాఖ్య వేసిన పిటిషన్‌పై తీవ్రంగా మండిపడింది. దీనిపై సుప్రీంకోర్టు రూ.లక్ష జరిమానా విధించింది. విద్యార్థుల మృతి తర్వాత కోచింగ్ సెంటర్లపై మున్సిపల్ అధికారులు కొరడా ఝలిపించిన విషయం తెలిసిందే. పాత రాజిందర్ నగర్‌లోని 30కిపైగా కోచింగ్ సెంటర్లను సీల్ చేశారు. కాగా, మునిసిపల్ కార్పొరేషన్ ముఖ్యంగా వరదలు వంటి సంక్షోభ సమయాల్లో నగర మౌలిక సదుపాయాల నిర్వహణ తీరుపై పలు ప్రశ్నలు సంధించింది. మరోవైపు, ఆర్బన్‌ ప్లానింగ్‌ లోపాలపై వివరణ కోరుతూ మున్సిపల్‌ కార్పొరేషన్‌ చైర్మన్‌కు హైకోర్టు కూడా నోటీసులు జారీ చేసింది.