స్ట్రీట్ ఫైటింగ్.. నడిరోడ్డుపై తన్నుకున్న స్టూడెంట్స్
Andhra Pradesh Telugu | Suryaa Desk | Published : Tue, Aug 06, 2024, 07:36 PM
విశాఖపట్నంలో నడిరోడ్డుపై విద్యార్థులు వీరంగం సృష్టించారు. రెండు గ్రూపులుగా విడిపోయి పిడిగుద్దులు కురిపించుకున్నారు. పక్కవాళ్లు చెప్తున్నా పట్టించుకోకుండా నడిరోడ్డుపైనే ముష్టిఘాతాలకు దిగారు. ఈ ఘటన గోపాలపట్నంలో చోటుచేసుకుంది. కారణాలు స్పష్టంగా తెలియదు కానీ.. రెండు వర్గాలు విడిపోయిన స్టూడెంట్స్ స్ట్రీట్ ఫైటింగ్‌కు దిగారు. టీవీల ప్రభావమో.. డబ్ల్యూడబ్ల్యూఈ ఎఫెక్ట్‌ వలనో తెలియదు కానీ.. ఒకరిపై ఒకరు దాడి చేసుకున్నారు. ఈ ఘటనతో ఆ రోడ్డుపై రాకపోకలకు అంతరాయం కలిగింది. ఒక్కసారిగా రోడ్డు మీద జరుగుతున్న కొట్లాటతో స్థానికులు విస్తుపోయారు. కాలేజీ కుర్రోళ్లు ఇదేం పని అంటూ వారికి సర్ది చెప్పే ప్రయత్నం చేశారు. అయితే స్థానికుల మాటలను ఏ మాత్రం ఖాతరు చేయని విద్యార్థులు సినిమా లెవల్లో తమ ఫైటింగ్ నైపుణ్యాలను ప్రదర్శించారు.
అయితే ఈ తతంగాన్ని మొత్తం అక్కడే ఉన్న ఎవరో వీడియో తీసి సోషల్ మీడియాలో పోస్ట్ చేశారు. దీంతో ఈ వీడియో కాస్తా వైరల్ కాగా.. పోరగాళ్ల తీరుపై నెటిజనం మండిపడుతున్నారు. పెద్దవాళ్లు చక్కగా చదువుకోమని పాఠశాలలు, కాలేజీలకు పంపిస్తే ఇదేం పని అంటూ మండిపడుతున్నారు. చక్కగా చదువుకోవాల్సిన విద్యార్థులు నడిరోడ్డుపై ఇలా ప్రవర్తిస్తారా అంటూ కామెంట్లు పెడుతున్నారు. అయితే స్థానికులు గట్టిగా హెచ్చరించడంతో విద్యార్థులు అక్కడి నుంచి వెళ్లిపోయినట్లు తెలిసింది.
|
|